70 پايىزعا دەيىن جەڭىلدىك بەرەدى

ەۋرازيا ۇلتتىق ۋنيۆەرسيتەتى – اتالعان ەرىكتى جيناقتاۋ جۇيەسىنىڭ باس­تاماسىن قولداعان ەلىمىزدەگى العاش­قى جوعارى وقۋ ورىندارىنىڭ ءبىرى. مەملەكەت باسشىسىنىڭ 2023 جىلى «ادىلەتتى قازاقستاننىڭ ەكونوميكا­لىق باعدارى» اتتى قازاقستان حالقىنا جولداۋىندا ايتىلعان تاپسىرماسىن ىسكە اسىرۋ ماقساتىندا ازىرلەنگەن جاڭا جۇيە بالالارىنا ساپالى ءبىلىم الۋدى جوسپارلايتىن وتباسىلارعا ايتارلىقتاي مۇمكىندىك بەرەدى.

ايتالىق, وسىعان سايكەس بالا 5 جاسقا تولعان كەزدە مەملەكەت باستاپقى ءبىلىم بەرۋ كاپيتالىن 60 اەك (2025 جىلى بۇل 235 920 تەڭگە) كولەمىندە, ال جەتىم بالالار ءۇشىن 120 اەك (471 840 تەڭگە) كولەمىندە باستاپقى ءبىلىم بەرۋ كاپيتالىن بولەدى. سونداي-اق جىل سا­يىن 5-7 پايىز مولشەرىندە مەملەكەتتىك سىيلىقاقى جانە قاتى­سۋشىعا بانك­تىڭ سىياقىسى نەمەسە ءومىردى ساق­تان­دىرۋ كومپانياسىنان ينۆەس­تيتسيالىق سىياقى تولەنەدى.

سونىمەن قاتار «كەلەشەك» جۇيە­سىنە قاتىسۋشىلارعا بىرقا­تار جەڭىلدىك قاراستىرىلعان. ما­سەلەن, جەتىم بالالارعا نەمەسە اتا-اناسىنىڭ قامقورلىعىنسىز قالعاندارعا وقۋ اقىسىنا 50 پا­يىز جەڭىلدىك بەرىلسە, مۇمكىندىگى شەكتەۋلى جاندارعا 30 پايىزعا دەيىن جەڭىلدىك جاسالعان. ال كوپبالالى وتباسىلارعا 30 پايىزعا دەيىن جەڭىلدىك بولسا, از قامتىلعان وتباسىلارعا 20 پايىزعا جەڭىلدىك قاراستىرىلعان. سونداي-اق باسقا دا سانات وكىلدەرى ستۋدەنتتەر ۇيىندە (جاتاقحانادا) وقۋدىڭ بارلىق كەزەڭىندە تەگىن تۇرادى.

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى وقۋ كەزىندە (9-11 سىنىپتار) عىلىمي-زەرتتەۋ قىزمەتىمەن اينالىساتىن تالاپكەرلەرگە ايرىقشا نازار اۋدارماق. ولارعا 70 پايىزعا دەيىن جەڭىلدىك بەرىلەدى. بۇل قولداۋ عىلىم مەن ءبىلىمنىڭ دامۋىنا ءوز ۇلەسىن قوسىپ جۇرگەندەرگە جاڭا مۇمكىندىك اشادى. جاستاردى عىلىمعا ىنتالاندىرىپ, بىلىمگە قۇشتارلىقتارىن وياتادى.

سەرىكتەستىك اياسىندا قوس تاراپ قارجىلىق قولجەتىمدىلىكتى ارتتىرۋعا, دارىندى ستۋدەنتتەردى قولداۋعا, يننوۆاتسيالىق ءبىلىم بەرۋ جوبالارىن جۇزەگە اسىرۋعا باعىتتالعان ىنتىماقتاستىقتى نىعايتۋدى جوس­پارلاپ وتىر.

ديدار اسىلحانوۆ,

ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 3-كۋرس ستۋدەنتى