قايراتكەر مەرەيتويى: الاڭ مەن ءۇمىت

مەرەيتوي الۋان ءتۇرلى قيسىن­مەن قانىقتىرىلىپ, تاقىرىپ­تىق باعىت­تار­دىڭ كوركىن اشا­تىنداي, حالىقتىڭ ءتالىم-تاربيەلىك قاجە­تىن وتەرلىكتەي سارىن­مەن ساپالى وتكىزىل­مەك­شى. ونىڭ شەڭ­بەرىندە رەسپۋبليكالىق دەڭ­گەيدە فورۋم, اقىندار ايتىسى, جىر-تەر­مە ورىنداۋشىلار بايقاۋى, گالا-كونتسەرت, اقىندار ءمۇشايراسى, م.دۋلات ۇلىنىڭ ءومىر جولى مەن شىعارماشىلىعىن قام­تيتىن تەاترلاندىرىلعان قويىلىم جوس­پارلانعان. سونىمەن قاتار مىرجاقىپ­تىڭ ۇزەڭگىلەس سەرىگى, اۋىلداس-قۇرداسى, الاشوردا ۇكىمەتى مۇشەلىگىنە كاندي­دات, ادىلەت حالىق كوميسسارياتىنىڭ ءبو­لىم مەڭگەرۋشىسى, زاڭعار زاڭگەر سەيدازىم قادىرباەۆتىڭ 140 جىلدىق مەرەي جاسى دا وسى تويمەن ورايلاستىرىلىپ, ءارتۇرلى تانىمدىق دەڭگەيدە اتالىپ وتىلەتىنى مالىمدەلدى.

ءساتىن سالسا, ىلكىمدى جاڭالىقتار توبەسى كورىنىپ تۇرعانداي ەكەن. قوستاناي قالا­سىندا م.دۋلات ۇلىنا ەسكەرتكىش ورناتۋ تۇرعىسىندا مادەنيەت جانە اقپارات مينيسترلىگىنە ۇسىنىس ەنگىزىلىپتى. ­بۇل ماقۇلدانىپ جاتسا, قوستاناي قالا­سى­نىڭ اكىمدىگى ءوز تاراپىنان ۇيىمداس­تى­رۋ جۇمىس­تارىن باستاۋعا ءازىر وتىرعان كورىنەدى.

سونداي-اق ۇلت قايراتكەرى سەيدازىم قادىر­باەۆتىڭ ەسىمىن قوستاناي قالاسىن­داعى كوشە مەن مەكتەپكە بەرۋ تۋرالى ۇسىنىستار جاسالىپ, ول ەلىمىزدەگى ونوماس­تيكا سالاسىن رەتتەيتىن زاڭدارعا سايكەس جۇزەگە اسىرىلماقشى.

م.دۋلات ۇلى تويىنىڭ قارساڭىندا اتقارىلاتىن ءبىراز شارۋالار لەگى شەشى­مىن كۇتىپ تۇرعانى بەلگىلى. ەندى سولار­دىڭ ەڭ ماڭىزدىلارىن تارقاتىپ كورەلىك. ارينە, مۇندايدا جولعا قاتىستى دەندەپ, دالدەپ ايتۋعا تۋرا كەلەدى. بۇل تۇرعىسىن­­دا «Egemen Qazaqstan» گازەتىندە جاريا­لان­عان (27.06.2024) «قىزبەلگە قاشان اسفالت جول توسەلەدى؟» دەگەن ماقا­لادا ناقتى ۇسى­نىستار ايتىلىپ, بايىپتى جازىلعان ەدى. سودان ناتيجە شىعارعان وبلىس اكىم­دىگى ەداۋىر ءىستىڭ باسىن قايىردى. اتاپ ايت­قان­دا, اۋداندىق ماڭىزى بار «توقاناي – ­ساعا – التىنسارين» اۆتوموبيل جولىنىڭ ­­34–49 (شق) شاقىرىمدار تەلىمىنە سۋ وتكىز­گىش قۇبىرلاردى قالپىنا كەلتىرۋمەن جانە قولدانىستاعى جول ماتەريالدارى­نا جاڭا قيىرشىق تاس قوسۋ ادىسىمەن ورتاشا جون­دەۋ جۇرگىزىلىپ, تولىعىمەن اياقتالدى. بۇل نىساننىڭ جالپى قۇنى 489,1 ملن تەڭگەنى قۇرادى. وسى اتالعان اۆتوموبيل جولى­نىڭ قالعان 15-34, 0-15 (34 شق) شاقىرىم­دار تەلىمدەرىن جوعارىداعى ادىسپەن ورتاشا جوندەۋ جۇمىستارى بيىل اياقتالماق. قازىرگى تاڭدا بۇل ايماقتاردا ۆەدومستۆولىق ساراپتامانىڭ وڭ ناتيجەسىمەن تەحنيكالىق قۇجاتتاما ازىرلەنىپ تە قويىلدى.

ءبىر دىلگىر جاعداي قىزبەلدەن مىر­جاقىپتىڭ كەسەنەسى مەن مۇراجايى ورنا­لاسقان بيدايىققا قاتىناۋدىڭ قيىن­دىعىنان تۋىنداپ جاتاتىن ەدى. ەرتەڭ توي كەزىندە جولاۋشىلار الدىمەن وسى ەكى ارالىقتا جوڭكىلەدى. وسى جاعى ەسكەرىلىپ, 37 شاقىرىم اۆتوموبيل جولىنداعى ەكى تەلىمدە جول توسەمدەرىن, سەگىز تەلىمدە قولدانىستاعى سۋ وتكىزگىش قۇبىرلارىن قالپىنا كەلتىرۋ جۇمىسى بىلتىر باستالىپ, وبلىستىق بيۋدجەت ەسەبىنەن 52,9 ملن تەڭگەنىڭ جۇمىستارى اتقارىلعان بولاتىن. ءسويتىپ, جۇمىس كولەمىنىڭ 38 پايىزى ورىندالعان ەدى. قالعانى بيىلعى جىلدىڭ ەنشىسىندەگى مىندەتتەر.

قىزبەل, بيدايىق اۋىلدارىن كورىك­تەندىرۋ جۇمىستارى بىلتىر باستال­عان­دىقتان, ەداۋىر جەتىستىككە قول جەتكىزىلدى. الدىڭعىسىندا 11 088,0 مىڭ تەڭگەگە اعاش تاقتايشا قادالاردان «ەۋرو» قورشاۋ­لار ورناتىلىپ, 31,1 ملن تەڭگەگە ابات­تاندىرۋ (اسفالتتى اياقجول, تاس توسە­نىش) جۇمىستارى تولىعىمەن جۇرگىزىلدى. وسى قوس ەلدى مەكەندە بۇزىلعان ۇيلەر­دىڭ ورنى تازالانىپ, باسقا دا سانيتار­لىق تازالىققا باسا كوڭىل ءبولىندى. ايتسە دە اباتتاندىرۋدىڭ وزگە دە سالالارىن مۇقيات ساپالاستىرۋ كۇن تارتىبىنەن تۇس­پەگەنى ابزال. قوناقۇي جۇيەسى دامى­ماعان, ءالى كەمشىن ەكەندىگى ايان. وسى جاعىن ەرتەباستان ويلاستىرىپ, كەلگەن مەي­مانداردىڭ جايلى ورنالاسۋىن تياناقتاپ قويعان ءجون-اۋ.

باياعىدا وسى اۋىلدىڭ كەلىنى, وپەرا ءانشىسى روزا جامانوۆا (قىزبەلدىك ءانشى باقىت كوشمۇحامبەتوۆتىڭ زايىبى), ت.ب. ءان سالعان كلۋب كۇردەلى جونەۋدەن وتكىزىلگەن ەدى, ەندى ونىڭ ءبىر قاپتالداس بولمەسى­نە ورنالاستىرىلعان كىتاپحانا قورىن تولىقتىرۋ ماڭىزدى مىندەت بولماق. وندا باسقا ادەبيەتتەرمەن قاتار مىرجاقىپتىڭ شىعارمالارى دا تولىعىمەن قامتىلسا, نۇر ۇستىنە نۇر. وقۋمەن ويانۋدىڭ جارقىن نىشاندارى سوندا عانا ساۋلەلەنە تۇسەر ەدى-اۋ. بۇگىنگى تاڭدا وبلىستا 336 كىتاپحانا بار, سولار ارقىلى دا ءبىراز ناسيحاتتىق جۇمىستار اتقارۋعا مۇمكىندىك بار.

قوستاناي وبلىسىندا مىرجاقىپ دۋلات­­­ ۇلى اتىندا ەكى مەكتەپ بار. ءبىرىن­شىسى – رۋدنىي قالاسىندا, جوبالىق قۋا­تى 600 ورىن. ناقتى وقۋشى سانى 1063. ەكىن­شىسى – قىزبەل (ساعا) اۋىلىندا, جوبا­لىق قۋاتى 230 ورىن, بۇگىن دە 110 بالا وقي­دى. بۇل م.دۋلات ۇلى اتىنداعى جال­­پى ءبىلىم بەرەتىن مەكتەبىنە كەشەندى جون­دەۋ جۇمىستارىن جۇرگىزۋ 2025–2027 جىل­­دارعا ارنالعان جۇمىس جوسپارىنا ەنگى­­زىلىپ قويىلعان. ياعني وسى مەكتەپتە اعىم­داعى جوندەۋ جۇمىستارىمەن قاتار تەحنولوگيالىق جابدىقتار مەن جيھاز­دارىن جاڭعىرتۋ 2027 جىلعا بەلگىلەنگەن. مۇنداعى مىرجاقىپ مۇراجايى ءبىلىم ۇياسىنىڭ 100 جىلدىعى تۇسىندا بىرەر جىل بۇرىن مەكتەپ تۇلەكتەرىنىڭ كۇشىمەن جاڭعىرتىلعان ەدى, بيىل دا قوسىمشا جۇمىس­تار جالعاستىرىلماق.

كەزىندە مىرجاقىپ مۇردەسى قايتا جەرلەنگەن 1992 جىلى بيدايىق اۋلىندا جۇزدەگەن ءتۇتىن, ىرگەسى بەرىك ورتا مەكتەپ بولاتىن. ودان بەرى زامان قىستالاڭىنا تاپ كەلىپ, حالىقتىڭ ۇدەرە كوشۋىنە بايلانىستى بۇل اۋىلدىڭ بۇگىنگى سيقى ادام ايارلىقتاي كۇيگە تۇسكەن. قازىر بيدايىق باستاۋىش مەكتەبىندە 8 بالا عانا ءبىلىم الىپ جاتىر. دەگەنمەن مەكتەپتىڭ بۇل كونتينگەنتى ءبىلىم جانە عىلىم ءمينيسترى­نىڭ 2022 جىلعى 6 مامىرداعى №185 «حالىق­تىڭ تىعىزدىعىنا جانە ەلدى مەكەندەر­دىڭ قاشىقتىعىنا قاراي ءبىلىم بەرۋ ۇيىم­دارى جەلىسىنىڭ كەپىلدىك بەرىلگەن مەملەكەت­تىك ءنورماتيۆىن بەكىتۋ تۋرالى» بۇيرىعى­نا سايكەس كەلەدى ەكەن. دەمەك, قاشاننان بەرى الاڭكوڭىل قىلىپ جۇرگەن بيدايىق باس­تا­ۋىش مەكتەبىنىڭ جابىلۋىنا ەشقانداي ­نە­گىز جوق. وسىنىڭ ءوزى تاۋبە دەرلىك.

ەندى وسى بيدايىقتاعى م.دۋلات ۇلى­نىڭ كەسەنەسى مەن مۇراجايىنا قاتىستى بىرەر ءسوز. كەسەنەگە وسىدان جەتى جىل بۇرىن دەمەۋشىلەردىڭ جانە تىكەلەي ۇرپاعى باقبەرگەن وتەۋليننىڭ قولداۋىمەن جوندەۋ جۇمىستارى جۇرگىزىلگەن بولاتىن. بىلتىر كەسەنەنىڭ كۇمبەزى جاڭارتىلدى. بىراق ءالى دە ساپاسىن جەتىلدىرە تۇسەتىن تۇستارى بولعاندىقتان, سول جاعىن ەسكەرىپ باقبەر­گەن بيىل دا كەسەنەگە بىرقاتار قالىپتاۋ جۇمىستارىن جالعاستىرىپ جاتىر ەكەن. بۇل ازاماتتىڭ بۇعان دەيىن دە مىرجاقىپ باباسىنا قاتىستى اتقارعان ىستەرى جەتەر­لىك ەدى. ونى بۇكىل جۇرت بىلەدى. مىسالى, مىرجاقىپتىڭ كىندىك قانى تامعان اسقار كۇزدىگىندە (توقاناي-قىزبەل باعىتى) ارنايى بەلگى تاس قويىپ, قىستاۋ-ماكەتى كەڭ قورشالدى. جول-جونەكەي وتكىن­شىلەر ادەيى توقتاپ, ءمىناجات ەتەدى, الاش ارىسى تۋرالى اڭگىمەلەر قوزعايتىن قاس­تەرلى بەكەتكە اينالعانى ورىندى بولدى.

مىرجاقىپ كەسەنەسىنەن تاياق تاس­تام جەردە ونىڭ اتىنداعى شاعىن مۇرا­جاي ەڭسە كوتەرگەن. جاسىراتىنى جوق, اتى عانا بار, زاتى جوق قوراش ورىن كەلۋ­شى­نىڭ كوڭىلىن كونشىتپەيدى. قۇجاتتىق ەكس­­پوناتتارى وتە جۇدەۋ, تاريحي سۋرەت­تەر قا­بىرعاعا جەلىمدەلىپ, قىستا جىلى­تىل­ماي­تىندىقتان جالبىراپ, جالبا-جۇل­باسى شىققان. مىرجاقىپتىڭ قىزى گۇلنار اپايدىڭ ءوز قولىمەن تاپسىرعان كەي­بىر زات­تارى كۇتىمسىزدىكتەن ءب ۇلىنىپ قال­عان. الاش ارى­سىنىڭ ءوز كىتاپتارى, ول تۋرالى دە­رەكتى شىعارمالار اشەيىن ۇيىلە سالعان. مۇرا­جايدىڭ سولقىلداق كىشكەنە, ەنسىز باس­پال­دا­عىمەن قاي جەرى وپىرى­لىپ تۇسەرىنە الاڭداپ جوعارى كوتەرىل­گەن­دە ونداعى رەت­سىز قويىلعان قۇجاتتار, ەلىمىزگە بەلگىلى تۇل­عا­لاردىڭ قولدان سالىنعان پورترەتتەرى تالعامسىزدىقتان تاۋاندى شەگەرىپ تاستايدى ەكەن. وسىنداي كەلەڭسىزدىكتەردى تۇبىرىمەن جويۋ ءۇشىن بۇل مۇراجايعا مەرەيتوي قار­ساڭىن­دا اعىمداعى جوندەۋگە 21,7 ملن تەڭگە, رەەكسپوزيتسيا جاساۋعا 25 ملن تەڭگە ءبولىنىپ, كونكۋرس جاريالاندى. ودان ءارى تىڭعىلىقتى جۇمىستار باستالماق.

ايتەۋىر, توي قارساڭىندا جاعىمدى جاڭالىقتار ەستىلە باستاعانىنا ءدۇيىم جۇرت بەك رازى. بىلتىرعى جىلدىڭ قىر­كۇيەك ايىندا جانكەلدين اۋدانى اكى­مىنىڭ قاۋلىسىنا سايكەس, اتالمىش مۇراجاي «جانكەلدين اۋدانىنىڭ مادەنيەت جانە تىلدەردى دامىتۋ ءبولىمى» مەملەكەتتىك مەكەمەسىنىڭ بالانسىنا بەرىلگەن ەدى. سوعان وراي بيىلعى قاڭتار ايىنان باستاپ مۇراجاي قىزمەتكەرىنە (كۇزەتشى) ەڭبەك­اقى تولەنۋدە. الداعى ۋاقىتتا مۇراجاي قىزمەتكەرلەرىن ۇستاۋ ءۇشىن ەكى بىرلىك شتات بولىنەتىنى دە جاقسىلىقتىڭ نىشانى. ايتپەسە وسى قوس نىسان پاي­دالانۋعا بەرىلگەن وتىز جىل بويى اقىسىز-پۇلسىز كۇزەتشىلىك مىندەتىن قاپىسىز اتقارىپ كەلە جاتقان ناعاشىباي ارال ۇلىنىڭ ەڭبەگىن ەشكىم ەلەمەپ ەدى. وسى اۋىلدان مىرجاقىپ باباسىنىڭ بەيىتى مەن مۇراجايىن قىزعىشتاي قورىپ, ەشقايدا تابان اۋدارماي وتىرعان بۇل ازاماتتىڭ: «مەن مىرجاقىپتىڭ ەتجاقىن ۇرپاعىمىن, يەن دالاعا قاراۋسىز قالاي تاستاپ كەتەم مەملەكەتتىك ماڭىزى بار نىسانداردى, ۇلتى ءۇشىن باسىن اجالعا تىككەن ارىسىمنىڭ رۋحى ءۇشىن بۇل ەڭبەگىمدى ساتپايمىن», دەگەنى­نەن مول سىر ۇعۋعا بولاتىن سەكىلدى عوي. ءيا, ەڭبەك ەلەنۋى تيىستىگىنە ەندى كوزىمىز انىق جەتىپ وتىرعان سىڭايلى.

مەرەيتوي اياسىندا بۇرىننان ايتىلىپ, قوردالانىپ قالعانىمەن, شەشىمى ۇزىن ارقاۋ, كەڭ تۇساۋعا سالىنعان كوپ­تەگەن كوكەيكەستى ماسەلەنىڭ دە ءيى قان­عانداي بولىپ, كوڭىل دەمدەتە باس­تاعانى, ارينە, ءۇمىت ۇيالاتادى. وسىعان قاتىستى بىرەر ناقتى تۇجىرىم جاساپ كورەلىك. ماسەلەن, بىلتىر جىل سوڭىندا ى.التىنسارين اتىن­داعى ارقالىق پەداگوگيكا ينستيتۋتىنىڭ عىلىمي كەڭە­سىنىڭ كەڭەيتىلگەن وتىرىسىندا جوو مارتەبەسىن وزگەرتۋ تۋرالى ماسەلە قارال­دى. ينستيتۋتتىڭ عىلىمي كەڭەسىنىڭ حات­تامالىق شەشىمى نەگىزىندە عىلىم جانە جوعارى ءبىلىم ءمينيسترىنىڭ اتىنا وقۋ ورنىن قايتا اتاۋ تۋرالى ءوتىنىش جولداندى. بۇگىندەرى بۇل ماسەلەگە تۇسىنىستىكپەن قاراعان مينيسترلىكتىڭ ۇكىمەتكە ارنايى قۇجات دايىنداپ جاتقانى بەلگىلى بولدى. بۇل ينستيتۋتقا ۋنيۆەرسيتەت مارتەبەسى بەرىلە قالسا, ارقالىق قالاسىنا بىلىمگە قۇشتار جاستار لەگى تىپتەن ارتاتىنىنا, ءبىلىم ساپاسىنىڭ بۇرىنعىدان دا جوعارىلاي تۇسەتىنىنە سەنىم مولاياتىنى انىق. ءسوز رەتىندە ايتا كەتەيىك, مەرەيتوي قارساڭىندا وسى ينستيتۋتتان م.دۋلات ۇلى اتىنداعى وقۋ زالى جابدىقتالۋدا, تاياۋ ۋاقىتتا اشىلۋ ءراسىمى وتپەك.

پرەزيدەنت ق.ك.توقاەۆ قوستانايعا جاساعان بىلتىرعى ساپارىندا م.دۋلات ۇلى مەرەيتويىنىڭ ءىس-شارالارىنا قاتىسۋ ءۇشىن ارقالىق قالاسىنا باراتىنىن اشىق مالىمدەگەن سوڭ, بۇل شاھاردا وزىن­دىك دايىندىققا قاتتى ءمان بەرىلىپ, ينفرا­قۇرىلىمىن جاقسارتۋدى مىقتاپ قولعا الا باستاعان سەكىلدى. قازىر وبلىستىق بيۋدجەت قارجىسى (1 203,0 ملن تەڭگە) ەسەبىنەن وسىنداعى «گورنياك» مادەنيەت سارايى كۇردەلى جوندەۋدەن وتكىزىلۋدە. قانشاما جىلدان بەرى ابدەن توزىپ, ەسىگىنەن حالىق سىعالامايتىن كۇيگە تۇسكەن ەدى.

مىرجاقىپتىڭ كىندىك قانى تامعان قىزبەل اۋىلى تۇرعىندارىنىڭ دا كوپتەن بەرى ءتۇرلى ينستانتسيالارعا شاعىمدا­نىپ, تۇپكىلىكتى شەشىلمەي جۇرگەن ءبىر ماسەلەسى وسى ايماقتى دا قامتيتىن «التىن دالا» مەملەكەتتىك تابيعي رەزەر­ۆاتىنا» قاتىستى ەدى. بىلايشا ايت­قاندا, بۇل رەزەرۆات ايماعىنا كىرەتىن سارىقوپا جەر تەلىمىنىڭ, ونىڭ قورىقتىق, شابىندىق, جايىلىمدىق جەرلەرىن اۋىل تۇرعىندارى ءوز قاجەتىنە پايدالانا الماي, مال باعۋى قيىنداپ, جەمشوپ قورىن دايىنداۋدا كەدەرگىلەرگە تاپ بولىپ جۇرگەن. ەندى بۇل جاعداي وڭالاتىن ءتۇرى بار, رەزەرۆات اكىمشىلىگىنىڭ تالابىنا سايكەس ءتيىستى اقىسىن تولەپ, شابىندىق پەن جايىلىمدىق جەر تەلىم­دەرىن پاي­دالانۋعا بولادى.

اۋىلىنا قاراپ ادامدارىن تانيتىن قاعيداعا سۇيەنسەك, قىزبەلدەن ءبىلىم الىپ, ونەر مەن مادەنيەتتىڭ, عىلىمنىڭ الىس قيانىنا قاناتتانعان, ەسىم-سويلارى ءتىپتى الەمدىك دەڭگەيدە زور قۇرمەت­پەن اتالاتىن تۋعان جەر تۇلەكتەرى بارشى­لىق. قازاقستاندا فيزيكا پلازماسىنىڭ مەك­تەبىن قالىپتاستىرىپ, دۇنيەجۇزىلىك فورمۋلا يەسى اتانعان ايگىلى عالىم, اكادەميك فازىلحان بايىمبەتوۆ, ەگەمەن ەلىمىزدىڭ ەكونوميكالىق الەۋەتىن ەسەلەپ ارتتىرۋعا ۇلەس قوسقان اعايىندى اكادەميكتەر سايلاۋ, ءسابيت بايزاقوۆتار, مەملەكەتىمىزدىڭ سۋ شارۋاشىلىعىن دامىتۋدا ەرەسەن ەڭبەكتەنىپ جۇرگەن, وسى سالانىڭ بۇرىنعى ءمينيسترى ناريمان قىپشاقباەۆ, ءتىپتى ارىدەن قوزعاساق, قازمۋ رەكتورى بولعان, مەملەكەت جانە قوعام قايراتكەرى اسقار زاكارين, جام­بىل وبلىسىن باسقارعان مۇقاتاي جۇر­مۇحامەدوۆ – ۇلت ماقتانىشتارى! ال وسى اۋىلدان تۇلەپ ۇشىپ, مىرجاقىپپەن ۇزەڭگىلەس ءجۇرىپ, الاش يدەياسىن جۇزەگە اسىرۋعا بەلسەنە ارالاسقان زاڭعار زاڭ­گەر سەيدازىم قادىرباەۆ پەن اۋىل مۇعا­لىمى, اۋدارماشى, جوعارى ينتەللەكت يەسى الماعامبەت قاسىموۆتىڭ بۇگىنگى تاۋەلسىزدىك ءۇشىن كۇرەسكەن ەرلىگى ۇرپاق جادىنان ۇمىتىلماۋعا ءتيىس دەپ ويلايمىز. بۇل قاستەرلى تۇلعالاردىڭ ارقاي­سىسى ۇلتىمىزعا قىزمەت ەتۋدىڭ جارقىن ۇلگىسى رەتىندە رۋحاني شامشىراق بولىپ ەسەپتەلەتىنى اقيقات. مىنە, وسىنداي ەلىم دەگەن ەرلەردىڭ ەسىمدەرىن مىرجاقىپ مەرەي­تويىنىڭ اياسىندا ۇلىقتاۋعا دا ءتيىستى كوڭىل ءبولىنىپ جاتسا قۇبا-قۇپ.

تاعدىر قىستالاڭىمەن اۋىر كەساپات­تى باسىنان وتكەرگەن مىرجاقىپ سوناۋ الىس كارەليانىڭ سوسنوۆەتس ستانساسىنداعى جازالاۋ لاگەرىندە 1935 جىلدىڭ 4 قازا­نىندا كوز جۇمعانعا دەيىن «جازا كور توپى­راقتى ەلدەن, اللا!» دەپ وسى قىز­بەل اۋىلىن كوزىنەن بۇل-بۇل ۇشتىرا ساعىنىپ سارعايعان ەكەن... ۇزدىگە, ەمىرەنە ەگىلگەن قايران جۇرەك اڭسارى پەرىشتەنىڭ قۇلاعىنا شالىنعانداي بولىپ, جات جەردە جەرلەنگەن قابىرىنەن 57 جىلدان سوڭ قايتا الىنىپ, جامباسى تۋعان جەرىنىڭ ءوزى ارمانداعان قاسيەتتى توپىراعىنا ­تيگەن ەدى...

سول مىرجاقىپ وسى مەرەيتويىندا قازاعىن, ەلىن ويانۋدان – ويلانۋعا ۇندە­گەندەي بولىپ ءبىر قىزبەل, بيدايى­عىنان عانا ەمەس, بارشا تۇرىك ەلدەرى تورىنەن رۋحاني الداسپانىن جارقىلداتا ويناتىپ جاتقانداي ەلەس بەرەتىنى – قانداي تىلسىم كۇش, عاجايىپ مەزەت! ءسوز ورايى كەلگەندە استانادان «مىرجاقىپتانۋ مادەني ورتالىعى» اشىلىپ جاتسا دەگەن حالىق تىلەگىن بيلىككە جەتكىزگىمىز كەلەدى, ورىندالا قالسا, قانداي عانيبەت دەسەڭىزشى.

مىنە, مەرەيتويدا وسى تاقىلەتتەس, باسقا دا ماسەلەلەردىڭ وڭتايلى شەشىلۋىنە جابىلا جاۋاپ ىزدەپ كورەلىك. ءسات تۋدى.

قايسار ءالىم,

قازاقستان جۋرناليستەر وداعى م.دۋلات ۇلى اتىنداعى سىيلىقتىڭ لاۋرەاتى