مەملەكەت باسشىسى ۇكىمەتتىڭ كەڭەيتىلگەن وتىرىسىندا لوگيستيكا ماسەلەسىنە دە كوڭىل اۋدارعانى بەلگىلى. پرەزيدەنتتىڭ پىكىرىنشە باستى ارتىقشىلىعىمىز دەپ اۋىز تولتىرىپ ايتۋعا بولاتىن ترانزيت باعىتىن تولىق ءارى ءتيىمدى پايدالانۋىمىز كەرەك. ارينە, بۇل رەتتەگى العىشارت – جولداردى تەز ءارى ساپالى سالۋ. بۇل باعىتتا اتقارىلعان ءىس از ەمەس. ەندەشە سولارعا از-كەم شولۋ جاساپ كورەيىك.
قازىرگە دەيىن 7 مىڭ كم جولدىڭ قۇرىلىسى اياقتالدى. قاراعاندى – الماتى, تالدىقورعان – وسكەمەن, اقتوبە – قاندىاعاش جانە اتىراۋ – استراحان كۇرە جولدارىندا قۇرىلىس جۇمىسى ءبىتتى. ءۇش ءىرى ينفراقۇرىلىمدىق جوبا جۇزەگە اسىرىلدى – بۇقتىرما سۋ قويماسى ارقىلى وتەتىن كوپىر (شىعىس قازاقستان), شاقپاق اتا اسۋىنداعى قوس جولدى تۋننەل (تۇركىستان وبلىسى), شامالعان ستانساسىنداعى تەمىرجول وتكەلى (الماتى وبلىسى). بۇل جوبالار كولىك وتكىزۋ قابىلەتىن ەسەلەپ ارتتىرىپ, لوگيستيكالىق قىزمەت ساپاسىنىڭ جاقسارا تۇسۋىنە ىقپال ەتەدى. بۇقتىرماداعى كوپىر 7 اۋداندى بايلانىستىرسا, شاقپاق اتاداعى تۋننەل قولايسىز اۋا رايىنا قاراماستان, ۇزدىكسىز ءارى قاۋىپسىز كولىك قوزعالىسىن قامتاماسىز ەتەدى. جوبا – «باتىس ەۋروپا-باتىس قىتاي» حالىقارالىق كولىك ءدالىزىنىڭ ءبىر بولىگى. ال ۇزىندىعى 6 كم بولاتىن شامالعان ستانساسىنداعى تەمىرجول وتكەلى كولىكتەردىڭ قاۋىپسىز وتۋىنە جاعداي جاسايدى.
ەلدەگى كولىك-لوگيستيكالىق قىزمەتتى ءارتاراپتاندىرۋ ماقساتىمەن جالپى ۇزىندىعى 1 100 كم بولاتىن 3 ءىرى تەمىرجول قۇرىلىسى جۇزەگە اسىرىلىپ جاتىر. ولار – «دوستىق-مويىنتى», «الماتى اينالما تەمىر جولى», «داربازا-ماقتاارال» ماگيسترالى. جوبالاردى جۇزەگە اسىرۋ وتاندىق ءونىمنىڭ ۇزدىكسىز ەكسپورتىن كەڭەيتۋگە جول اشىپ, ترانزيتتىك الەۋەتتى بەكەمدەي تۇسەدى.
سۋرەتتى تۇسىرگەن – ەرلان ومار, «EQ»
وتاندىق تەمىرجول كولىگى – ترانزيتتىك الەۋەتتى دامىتۋدىڭ كوشباسشىسى. بىلتىر ەل اۋماعى ارقىلى ترانزيتپەن 400 مىڭ جفە (20 فۋندتىق ەكۆيۆالەنت) كونتەينەرلەرى تاسىمالداندى. ەلىمىزدىڭ قىتايداعى لوگيستيكالىق تەرمينالىنىڭ كومەگىمەن قىتاي-ەۋروپا باعىتىندا تاسىمالداۋ كولەمى 28 ەسە ءوستى. سياندا 330-دان اسا كونتەينەرلىك پويىز جونەلتىلدى.
«ترانزيتتىك باعىتتاردى دامىتۋ شارالارى جاقسى ناتيجە بەرىپ جاتىر. ەلىمىز حالىقارالىق جۇك اعىندارىنا جوعارى ساپالى جانە جىلدام قىزمەت كورسەتەتىن جاھاندىق لوگيستيكالىق جۇيەنىڭ نەگىزگى بۋىنىنا اينالدى», دەيدى «KTZ Express» اق باسقارۋشى ديرەكتورى اسەم مۇحامەديەۆا.
قازىر ۇلتتىق كومپانيا كولىك دالىزدەرىن بەلسەندى دامىتىپ, يننوۆاتسيالاردى ەنگىزىپ, قولدانىستاعى مارشرۋتتاردى جەتىلدىرىپ جاتىر. ترانسكاسپي حالىقارالىق كولىك باعىتى ەكسپورت پەن ترانزيتتىك تاسىمال كەلەشەگىنە دەگەن جارقىن ءۇمىتتى وياتتى. سونداي-اق 2024 جىلى باكۋ–سيان باعىتى بويىنشا 12 كۇندىك رەكوردتىق جەتكىزۋ مەرزىمىمەن العاش رەت كونتەينەرلىك پويىز كەرى جونەلتىلدى. ماڭىزدى قاناتقاقتى جوبالار ساناتىندا يران – قازاقستان – قىتاي جانە قىتاي – قازاقستان – وزبەكستان باعىتتارى دا بار. «قورعاس – شىعىس قاقپاسى» قۇرعاق پورتىنىڭ تەرمينالىندا تاسىمالداۋدى ايتارلىقتاي جاقسارتاتىن جانە جۇكتى زاقىمدانۋدان قورعايتىن كولىك قۇرالدارىن كونتەينەرلەۋ قىزمەتىنىڭ ەنگىزىلۋى دە – قۇپتارلىق قۇبىلىس.
الداعى ۋاقىتتا جالپى ۇزىندىعى 4,7 مىڭ شاقىرىم جاڭا جول جوبالارى كەزەڭ-كەزەڭىمەن ىسكە اسىرىلادى. ونىڭ 3,7 مىڭ شاقىرىمى I ساناتتى, ال قالعان 1 مىڭ شاقىرىم II ساناتتى جولدار بولادى. وسى جىلى قۇرىلىسى باستالاتىن جوبالار قاتارىندا «اقتوبە – ۇلعايسىن» (234 شاقىرىم), «قاراعاندى – جەزقازعان» (572 شاقىرىم), «سارىاعاش قالاسىنىڭ اينالما جولى» (102 شاقىرىم), «قىزىلوردا قالاسىنىڭ اينالما جولى» (20 شاقىرىم), «اتىراۋ – دوسسور» (86 شاقىرىم), «رۋدنىي قالاسىنىڭ اينالما جولى» (16,9 شاقىرىم), «جاڭاوزەن – كەندىرلى» (156 شاقىرىم), «پەتروپاۆل قالاسىنىڭ اينالما جولى» (8 شاقىرىم) بار.
بۇل باستامالاردى جۇزەگە اسىرۋ ارقىلى جەرگىلىكتى بيزنەستى ىنتالاندىرىپ, كاسىپورىندار كوكجيەگىن كەڭەيتەدى دەيدى ساراپشىلار. سونىمەن بىرگە كوپجولاقتى جولدار جول-كولىك وقيعالارىنىڭ الدىن الىپ, ولاردى ازايتۋعا دا ىقپالىن تيگىزەدى. ەڭ باستىسى لوگيستيكالىق مۇمكىندىكتەردى ءارتاراپتاندىرۋ ءىسى ىلگەرىلەي تۇسەدى.
بيىل جاڭا جول جوبالارىن ىسكە اسىرۋ اياسىندا 31 مىڭ جۇمىس ورنى اشىلىپ, قوسىمشا ينۆەستيتسيا تارتىلماق.