جاز شىعا سۋ جاعالاۋىن عانا ەمەس, تاڭعاجايىپ تابيعات مەكەنى كاتونقاراعايدى دا بەتكە الاتىن تۋريستەر كوپ بولادى. تاۋ سامالىمەن دەمالىپ, بۇعى مۇيىزىنەن ەم الىپ جاتاتىن جۇرتتىڭ قاتارى جىل سايىن ارتىپ كەلەدى. دەگەنمەن قىركۇيەك تۋا ادام اياعى ساپ تيىلىپ, كاتونقاراعاي ءباز-باياعى قوڭىر تىرلىگىنە كوشەدى. ويتكەنى التايدىڭ جازى قانداي سۇلۋ بولسا, قىسى دا سونداي عاجاپ ەكەنىن بىلايعى جۇرت بىلە بەرمەيدى. بىلسە دە, بۇل جاققا ات تەرلەتىپ باراتىندار سيرەك. سەبەبى قىسى قاتال, تىم ۇزاق...
قىستىڭ قىسقا كۇنىندە قارت التايدىڭ كورىكتى جەرلەرىن ءبىر كۇندە ارالاپ شىعۋ استە مۇمكىن ەمەس. سوندىقتان كەمى ءۇش كۇنگە بارعان ابزال دەسەدى تۋريستىك وپەراتورلار. ولار تاۋ باۋرايىنا ساپار ۇيىمداستىرۋعا دايىن ەكەندەرىن ايتادى. بىراق بارۋعا ق ۇلىق تانىتاتىندار وتە از. ايتپەسە, كىمدە-كىم قىسقى تابيعاتتى كورۋ ءۇشىن التايعا ساپارلايتىن بولسا, تۇراقتايتىن قوناقۇيلەر جازداعىداي ەمەس, تابىلا كەتەدى. اسىرەسە بەرەل اۋىلىنا ات بايلاپ, ارعى جاعىنداعى راحمان قاينارىن, ىرگەسىندەگى بەرەل-قورىق مۋزەيىن قىزىقتاپ قايتۋعا بولادى. راحمان قاينارىنداعى ساناتوريلەر مەملەكەت مەنشىگىنە وتكەنىمەن, بۇگىن-ەرتەڭ قالپىنا كەلتىرىلە قويمايدى. وبلىس اكىمى ەرمەك كوشەرباەۆتىڭ ايتۋىنشا, قازىرگى ۋاقىتتا ينۆەستور ىزدەستىرىلىپ جاتىر.
قازىر تاۋ باۋرايىنداعى, ەتەكتەگى اۋىلداردا تۋريستەر توقتايتىنداي قوناقۇيلەر قىسى-جازى جۇمىس ىستەپ تۇر. اتاپ ايتساق, ورەل اۋىلىنداعى «مۇز تاۋ» ەكو قوناقۇيى, توپقايىڭنىڭ تۇسىنداعى «Qaton-Qaragai Resort and Spa» دەمالىس ورىنى, كوروبيحا اۋىلىنداعى «Sunrise», شىڭعىستايداعى «نەس», سوگىر اۋىلىنداعى «Meloman Travel» كەمپينگى, كاتونقاراعاي اۋىلىنداعى «اتامەكەن», «سۇلتان», «قاراتاي», «بايان» قوناقۇيلەرى قىس ىشىندە دە ساپالى قىزمەت كورسەتۋگە دايىن. كاتونقاراعاي تۋريزم ءبولىمىنىڭ بەرگەن مالىمەتىنە ۇڭىلسەك, دەمالىس بازالارىنىڭ باعاسى اركىمنىڭ سۇرانىسىنا قاراي تاۋلىگىنە 11 000 تەڭگە مەن 50 000 تەڭگە ارالىعىندا.
كاتونقاراعايدىڭ كورىكتى اۋىلدارىنىڭ ءبىرى ءھام بىرەگەيى كوروبيحا اۋىلىندا «Sunrise», «Meloman Travel» قوناقۇيلەرىنىڭ اكىمشىلىگى قوسىمشا تاعى ەكى قوناقۇيدى كەڭەيتۋ جۇمىستارىن جۇرگىزىپ جاتىر. بۇل جاقتىڭ ءبىر ەرەكشەلىگى, كەلگەن تۋريستەر تابيعاتتان بولەك ەسكى ءدىن ۇستانۋشىلاردىڭ دا سالت-داستۇرىمەن تانىسا الادى. جازدىڭ كۇنى ومارتا شارۋاسىنىڭ جۇمىسىن باقىلاپ, جاڭا شايقالعان بالدىڭ ءدامىن تاتسا, قىستا تاڭعاجايىپ ورماندى ارالاپ, ات شانامەن سەرۋەندەۋگە مۇمكىندىك بار. شانا ءمىنىپ, بولماسا شاڭعى بايلاپ, شىرشالى ورماندى ارالاپ كەتە بەرەسىز. ايتقانداي, تىم شالعايداعى, قۋىستاعى مەكەن بولعانىمەن, ۇيالى تەلەفون, ينتەرنەت جەلىسى ۇشىپ تۇر. جالپى, كاتونقاراعاي وڭىرىندەگى بازالاردىڭ باسىم بولىگىندە ينتەرنەتى بولماسا دا, ۇيالى تەلەفون بايلانىسى بار.
باستى ءبىر تۇيتكىل – كاتونقاراعاي وڭىرىنە قاراي باستاپ باراتىن جولدىڭ ناشارلىعى. وسكەمەننەن شىعا بەرە باستالاتىن جاماۋ جولدار الىستان التايدى اڭساپ كەلگەن ساياحاتشىنىڭ مەسەلىن قايتارىپ تاستاۋى ابدەن مۇمكىن. ول از دەسەڭىز, جول بويىنداعى اجەتحانالاردىڭ لاستىعىنا تۋريستىك وپەراتورلار ىڭعايسىزدانامىز دەسەدى.
– ساياحاتشىلاردىڭ كوبى ەلىمىزدىڭ باتىسىنان كەلەدى. سوناۋ جەردەن شارشاپ-شالدىعىپ جەتكەندە كاتونقاراعايعا قارايعى جول دىڭكەلەرىن ودان سايىن قۇرتادى. ءتۋريزمنىڭ تۇرالاپ تۇرعان باستى سەبەبى وسى – جول. ەكىنشىدەن, جارقىراپ تۇرعان اجەتحانالار جوق, – دەيدى تۋروپەراتور دارىن نۇرساپار.
شىندىعىن ايتساق, ءتۋريزمدى دامىتۋعا سۋبسيديا ءبولىنىپ, جولداردى جاماۋعا قارجى قاراستىرىلىپ-اق جاتىر. الايدا ناتيجە كانە؟ وبلىس اكىمى ەرمەك كوشەرباەۆ تا جول بويىنداعى سەرۆيستى جونگە كەلتىرۋ كەرەكتىگىن ايتقان. تۋريزم جانە سپورت ءمينيسترى ەربول مىرزابوسىنوۆ تا سەرۆيستى ارتتىرۋ ماسەلەسىنە جان-جاقتى قولداۋ كورسەتىلىپ جاتىر دەگەن.
– مەملەكەت تاراپىنان تۋريزممەن اينالىسامىن دەگەن ازاماتتارعا قولداۋ بار. ماسەلەن, سۋبسيديالار بەرىلەدى. نەسيە دە قاراستىرىلعان. جول بويىنداعى اجەتحانالاردى جوندەۋگە 87 ملن 300 تەڭگە سۋبسيديا بولىنگەن. جەرگىلىكتى اكىمدىكتەرمەن بىرلەسىپ, تۋريزم سالاسىن دامىتۋ باعىتىندا جۇمىس اتقارىپ جاتىرمىز, – دەدى مينيستر.
جازدىڭ كۇنگى جاعداي كوڭىل كونشىتپەي جاتسا, قىسقى تۋريزم تۋرالى جاق اشۋعا ءالى ەرتە سەكىلدى. سەبەبى تابيعاتتى تاماشالاعاننان باسقا ويىن-ساۋىق ورىندارى جوق.
– كاتونقاراعايعا قىستىڭ كۇنى دە تۋر جاساۋعا بولادى. وكىنىشكە قاراي, كەلۋشىلەر قار باسقان ورمان مەن تاۋلارىن عانا قىزىقتايدى. تۋريستەردى بارىنشا تارتۋ ءۇشىن شاڭعى بازاسىن سالۋ كەرەك. ونىڭ ماڭايىندا باسقا دا ويىن الاڭدارى بولعانى ءجون, – دەيدى تۋريستىك وپەراتور ولجاس توقىشەۆ.
سالىستىرىپ قاراساق, كورشىلەس جاتقان قىتايدىڭ قاناسىندا تۋريست قىسى-جازى تولاستامايدى. جازدىڭ كۇنى كولدى كورۋگە كەلسە, قىستا بەتكەيلەردەن شاڭعى تەبەدى. بىزگە دە سول سەكىلدى شاڭعى تەبەتىن بەتكەيلەردى جابدىقتاپ, تۋريست تارتۋعا بولار ەدى. وعان مەملەكەت تاراپىنان كەڭ كولەمدە قولداۋ كورسەتىلۋى نەمەسە ينۆەستورلار تارتىلۋى ءتيىس. ونسىز كاتونقاراعايداعى قىسقى ءتۋريزمنىڭ قارىشتاپ دامۋى ەكىتالاي.
شىعىس قازاقستان وبلىسى