ءىىم ۇقك-مەن بىرلەسىپ, زاڭسىز اينالىمنان قارۋ-جاراقتى, ونىڭ ىشىندە قاڭتار وقيعاسى كەزىندە ۇرلانعان قارۋدى انىقتاۋ جانە تاركىلەۋ بويىنشا جۇيەلى جۇمىس جۇرگىزىپ جاتىر, دەپ حابارلايدى Egemen.kz Polisia.kz-كە سىلتەمە جاساپ.
ەستەرىڭىزگە سالا كەتەيىك, جاپپاي تارتىپسىزدىك كەزىندە 2960 تابەلدىك جانە ازاماتتىق قارۋ ۇرلانعان بولاتىن.
«بۇل رەتتە سوڭعى ءۇش جىلدا جەدەل ءىس-شارالاردىڭ, ءتىنتۋ جانە رەيدتەردىڭ ناتيجەسىندە 8 مىڭعا جۋىق اتىس جانە تراۆماتيكالىق قارۋ, 831 گراناتا جانە ءتۇرلى كاليبرلى 112 مىڭنان استام وق-دارىلەر تابىلىپ, تاركىلەندى. سونداي-اق قارۋ جاسىرىلعان 722 ورىن تابىلدى. بۇگىنگى تاڭدا قاڭتار وقيعاسى كەزىندە ۇرلانعان 1226 قارۋدىڭ شىعۋ تەگى ناقتى ايقىندالدى. قالعان تاركىلەنگەن 6765 قارۋدىڭ قىلمىسكەرلەر تىركەۋ نومىرلەرىن قاساقانا جويىپ, ءوشىرىپ تاستاعانىنا بايلانىستى قازىرگى ۋاقىتتا ولار بويىنشا ءتيىستى ساراپتامالار تاعايىندالدى, - دەدى دەپارتامەنت باستىعى», دەدى ءىىم رەسمي وكىلى شىڭعىس الەكەشەۆ.
بيىل قاڭتار ايىندا شىمكەنت قالاسىنىڭ شەتىندە زيرات ماڭىنان قارۋ جاسىرىلعان ورىن تابىلىپ, 4 تەگىس ۇڭعىلى مىلتىق پەن ءتۇرلى وق-دارىلەر تاركىلەنگەن. انىقتالعانداي, ولاردىڭ ىشىندە الماتى قالاسىنداعى قارۋ-جاراق دۇكەنىنەن قاڭتار وقيعاسى كەزىندە ۇرلانعان قارۋلار دا بار. سونداي-اق قوستاناي وبلىسىندا بۇرىن سوتتالعان جەرگىلىكتى تۇرعىننىڭ جەرتولەسىنەن 3 كالاشنيكوۆ اۆتوماتى تابىلىپ, تاركىلەندى.
اتالعان بويىنشا قىلمىستىق ءىس قوزعالىپ, كۇدىكتى ۋاقىتشا ۇستاۋ يزولياتورىنا قامالعان.