2023 جىلدىڭ 28 قازانىندا قاراعاندى وبلىسىنداعى كوستەنكو شاحتاسىندا جارىلىس پەن ءورت سالدارىنان 46 كەنشى قازا تاۋىپ, 28 كەنشى جاراقاتتانعان ەدى. باس پروكۋراتۋرا وسى وقيعاعا قاتىستى 106 تومدىق قىلمىستىق ءىستىڭ سوتقا جولدانعانىن حابارلادى, دەپ جازادى Egemen.kz.
سوتقا دەيىنگى تەرگەۋدى باس پروكۋراتۋرانىڭ ارنايى پروكۋرورلارى ىشكى ىستەر مينيسترلىگى, سىبايلاس جەمقورلىققا قارسى ءىس-قيمىل اگەنتتىگى, قارجىلىق مونيتورينگ اگەنتتىگى جانە توتەنشە جاعدايلار مينيسترلىگى قىزمەتكەرلەرى بىرلەسە جۇرگىزگەن.
تەرگەۋ بارىسىندا جازاتايىم وقيعاعا تاۋ-كەن جۇمىستارى كەزىندە قاۋىپسىزدىك ەرەجەلەرىنىڭ جاپپاي بۇزىلۋى سەبەپ بولعانى انىقتالعان. كومىر ءوندىرۋ الاڭىنداعى جارىلىسقا شوعىرلانۋى رۇقسات ەتىلگەن ستاندارتتان ايتارلىقتاي اسىپ كەتكەن كومىر شاڭى جارىلىستارىنىڭ تىزبەكتى رەاكتسياسىن تۋدىرعانى سەبەپ بولعان.
«شاحتا باسشىلىعى مەن ينجەنەرلىك-تەحنيكالىق قىزمەتكەرلەر قاتارىنان 10 ادام قىلمىستىق جاۋاپكەرشىلىككە تارتىلدى. بارلىعى قاماۋدا. ولارعا قازاقستان رەسپۋبليكاسى قىلمىستىق كودەكسىنىڭ 277-بابىنىڭ 3-بولىگى بويىنشا («تاۋ-كەن جۇمىستارى كەزىندە قاۋىپسىزدىك ەرەجەلەرىن بۇزۋ») ايىپ تاعىلدى, اتالعان باپ بويىنشا 8 جىلعا دەيىن باس بوستاندىعىنان ايىرۋ جازاسى قاراستىرىلعان. ءىس بويىنشا 74 ادام جابىرلەنۋشى رەتىندە تانىلدى», دەلىنگەن باس پروكۋراتۋرا حابارلاماسىندا.
جيناقتالعان ماتەريالدار قاراعاندى قالاسىنىڭ ءاليحان بوكەيحان اۋدانىنىڭ اۋداندىق سوتىنا جىبەرىلگەن.