14 اقپاندا اۋعان سوعىسى جانە تاجىك-اۋعان شەكاراسىنىڭ ارداگەرلەرى ۇقك شەكارا قىزمەتى الماتى وبلىسى بويىنشا دەپارتامەنتىنىڭ قاراساي اۋدانى بويىنشا شەكارا باسقارماسىنا بارىپ, جات ەلدىڭ شەكاراسىندا ەرلىكپەن قازا تاپقان قارۋلاستارىنىڭ ەسكەرتكىشىنە گۇل شوقتارىن قويدى.
سونداي-اق دەپارتامەنتتىڭ شەكارا بولىمشەلەرىندە اۋعان سوعىسى ارداگەرلەرىنىڭ قاتىسۋىمەن جاس ساربازدارعا ارنالعان «ەرلىك ساباعى» ءوتتى.
وتكەن تاريحتى پاراقتاساق, وسىدان تۋرا 36 جىل بۇرىن كەڭەس اسكەرى اۋعان جەرىن تاستاپ شىقتى. ال 2001 جىلدىڭ 8 اقپانىندا تاجىك-اۋعان شەكاراسىنداعى قاقتىعىستار توقتاپ, قازاقستاندىق بىتىمگەرشىلىك باتالونى ءوزىنىڭ ميسسياسىن اياقتاعان بولاتىن. سودان بەرى ەلىمىزدە اۋعان سوعىسىنىڭ جانە «ىستىق نۇكتەگە» بالانعان تاجىك-اۋعان شەكاراسىنىڭ ارداگەرلەرىنە قۇرمەت كورسەتىپ, جات ەلدە ەرلىكپەن قازا تاپقانداردىڭ ەسىمىن ماڭگىلىك ەتۋگە ارنالعان شارالار ءوتىپ كەلەدى.
دەپارتامەنت باستىعى پولكوۆنيك سەرىك تولەۋحانوۆ, شەكارا ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى قالالىق جانە وبلىستىق فيليالدارىنىڭ اتىنان وتستاۆكىدەگى گەنەرال-مايور مارات ماجيتوۆ باستاعان اۋعاندىق ارداگەرلەردى قاراساي تاۋدانى بويىنشا شەكارا باسقارماسىنىڭ جەكە قۇرامى سالتاناتتى ساپ تۇزەپ قارسى الدى. بۇدان ءارى, جينالعان قاۋىم ەسكەرتكىشگە گۇل شوقتارىن قويعان سوڭ, شارا جات ەلدە قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الۋدان باستالدى.
– شەكاراشىلارىمىز قايدا جۇرسە دە وتانعا ادال قىزمەت ەتۋدىڭ ۇلگىسىن كورسەتىپ كەلەدى. اۋعانستاندا ينتەرناتسيونالدىق بورىشىن وتەۋ كەزىندە ەرەن ەرلىك كورسەتىپ, قۇربان بولعان شەكاراشى قارۋلاستارىمىز – ءبىزدىڭ جۇرەگىمىزدە ماڭگى ساقتالادى, – دەدى جيىندا ءسوز العان اۋعان سوعىسىنىڭ ارداگەرى مارات ءالىمجان ۇلى.
جيىننان كەيىن ارداگەرلەر شەكارا باسقارماسىنىڭ وتكەن شاعىن كونتسەرتتىك باعدارلامانى تاماشالادى. مۇندا زال تولى كورەرمەندەردىڭ الدىندا سەرجانت داستان سەمباەۆپەن بىرگە تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى: ۇلان اسكەر, قۇزار قۇمىروللا, ەرسۇلتان اسەت ۇلى, الديار ءجۇزباي ۇلى جانە جومارت راحىمبەردىلەر ونەر كورسەتتى. اسىرەسە, شەكاراشى ونەرپاز داستان سەمباەۆتىڭ «اۋعان جىرى» اتتى اۋعان سوعىسىنا 18 جاسىندا تۋعان جەرىنە قارا تابىتپەن ورالعان ورىمدەي جاس جىگىتتەر تۋرالى ءانى جان تەبىرەنتەرلىك ەدى... جىگەردى جانيتىن.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى.