الماتى قالاسىنىڭ 30 جاستاعى تۇرعىنىنا ارنالعان سالەمدەمەدەن ەسىرتكى تابىلعان. قالالىق پوليتسيا قىلمىستىق سالەمدەمەنى مكد ارىپتەستەرى مەن پوشتانىڭ قاۋىپسىزدىك قىزمەتى قىزمەتكەرلەرىنىڭ كومەگىمەن انىقتاعان, دەپ حابارلايدى Egemen.kz.
ءىىم مالىمەتىنشە, جەرگىلىكتى تۇرعىنعا اقش-تان ماريحۋانا مەن ەسىرتكىسى بار مارمەلاد سالىنعان سالەمدەمە كەلگەن. سونىمەن قاتار كۇدىكتىنىڭ تۇرعىلىقتى جەرىن ءتىنتۋ بارىسىندا جاسىل ءتۇستى, ەرەكشە ءيىسى بار, وسىمدىك تەكتەس زات سالىنعان 27 قاپتاما تابىلىپ, تاركىلەنگەن.
«سوت-حيميالىق ساراپتاما تاعايىندالدى. جەدەل ءىس-شارالار بارىسىندا كۇدىكتىنىڭ قىلمىستىق سالەمدەمەنى قانداي ماقساتپەن العانى جانە قالامىزدى ەسىرتكىمەن قامتاماسىز ەتۋ ارناسى انىقتالاتىن بولادى. اتالعان دەرەك بويىنشا قىلمىستىق ءىس قوزعالدى. قر قك-ءنىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. قر كونستيتۋتسياسىنىڭ 77-بابى 3-ءبولىمى 1-تارماعى, قر قك-ءنىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى», دەلىنگەن حابارلامادا.
ايتا كەتەيىك, بۇعان دەيىن الماتى وبلىسىنىڭ تۇرعىنى Telegram مەسسەندجەرىن پايدالانىپ, تايلاندتان ەسىرتكىگە تاپسىرىس بەرگەنى ءۇشىن 16 جىلعا باس بوستاندىعىنان ايىرىلعان ەدى.