«بوزوق» مەملەكەتتىك تاريحي-مادەني مۋزەي-قورىعىندا ء«اليحان مەن ايگەرىمنىڭ ساياحاتى» تاريحي كوميكسىنىڭ العاشقى شىعارىلىمى تانىستىرىلدى. ءىس-شاراعا زيالى قاۋىم, عىلىمي قوعامداستىق وكىلدەرى, ەلوردانىڭ جالپى ءبىلىم بەرەتىن مەكتەپتەرىنىڭ پەداگوگتەرى قاتىستى.
ۇكىمەت قاۋلىسىمەن بەكىتىلگەن قازاقستان رەسپۋبليكاسىنىڭ مادەني ساياساتىنىڭ 2023–2029 جىلدارعا ارنالعان تۇجىرىمداماسىنا سايكەس, ادەبيەت وقۋعا جانە ناسيحاتتاۋعا بالالار مەن جاسوسپىرىمدەردى تارتۋ بويىنشا قازاق باتىرلارى, تاريحي وقيعالار, ميفولوگيا جانە وزەكتى ترەندتەر تاقىرىبىندا ۇلتتىق سيپاتى بار بالالار كوميكستەرىن جاساۋ جۇرگىزىلىپ جاتىر.
حالىقارالىق تاجىريبە نەگىزىندە «بوزوق» مۋزەي-قورىعى جاس وقىرماندارعا ارناپ كىتاپ شىعاردى. كوميكس ءماتىنى قازاق, ورىس جانە اعىلشىن تىلدەرىندە باسىلدى. كوميكستەردى سالعان سۋرەتشى, «بوزوق» مۋزەي-قورىعىنىڭ ديزاينەرى – بەكەن جاپاروۆ. كىتاپتىڭ نەگىزگى سيۋجەتتىك يدەياسى ورتاعاسىرلىق بوزوق قالاشىعىنىڭ ارحەولوگيالىق قازبالارىنىڭ تاريحي مالىمەتتەرىنە نەگىزدەلگەن.
ءىس-شارا اياسىندا قاتىسۋشىلار وسكەلەڭ ۇرپاقتىڭ تاريحي ساناسىن قالىپتاستىرۋداعى بالالار ادەبيەتىنىڭ ماڭىزىن, تاريحي-مادەني مۇرانى ناسيحاتتاۋ, بالالارعا ءبىلىم بەرۋدەگى جوبالاردى دامىتۋ جولدارىن تالقىلادى.