جاقىندا ۇلىبريتانيانىڭ لوندون قالاسىندا «British Education Training and Technology Show» كورمەسى ءوتتى. وسىناۋ ءبىلىم الاڭىنا ەلىمىز العاش رەت ۇلتتىق پاۆيلون رەتىندە قاتىسىپ, بىرەگەي جوبالارىن تانىستىردى.
حالىقارالىق كورمە اياسىندا ۇلىبريتانيانىڭ وقۋ وردالارىمەن ىسكەرلىك كەزدەسۋلەر ءوتتى. اتاپ ايتساق, Satbayev University رەكتورى مەيرام بەگەنتاەۆ بەدەلدى بريتاندىق University of Glasgow-دىڭ عالامدىق ىنتىماقتاستىق جونىندەگى دەكانى مويرا بولاندپەن مەموراندۋمعا قول قويدى. وسىلايشا, «Mechanical Engineering and Management» ماماندىعى بويىنشا «1+1» فورماتىنا نەگىزدەلگەن قوس ديپلومدى ماگيستراتۋرا باعدارلاماسى جۇزەگە اسپاق. بۇدان بولەك, اتالعان وقۋ وردالارىنىڭ وقىتۋشىلارى مەن زەرتتەۋشىلەرى ىنتىماقتاستىق اياسىندا ەكى ۋنيۆەرسيتەتتە ءدارىس وقي الادى. ايتا كەتەيىك, «University of Glasgow» 2025 جىلعى QS الەمدىك رەيتينگىندە 78-ورىنعا يە جانە بريتاندىق جەتەكشى زەرتتەۋ ۋنيۆەرسيتەتتەرىن بىرىكتىرەتىن «Russell Group» قۇرامىنا كىرەدى.
اتالعان كورمەدە سونداي-اق University of Exeter-مەن مەموراندۋمعا قول قويىلدى. ىنتىماقتاستىق ناتيجەسىندە, بىرنەشە قوس ديپلومدى ماگيستراتۋرا باعدارلاماسى قۇرىلدى. بۇل «Mining & Minerals», «Climate», «Data Science», «Environmental Management» جانە «Geology» باعىتتارىن قامتيدى. اتالعان باعدارلامالارعا Satbayev University ستۋدەنتتەرى اتسالىسىپ, بىرلەسكەن عىلىمي جوبالارعا, ونىڭ ىشىندە Exeter ۋنيۆەرسيتەتىنىڭ «CREWW» جانە «Engineering Exeter» زەرتحانالارىندا جۇرگىزىلەتىن زەرتتەۋلەرگە قاتىسا الادى.
وسىلايشا, University of Glasgow جانە University of Exeter-مەن جاسالعان ەكى سەرىكتەستىك Satbayev University ستۋدەنتتەرى مەن وقىتۋشىلارى ءۇشىن جاڭا مۇمكىندىكتەر ەسىگىن اشىپ, ەلىمىزدەگى عىلىم مەن تەحنولوگيالاردىڭ دامۋىنا ىقپال ەتەدى.
اتالعان كورمەدە Nazarbayev University «Soyle App», قازاق ءتىلىنىڭ ۇلكەن تىلدىك مودەلى «ISSAI KAZ-LLM» جانە «Artisan Education» ستارتاپتارىن تانىستىردى. ءتۇسىندىرىپ وتسەك, «Soyle App» اۋىزشا ءسوز بەن جازباشا ءماتىندى ءتورت تىلگە (قازاقشا, ورىسشا, اعىلشىنشا, تۇرىكشە) اۋدارۋ مۇمكىندىكتەرىن ۇسىنادى. اۋدارما ساپاسى «Google Translate», «Yandex Translate» ناتيجەلەرىنەن اسىپ تۇسەدى.
«Bett Show» 2025 كورمەسىندە ءال-فارابي اتىنداعى قازاق ۇلتتىق ۋنيۆەرسيتەتى «Faraby» سۋپەركومپيۋتەر, «Farabi Robotics» ورتالىقتارىن تانىستىرسا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق تىلىندە ەموتسيونالدى تۇردە ءدارىس وقيتىن جاساندى زەردەنى كورسەتتى. ال د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى قىتاي مەن قازاقستان اراسىنداعى ىنتىماقتاستىق اياسىندا قۇرىلعان «لۋ بان شەبەرحاناسى» اتتى ەرەكشە ءبىلىم بەرۋ جوباسىنا باسا نازار اۋداردى. بۇل جوبا ستۋدەنتتەر مەن وقىتۋشىلاردىڭ كاسىبي جانە ينجەنەرلىك داعدىلارىن دامىتۋعا, وقىتۋ ۇدەرىسىنە يننوۆاتسيالىق تەحنولوگيالاردى ەنگىزۋگە, ءداستۇرلى ينجەنەرلىك پاندەردى زاماناۋي تسيفرلىق جانە اۆتوماتتاندىرىلعان تەحنولوگيالارمەن ۇيلەستىرۋگە باعىتتالعان. ءبىلىم كورمەسىندە سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتى ستۋدەنتتەرى مەن عالىمدارى «VR ۆيرتۋالدى كەن ورنى» تەحنولوگياسىن تانىستىردى. VR تەحنولوگيانىڭ كومەگىمەن ستۋدەنتتەر ۆيرتۋالدى ورتادا ءتۇرلى كەن ورىندارىن زەرتتەپ, تەوريالىق بىلىمدەرىن بەكىتە الادى. جوبانىڭ ارتىقشىلىعى – قاۋىپسىز ەكسپەريمەنتتىك ورتا, ۆيرتۋالدى ەكسكۋرسيالار, ينتەراكتيۆتى جانە يممەرسيۆتى وقۋ ۇدەرىسى. Utebayev University اتالعان كورمەدە ءتۇرلى ەلدەردەن كەلگەن ءبىلىم جانە تەحنولوگيا سالاسىنىڭ ماماندارىمەن تانىسىپ, ىنتىماقتاستىق ورناتۋ ماقساتىندا ديالوگ جۇرگىزدى.
ايتا كەتەيىك, اتالعان كورمەگە «Google», «Microsoft», «Lenovo» سىندى 600-دەن استام حالىقارالىق كومپانيالار مەن 300 سپيكەر قاتىستى. سونداي-اق 130-عا جۋىق مەملەكەت ءبىلىم سالاسىنداعى ءوز ازىرلەمەلەرىن ۇسىندى.