قازاقتىڭ كورنەكتى قالامگەرى مۇقاعالي ماقاتاەۆتىڭ تۋعان كۇنىنە وراي قازاقستان راديو ارنالارىنىڭ ەفيرىندە اقىننىڭ «ماحابباتىم وزىمدە» ولەڭىنە جازىلعان ءاننىڭ تۇساۋكەسەرى ءوتتى, دەپ جازادى Egemen.kz اقپارات اگەنتتىگى.
ءاننىڭ مۋزىكاسىن كومپوزيتور قادىلبەك جاعىپاروۆ جازسا, ونى تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى, جاس كورەرمەن مۋزىكالىق تەاترىنىڭ اكتريساسى ماقپال دۇيسەن ورىندادى.
مۋزىكالىق تۋىندىنىڭ جارىققا شىعۋىنا قازاقستان رەسپۋبليكاسىنىڭ مادەنيەت جانە اقپارات مينيسترلىگى قولداۋ كورسەتتى.
ءاننىڭ پرەمەراسى «Qazaq Radiosy» جانە «Shalqar Radiosy» راديوستانتسيالارىنىڭ ەفيرىندە ورىندالدى.
ايتا كەتەيىك, بيىل مۇقاعالي ماقاتاەۆتىڭ تۋعانىنا 94 جىل تولىپ وتىر.