پرەزيدەنت تاباندىلىق پەن توتەنشە شەشىمدەرگە دايىن بولۋدى تالاپ ەتەتىن الدىمىزدا تۇرعان ايرىقشا مىندەتتەردى اتاپ ءوتتى. سونداي-اق ۇيرەنشىكتى سۇرلەۋمەن جۇرە بەرمەي, جۇيەلى وزگەرىستەر قاجەت ەكەنىنە نازار اۋداردى.
سونىڭ ءبىرى – تىكەلەي ينۆەستيتسيا تارتۋدا تەحنولوگيالار مەن بولاشاقتىڭ رەسۋرستارىنا دەن قويۋ. پرەزيدەنت كۇردەلى جاعداي تۋىنداپ وتىرعانىن جاسىرعان جوق. ويتكەنى تىكەلەي شەتەلدىك ينۆەستيتسيالاردىڭ 36%-عا قۇلدىراۋى – قاۋىپتى قۇبىلىس. دەگەنمەن ەسكى ادىستەرگە سالا بەرمەي, جاڭاشا قادام ۇسىنىلدى. اتاپ ايتقاندا, قازىرگى كۇنى الەمدە ەڭ سۇرانىسقا يە مەتالداردىڭ ءبىرى – ليتي سەكىلدى سيرەك كەزدەسەتىن رەسۋرستارعا باسىمدىق بەرۋ, بيۋروكراتيالىق كەدەرگىلەردى جويىپ, ستراتەگيالىق ينۆەستورلار ءۇشىن ۇدەمەلى جەڭىلدىكتەردى ەنگىزۋ.
شىن مانىندە سيرەك كەزدەسەتىن رەسۋرستار مەن جوعارى تەحنولوگيالىق جوبالارعا دەن قويۋ الەمدىك نارىقتاعى قۋاتتى باسەكەلەستەرمەن ويىن ەكەنى انىق. الايدا زاماناۋي ءارى ارتاراپتاندىرىلعان ەكونوميكا قۇرۋدىڭ ماڭىزدى جولى – سول.
ەكىنشى ماسەلە – تۋريزم جانە كولىك سالاسىن دامىتۋ. بۇل, ارينە, جاڭا يدەيا ەمەس, دەگەنمەن پرەزيدەنت جاي عانا دامۋ ەمەس, سەرپىندى دامۋدى تالاپ ەتىپ وتىر. ەلىمىز ساياحاتشىلار نازارىن اۋداراتىن جاڭا تارتىلىس ايماعىنا اينالۋى ءۇشىن تۋريستىك ينفراقۇرىلىمىمىز حالىقارالىق ستاندارتتارعا ساي بولۋى قاجەت. كولىك سالاسىندا دا مەملەكەت باسشىسى الدىمىزعا ءورشىل جوسپار قويدى: ول – تەمىرجول مەن حالىقارالىق اەروحابتى دامىتۋ ارقىلى ەلىمىزدى ترانزيتتىك حابقا اينالدىرۋ.
ءۇشىنشى ماسەلە – الەۋمەتتىك ساياسات: ەسكى-قۇسقىنى جاماي بەرۋدىڭ قاجەتى جوق. دەنساۋلىق ساقتاۋ سالاسىن رەفورمالاۋ, ءمامس جانە اۋىلدى دامىتۋ – بۇلار احۋالدىڭ جاي عانا بەت-الپەتىن تۇزەۋ ەمەس, جۇيەلى وزگەرىستەردى تالاپ ەتەدى. ءمامس رەفورماسىندا اشىقتىق پەن ادىلدىككە دەن قويىلۋى قاجەت. اۋداندار مەن اۋىلداردا مەديتسينالىق ينفراقۇرىلىمدى جاقسارتۋ كەرەك. بيزنەس پەن ينفراقۇرىلىمدى دامىتۋ ارقىلى اۋىل ەكونوميكاسىن قولداعان ءجون.
البەتتە, ۋاقىتشا شەشىمدەر جولىمەن كەتپەي, ميلليونداعان وتانداسىمىزدىڭ ءومىر ساپاسىن ارتتىرۋعا ىقپال ەتەتىن ۇزاقمەرزىمدى تەتىكتەردى جاساۋ قاجەت.
ءتورتىنشى ماسەلە – ەنەرگەتيكا سالاسىندا اتوم ەنەرگەتيكاسىن دامىتۋ, ايماقتاردى گازداندىرۋ, كومىر ستانسالارىن اۋاعا ۋلى گازدى بارىنشا از بولەتىن تەحنولوگياعا كوشىرۋگە نازار اۋدارۋ كەرەك.
بەسىنشى ماسەلە – قارجى سالاسى. ىڭعايلى ىمىرالاردىڭ ورنىنا ءادىل رەفورمالار كەرەك. پرەزيدەنت ينفلياتسيامەن كۇرەستە جانە سالىق-بيۋدجەت ساياساتىن رەفورمالاۋدا ايرىقشا تاسىلدەر بولۋىن تالاپ ەتتى. بيۋدجەت دەفيتسيتىن جابۋ ءۇشىن ۇلتتىق قور قاراجاتىن پايدالانۋدى دوعارۋ كەرەك. مەملەكەت باسشىسى ۇكىمەتكە باسقا جولداردى تابۋدى تاپسىردى. اتاپ ايتقاندا, شىعىندار قاتاڭ تۇردە باقىلاۋعا الىنۋعا ءتيىس; قارجى ساياساتى قىسقامەرزىمدى پايداعا ەمەس, ۇزاقمەرزىمدى تۇراقتىلىققا قۇرىلۋى كەرەك. مۇنداي قادامدار شىعىنداردى قاتاڭ باقىلاۋدى تالاپ ەتەتىندىكتەن, ۇنەمى قارسىلىققا تاپ بولادى. الايدا تۇراقتى قارجىلىق جۇيەنى وسىنداي شەشىمدەر عانا قۇرا الادى.
كۇردەلى كەزەڭ ايرىقشا ءارى باتىل شەشىمدەردى تالاپ ەتەدى. ەسكى سۇرلەۋمەن كەتە بەرەمىز بە, الدە باتىل شەشىمدەر قابىلداپ, جەڭىسكە جەتەتىن ەلگە اينالامىز با؟ ءبىز بۇگىن وسىنداي تاڭداۋ الدىندا تۇرمىز.
اسحات ايماعامبەتوۆ,
ءماجىلىس دەپۋتاتى