ازەربايجان رەسپۋبليكاسىنىڭ حالىقارالىق قاتىناستاردى تالداۋ ورتالىعى مەن قازاقستان رەسپۋبليكاسى پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ بىرلەسۋىمەن «ازەربايجان – قازاقستان: وزەكتى ماسەلەلەر جانە ەكىجاقتى ىنتىماقتاستىقتىڭ بولاشاق پەرسپەكتيۆالارى» اتتى ماقالالار جيناعى جارىق كوردى. جيناقتا ازەربايجان – قازاقستان ساراپتامالىق كەڭەسى مۇشەلەرىنىڭ ەكى ەل اراسىنداعى قارىم-قاتىناستىڭ قازىرگى جاعدايى مەن بولاشاعىنا ارنالعان ماقالالارى ۇسىنىلعان.
اۆتورلار ەكىجاقتى ىنتىماقتاستىقتىڭ وڭىرلىك فورماتتارعا قاتىسۋ, كولىك دالىزدەرىن دامىتۋ, گۋمانيتارلىق باستامالار جانە باسقا دا ماڭىزدى ماسەلەلەرىن قاراستىرعان. جيناقتىڭ كىرىسپەسىندە ازەربايجان مەن قازاقستاننىڭ تابىستى ىنتىماقتاستىعى ەجەلدەن كەلە جاتقان دوستىق پەن ءوزارا قۇرمەت, سونداي-اق مادەني قۇندىلىقتاردىڭ, داستۇرلەردىڭ, تىلدەردىڭ, ءدىننىڭ جانە ت.ب. ۇقساستىق اياسىنداعى بەرىك نەگىزگە يە ەكەنى ايتىلعان.
«ەكى تاۋەلسىز مەملەكەت اراسىنداعى ديپلوماتيالىق قارىم-قاتىناستار سوناۋ 1992 جىلدىڭ تامىز ايىندا ورناتىلىپ, 2004 جىلعى 1 ناۋرىزدا استانادا ازەربايجان رەسپۋبليكاسى مەن قازاقستان رەسپۋبليكاسى اراسىنداعى دوستىق قارىم-قاتىناس پەن ستراتەگيالىق ارىپتەستىك تۋرالى دەكلاراتسياعا قول قويىلدى. ال 2005 جىلعى 24 مامىردا باكۋدە ازەربايجان رەسپۋبليكاسى مەن قازاقستان رەسپۋبليكاسى اراسىنداعى ستراتەگيالىق ارىپتەستىك جانە وداقتاستىق تۋرالى شارتقا قول قويىلدى. وسىلايشا, مەملەكەتتەر اراسىنداعى قارىم-قاتىناستار ساياسات, ەكونوميكا, كولىك-لوگيستيكا, ينۆەستيتسيا, مادەني-گۋمانيتارلىق ءوزارا ءىس-قيمىل جانە ت.ب. سياقتى ىنتىماقتاستىقتىڭ ءارتۇرلى سالاسىن قامتىپ كەلەدى. ازەربايجان مەن قازاقستان اراسىنداعى كوپ جىلعى تابىستى سەرىكتەستىك قارىم-قاتىناستارى ۋاقىت سىنىنان وتكەن جانە تابىستى دامىپ كەلەدى. ايتا كەتۋ كەرەك, ەكى مەملەكەتتىڭ ءوزارا ءىس-قيمىلى ەكىجاقتى جانە كوپجاقتى قارىم-قاتىناستار اياسىندا دا قۇرىلعان», دەلىنگەن جيناق كىرىسپەسىندە.
سونداي-اق حالىقارالىق ترانسكاسپي كولىك باعىتى اياسىنداعى ىنتىماقتاستىق, ەلدەردىڭ قولايلى ترانزيتتىك الەۋەتى مەن لوگيستيكالىق مۇمكىندىكتەرى ولاردىڭ حالىقارالىق جۇك تاسىمالداۋداعى ماڭىزدىلىعىنىڭ ارتۋىنا ىقپال ەتەتىنى دە قامتىلعان.
جيناقتا قسزي باسشىلىعى مەن ساراپشىلارىنىڭ ماقالالارىنا دا ەرەكشە ورىن بەرىلگەن. ينستيتۋت ديرەكتورى ەركىن تۇقىموۆ «قازاقستان مەن ازەربايجان: ىنتىماقتاستىق پەرسپەكتيۆالارى» اتتى ماقالاسىندا ەكى ەلدىڭ ءوز وڭىرلەرىندە كوشباسشى ءرول اتقارا وتىرىپ, تۇراقتى وڭىرارالىق بايلانىستاردى قالىپتاستىرۋعا الەۋەتى بار ەكەنىن اتاپ وتەدى. قازاقستان مەن ازەربايجاننىڭ ەكونوميكالىق, تەحنولوگيالىق جانە ادامي رەسۋرستارى ءوزارا ءتيىمدى ارىپتەستىكتىڭ نەگىزىنە اينالا الادى. اۆتور تسيفرلىق مەملەكەت قالىپتاستىرۋ, ترانزيتتىك قاۋىپسىزدىك جانە ءبىلىم ەكونوميكاسىن دامىتۋ سياقتى باسىم باعىتتارعا نازار اۋدارىپ, قازىرگى زامانعى سىن-قاتەرلەردى ەڭسەرۋ ءۇشىن ۇزاقمەرزىمدى سەرىكتەستىكتىڭ ساراپتامالىق كوزقاراسىن قالىپتاستىرۋ قاجەتتىگىن باسا كورسەتەدى.
ءوز ماقالاسىندا ەلىمىز تسيفرلىق تەحنولوگيالاردى ەنگىزۋ بويىنشا ورتالىق ازياداعى كوشباسشى ەل ەكەنىنە توقتالعان ە.تۇقىموۆ قازىرگى ۋاقىتتا بۇۇ رەيتينگىندە قازاقستان ونلاين قىزمەت كورسەتۋ بويىنشا الەمدە 8-ورىندا, ال ەلەكتروندى ۇكىمەتتى دامىتۋ بويىنشا 28-ورىندا ەكەنىن اتاپ وتكەن.
«كەيىنگى جىلدارى ازەربايجاندا اقپاراتتىق قاۋىپسىزدىك پەن كيبەرقاۋىپسىزدىكتى قامتاماسىز ەتۋ ءۇشىن ەلەۋلى قادامدار جاسالدى. مۇنداي شارالار ازەربايجاننىڭ كيبەركەڭىستىگىن نىعايتىپ قانا قويمايدى, سونىمەن قاتار ەلدىڭ تسيفرلىق ەكونوميكاسىنىڭ دامۋىنا ىقپال ەتىپ, ونى شەتەلدىك ينۆەستيتسيالار ءۇشىن تارتىمدى ەتەدى جانە ۇزاقمەرزىمدى كەلەشەكتە تۇراقتى دامۋدى قولدايدى. بۇل دامۋ باعىتى قازاقستان مەن ازەربايجاننىڭ تسيفرلاندىرۋ سالاسىنداعى ىنتىماقتاستىعىنىڭ كەڭىستىگىن كەڭەيتەدى. تسيفرلىق جانە قارجىلىق تەحنولوگيالاردى دامىتۋ ەكى ەلدىڭ دە باسەكەگە قابىلەتتىلىگىن ايتارلىقتاي ارتتىرىپ, ولاردىڭ ەكونوميكاسىنىڭ تسيفرلىق ترانسفورماتسياسىن قولداۋعا مۇمكىندىك بەرەدى», دەيدى قسزي ديرەكتورى.
وسى ورايدا قازىرگى تاڭدا كاسپي تەڭىزىنىڭ تۇبىمەن تالشىقتى-وپتيكالىق بايلانىس جەلىسى تارتىلىپ جاتقانىن ايتا كەتكەن ءجون. بۇل جوبا ەۋروپادان قىتايعا تسيفرلىق تەلەكوممۋنيكاتسيا ءدالىزىن قۇرۋدى كوزدەيدى. جوبا 2025 جىلدىڭ سوڭىنا دەيىن اياقتالادى دەپ جوسپارلانعان.
جالپى العاندا, ەكى مەملەكەتتىڭ ىنتىماقتاستىعى تسيفرلىق مەملەكەتتى دامىتۋ تۇرعىسىنان جاڭا تىنىسىن اشىپ كەلەدى.قسزي ازيالىق زەرتتەۋلەر ءبولىمىنىڭ باس ساراپشىسى ءاليا مۇسابەكوۆا «قازاقستان مەن ازەربايجان اراسىنداعى ەنەرگەتيكا سالاسىنداعى ىنتىماقتاستىق» اتتى ماقالاسىندا ەكى ەلدىڭ ەنەرگەتيكا سالاسىنىڭ كەڭەستىك كەزەڭنەن باستاپ تاريحي دامۋىن تالدايدى. ازەربايجان الەمدەگى ەڭ كونە مۇناي ءوندىرۋشى ەلدەردىڭ ءبىرى رەتىندە كومىرسۋتەكتەرگە باسا نازار اۋدارسا, قازاقستان كومىر گەنەراتسياسىنا باسىمدىق بەرە وتىرىپ, قۋاتتى وتىن-ەنەرگەتيكالىق كەشەن قالىپتاستىردى. اۆتور تاۋەلسىزدىك العان ساتكە دەيىن ەكى ەلدىڭ ەنەرگەتيكا سالاسىندا جەتكىلىكتى دەڭگەيدە دامىعانىن, بۇل 90-جىلدارداعى داعدارىستاردان امان شىعۋعا مۇمكىندىك بەرگەنىن اتاپ وتەدى. تەحنولوگيالىق جەتىسپەۋشىلىككە جاۋاپ رەتىندە قازاقستان مەن ازەربايجان شەتەلدىك سەرىكتەستەرمەن بىرلەسكەن كاسىپورىندار قۇرۋ ستراتەگياسىن ازىرلەي باستادى.
قسزي ازيالىق زەرتتەۋلەر ءبولىمىنىڭ جەتەكشىسى جانە باس ساراپشىلارى ايدار قۇرماشەۆ پەن الىشەر تاستەنوۆ «قازاقستان مەن ازەربايجان: جاڭا ورتا دەرجاۆالار» اتتى ماقالاسىندا مەملەكەتتىڭ الەمدىك ارەناداعى مارتەبەسىنىڭ ماڭىزدىلىعى تۋرالى وي قوزعايدى. ەلدەردى «شاعىن», «ورتا», ء«ىرى» دەرجاۆالار رەتىندە جىكتەۋدىڭ ناقتى كريتەريلەرى بولماعانىنا قاراماستان, اۆتورلار مەملەكەتتىڭ سىرتقى سىن-قاتەرلەرگە قارسى تۇرۋ جانە حالىقارالىق قوعامداستىققا ىقپال ەتۋ قابىلەتىنىڭ ماڭىزدىلىعىن اتاپ كورسەتەدى. ماقالادا وڭتۇستىك كورەيا, تۇركيا, يزرايل, يندونەزيا سياقتى ەلدەردىڭ مارتەبەسىن ايقىنداۋدىڭ جاڭا تاسىلدەرى قاراستىرىلادى. ولار الەمدىك ساياساتتا ماڭىزدى ءرول اتقاراتىن ەلدەر رەتىندە تالدانادى.