ءتىل ءبىلۋدىڭ پايداسى ۇشان-تەڭىز. عىلىم دالەلدەگەن, زەرتتەۋلەر كورسەتكەن ايعاقتى ارتىقشىلىقتارىن شىپ-شىرعاسىمەن تۇگەندەۋگە كىرىسسەك, ەسەبىنە جەتىپ بولمايمىز. بىراق ءتىل سىندىرۋ – وڭاي ەمەس. قانشاما ادام اعىلشىن ءتىلىن تالاي رەت قۇرساۋعا الىپ, باعىنىشقا تۇسىرۋگە تىرىسقانىمەن, الىنباس قامالدان اسا المايتىنىن ءتۇسىنىپ, ءبىرجولا قول سىلتەگەن بولۋى دا مۇمكىن. ال 17 جاستاعى سايا قىدىرالى حالىقارالىق «IELTS» ەمتيحانىن 20 مارتە تاپسىرىپ, ناتيجەسىندە ەڭ جوعارى 9 بالعا قول جەتكىزدى. بۇل – الەمدىك رەكورد.
«قاتارىڭنىڭ الدى بول» دەيدى باتالى سوزدە. تالاپ, تالانتىمەن كوپتى ءتانتى ەتكەن سايا قازىر قاتارلاستارىن باسىپ وزىپ, ۇلكەندەردىڭ وزىنە ۇلگى بولىپ ءجۇر. العىر قىز اعىلشىن ءتىلىن تەز ۇيرەنۋدىڭ تەتىكتەرىن التى جاسىندا مەڭگەرىپ, نەبارى توعىز جاسىندا وزگەلەرگە شەت ءتىلىن ۇيرەتە باستاعان. ال ون ءتورت جاسىندا ول ەكى بىردەي وقۋ ورتالىعىن اشقان.
«بيىل 11-سىنىپتى ءتامامدايمىن. ودان سوڭ بىردەن وقۋعا تۇسپەيمىن. ءبىر-ەكى جىل ءوزىمدى تانىپ, باعىتىمدى ايقىنداعىم كەلەدى. ارينە, جوعارى ءبىلىم الامىن. بىراق اسىعىستىق تانىتۋدىڭ قاجەتى جوق. بولاشاقتا الەمنىڭ بىرنەشە مەملەكەتىندە ءوز مەكتەبىمدى اشۋ جوسپاردا بار. ال «IELTS» ەمتيحانى تۋرالى ايتاتىن بولساق, ادامنىڭ قابىلەتى مەن مۇمكىندىگى عالامات. تەك ءوز بويىنداعى سول بولەكشە قاسيەتتى دۇرىس جۇيە ارقىلى ۇدايى جەتىلدىرە ءبىلۋ كەرەك. 14 جاسىما دەيىن ۇيالى تەلەفون قولدانبايتىنمىن. زەيىنىم تەك وقۋدا بولدى. اباي اتامىز وتىز سەگىزىنشى قاراسوزىندە «عىلىم-ءبىلىمدى اۋەل باستان بالا ءوزى ىزدەنىپ تاپپايدى. باسىندا زورلىقپەنەن ياكي الداۋمەنەن ءۇيىر قىلۋ كەرەك, ۇيرەنە كەلە ءوزى ىزدەگەندەي بولعانشا» دەيدى عوي. سوندىقتان شەت تىلىنە قىزىعۋشىلىعىمدى وياتقان اناما العىس ايتقىم كەلەدى», دەيدى سايا قىدىرالى.
ستاتيستيكاعا سۇيەنسەك, جىل سايىن 3,5 ميلليوننان استام ادام «IELTS» ەمتيحانىن تاپسىرادى. ال ەڭ جوعارى 9 بالعا ۇمىتكەرلەردىڭ نەبارى 0,5 پايىزى عانا قول جەتكىزە الادى. سوندىقتان سايانىڭ بۇل جەتىستىگى راسىمەن تاڭداي قاقتىرارلىق. ۇيرەنۋدەن جالىقپايتىن, ۇيرەتۋدەن ايانبايتىن جانعا تەك ءسات-ساپار تىلەيمىز.