ەرتىس وزەنى جاعالاۋىندا كەرىلە كوسىلگەن كەلبەتتى كەرەكۋ ءوڭىرى اسەم قالا – وبلىس ورتالىعىمەن دە ماقتانا الادى. بۇل كۇندەرى “جول كارتاسى” باعدارلاماسى بويىنشا قالا كوشەلەرىن كورىكتەندىرۋ جۇمىستارى جۇرگىزىلۋدە. ورتالىق الاڭدا بىرىنەن سوڭ ءبىرى ساپ تۇزەگەن اقشاڭقان كولىكتەر دە قازداي ءتىزىلىپ تۇرا قالىپتى. وزدەرىنە بەرىلەتىن مۇنداي تاماشا سىيلىقتى الۋعا كەلگەن ءبىلىم بەرۋ, دەنساۋلىق ساقتاۋ سالالارى قىزمەتكەرلەرىمەن قاتار, قۇقىق قورعاۋ ورگاندارىنىڭ وكىلدەرى دە ايرىقشا قۋانىش قۇشاعىندا. وبلىسقا جاساعان ەكى كۇندىك ساپارى اياسىندا ءوندىرىس مايتالماندارى – مەتاللۋرگتەرگە ساتتىلىك پەن تابىس تىلەپ قوشتاسقان پرەزيدەنت نۇرسۇلتان نازارباەۆ, بۇدان كەيىن كەشە, تۇسكە قاراي وبلىس ورتالىعىنداعى الاڭدا الەۋمەتتىك سالا قىزمەتكەرلەرىمەن كەزدەستى.
– ۇلكەن ىستەر جۇزەگە اسىرىلىپ جاتقان سىزدەردىڭ ءوندىرىستى وڭىرلەرىڭىزگە كەلگەنىمە قۋانىشتىمىن. كەشە, وزدەرىڭىز بىلەسىزدەر, ەلەكتروليز زاۋىتىنىڭ ەكىنشى كەزەگىن ىسكە قوستىم. زاۋىتتا 2 مىڭنان اسا ادام جۇمىس ىستەيدى. وبلىس بويىنشا يندۋستريالىق باعدارلامانى ورىنداۋ جونىندە كوپ شارۋالار جاسالۋدا. وسى جارتىجىلدىقتا 12 جاڭا ءوندىرىس ورنى ىسكە قوسىلماقشى. بۇدان 8 مىڭ ادام جۇمىس ورىندارىن تاباتىن بولادى. حالىقتىڭ ءال-اۋقاتى كوتەرىلەدى. كەيىنگى توعىز جىلدىڭ ىشىندە وبلىستا ءوندىرىس سالاسى 4,5 ەسە وسسە, اۋىل شارۋاشىلىعى 4 ەسە ءوسىپ, وسىنداي جەتىستىكتەردىڭ بارلىعى تاۋەلسىز ەلىمىزدىڭ ءوسىپ-وركەندەۋىنە ۇلەس بولىپ قوسىلۋدا. الەۋمەتتىك شارالار قاتارىندا دەنساۋلىق ساقتاۋ,ءبىلىم بەرۋ سالالارى بويىنشا ارنايى باعدارلامالار جاسالىپ جاتىر. مەكتەپتەر, اۋرۋحانالار سالۋ, ولاردى جوندەۋ – بارلىعى دا مەملەكەتتىڭ قولداۋىمەن جۇزەگە اسىرىلۋدا. بيىلعى جىلدىڭ ءساۋىر ايىنىن باستاپ دارىگەرلەر مەن مۇعالىمدەردىڭ جالاقىلارى 25 پايىزعا كوتەرىلدى. سىزدەر ءۇشىن ۇلكەن قۋانىش, مۇعالىمدەر مەن دارىگەرلەر دەگەن ءسوز – ءار وتباسىنا جاساعان مەملەكەتتىڭ كومەگى. قۇقىق قورعاۋ ورگاندارى دا وزدەرىنىڭ مىندەتتەرىن ابىرويمەن ورىنداۋدا. بۇل ءۇشىن دە تەحنيكالىق كومەك ءاردايىم كەرەك. بۇگىن, مىنە, سىزدەرمەن وسى ءبىر سالتاناتتى جاعدايدا كەزدەسىپ تۇرمىز. ارنايى كولىكتەر ينتەرناتتارعا, قۇقىق قورعاۋ ورىندارىنا, اۋرۋحانالار مەن مەكتەپتەرگە بەرىلەدى. قۇتتى بولسىن! – دەدى ەلباسى ءوزىنىڭ قۇتتىقتاۋ سوزىندە.
كۇنى كەشە عانا ەلىمىزدىڭ دەنساۋلىق ساقتاۋ سالاسىنىڭ قىزمەتكەرلەرى مەن قۇقىق قورعاۋشىلارى وزدەرىنىڭ ءتول مەرەكەلەرىن اتاپ وتكەنى بەلگىلى. وسى ورايدا ەلباسى ءار سالا قىزمەتكەرلەرىنىڭ وكىلدەرىن ورتاعا شاقىرىپ, كولىكتەردىڭ كىلتتەرىن تاپسىردى. ولاردىڭ قاتارىندا سايان مۇقانوۆ, گۇلميرا شۇعاباەۆا, ەسجان قانافيا ۇلى, يرينا ميششەنكو, ماقسات قوبجانوۆ, باۋىرجان ۇمبەتوۆ, ەلەنا ششەربينا, مارعۇلان زۋبايروۆ سىندى ءار سالا وكىلدەرى – مۇعالىمدەر, دارىگەرلەر, بالالاردى ءوز ءومىرىن قاتەرگە تىگىپ, ءورت ىشىنەن امان الىپ قالعان ب.ۇمبەتوۆ سياقتى بۇگىنگى كۇننىڭ باتىرلارى دا بار. دارىگەر ي.ميششەنكو ءوز ارىپتەستەرىنىڭ بىرىڭعاي دەنساۋلىق ساقتاۋ جۇيەسىنىڭ جاڭا باعىتى بويىنشا اتقارىپ جاتقان جۇمىستارىنا وراي الداعى ۋاقىتتا تىنىمسىز ەڭبەك كۇتىپ تۇرعانىن ايتىپ ءوتتى. بارلىعى كەۋدەلەرىنە قولدارىن قويىپ, ءوزدەرىنىڭ ەل الدىنداعى قىزمەتتەرىن باعالاپ كەلگەن مارتەبەلى ەلباسىنا شىن جۇرەكتەن ىستىق ىقىلاس, العىستارىن ءبىلدىرىپ جاتتى.
كىلتتى تابىستاعان سالتاناتتى ءراسىمنەن سوڭ پرەزيدەنت قۋانىش يەلەرىن قۇتتىقتاپ, قىزمەتتە ىڭعايلى جاڭا كولىكتەردى ارالاپ كورىپ شىقتى. كۇنمەن شاعىلىسىپ جارقىراپ تۇرعان 77 اۆتوكولىكتىڭ 57-ءسى وبلىستاعى ىشكى ىستەر ورگاندارىنا, 10-ى وبلىس ورتالىعى مەن ەكىباستۇز, اقسۋ قالالارىنداعى جەدەل مەديتسينالىق جاردەم كورسەتۋ ستانسالارىنا, ال, قالعان 10-ى وبلىستىڭ جەتىم بالالارعا ارنالعان مەكتەپ-ينتەرنات مەكەمەلەرىنە, ونىڭ ىشىندە قۇلاقتارى ەستىمەيتىن جانە ناشار ەستيتىن بالالارعا ارنالعان №1 ارنايى كوررەكتسيالىق مەكتەپكە, وبلىستىق ارنايى مەكتەپ-ينتەرناتقا, وبلىس ورتالىعىنداعى اتا-انالارىنىڭ قامقورلىعىنسىز قالعان جانە جەتىم بالالارعا ارنالعان №2 مەكتەپ-ينتەرناتقا, پاۆلودار اۋدانى ميچۋرين اۋىلى وتباسىلىق ۇلگىدەگى بالالار ۇيىنە, ىبىراي التىنسارين اتىنداعى دارىندى بالالارعا ارنالعان قازاق گيمنازيا-ينتەرناتىنا, ەكىباستۇز قالاسىنداعى ء“ۇمىت” بالالار ۇيىنە جانە اقسۋ قالاسى مەن قاشىر اۋدانىنداعى بالالار مەن ءجاسوسپىرىمدەرگە ارنالعان مەكتەپ جانە مەكتەپكە دەيىنگى وقىتۋ مەن ءتاربيەلەۋ تۇرىندەگى كەشەندى بالالار ۇيلەرىنە بەرىلدى.
دارىگەرلەر مەن مۇعالىمدەرگە جانە پوليتسيا وكىلدەرىنە كولىكتەردىڭ كىلتىن تابىستاپ, ولاردى قۋانىشقا بولەگەن پرەزيدەنتتى بۇدان كەيىن كىشكەنتاي بوبەكتەر كۇتىپ تۇردى. وسى جۋىردا عانا مەتاللۋرگتەر ءوز جۇمىسشى-قىزمەتكەرلەرىنە ارناپ جاڭا ءۇي, ولاردىڭ بالالارىنا ارناپ جاڭا بالاباقشا سالعىزىپ بەردى. “قازاقستان ءاليۋمينيى” اكتسيونەرلىك قوعامىنىڭ جۇمىسشىلارى مەن قىزمەتكەرلەرى ءۇشىن بۇدان ارتىق قانداي قۋانىش بولسىن. زاۋىت باسشىلىعى ەلباسىنىڭ بيىلعى جولداۋىندا ايتىلعان مەكتەپ جاسىنا دەيىنگى بالدىرعانداردى وقىتۋ مەن تاربيەلەۋدى قامتاماسىز ەتۋدى جاقسارتۋعا باعىتتالعان “بالاپان” ارنايى باعدارلاماسىن وسىلاي ورىنداي باستادى. ءوندىرىس ورنىنا جاقىن ورنالاسقان 240 ورىندىق بالاباقشا ءبىر جىلدىڭ ىشىندە سالىندى. ول تولىقتاي جاڭا زامان تالاپتارىنا ساي جابدىقتالدى. شەت تىلدەرىن ۇيرەتۋ جانە كومپيۋتەرلىك ساۋاتتىلىققا باۋلۋ, دەنە شىنىقتىرۋ جانە مۋزىكا الەمى زالدارى سياقتى ارنايى كابينەتتەر جۇيەسى بار.
مەملەكەت باسشىسى ءبۇلدىرشىندەرگە سىيلىقتار تارتۋ ەتتى. ولار دا قاز-قاتار تۇرا قالىپ, تاقپاقتار وقي باستادى. مۇندا كەلەتىن كىشكەنتايلار ورىس جانە قازاق تىلدەرىندە وقىپ-ۇيرەنىپ, تاربيە الادى. زاۋىت باسشىسى الماس يبراگيموۆتىڭ ۇسىنىسىمەن تەك زاۋىت جۇمىسشىلارىنىڭ عانا ەمەس, وسى اۋدان كولەمىندە تۇراتىن قالا تۇرعىندارىنىڭ بالالارى ءۇشىن دە بالاباقشا ەسىگى اشىق. وبلىس اكىمى باقىتجان ساعىنتاەۆتىڭ ايتۋىنشا, بيىلعى جىلدىڭ سوڭىنا قاراي وڭىردە 19 بالاباقشا قايتادان قالپىنا كەلتىرىلىپ, جالپى ءبىلىم بەرەتىن مەكتەپتەر جانىنان 83 شاعىن ورتالىقتار اشىلادى. تاعى ءبىر قۋانىشتى جاعداي, وسى بالاباقشا جانىنان 125 پاتەرلى ون قاباتتى تۇرعىن ءۇي پايدالانۋعا بەرىلدى. زاۋىت باسشىلىعى وسىمەن ەكىنشى رەت ءوز جۇمىسشىلارى مەن قىزمەتكەرلەرىنە جارقىراعان, جاڭا پاتەرلەر سالىپ بەرىپ وتىر. الىپ كورپوراتسيا قابىلداعان 2023 جىلعا دەيىنگى الەۋمەتتىك باعدارلامالار اياسىندا بالاباقشالار, تۇرعىن ۇيلەر, باسقا دا الەۋمەتتىك-تۇرمىستىق نىساندار سالۋ جۇيەسى جوسپارلانعان. بۇل ماقساتقا كورپوراتسيا 45 ميلليون اقش دوللارىن جۇمساۋدى قاراستىرعان كورىنەدى.
بالاباقشادان شىققان سوڭ نۇرسۇلتان ءابىش ۇلى ءوزىن كۇتىپ تۇرعان وسى جەردەگى جاڭا ۇيدەن پاتەر العان تۇرعىندارمەن جۇزدەستى. مۇعالىم داريا ابىكەنوۆا مەن زاۋىت قىزمەتكەرى الىبەك بايبازاروۆ ەلباسىنا ۇلكەن العىستارىن ءبىلدىردى. كوڭىلدەرى جادىراڭقى تۇرعىندار ۇيلەرىنىڭ الدىنان مەملەكەت باسشىسىن “ساۋ بولىڭىز, سىزگە ءارقاشان اماندىق تىلەيمىز, ءسىز ءبىزدىڭ پرەزيدەنتىمىزسىز”, دەپ رياسىز ىستىق كوڭىلمەن شىعارىپ سالدى.
فاريدا بىقاي, پاۆلودار. سۋرەتتەردى تۇسىرگەندەر س.بوندارەنكو, ب.وتارباەۆ.