سۋ رەسۋرستارى سالاسى جىل سوڭىنا دەيىن تسيفرلانادى

سالا ۆەدومستۆوسىنىڭ ءباسپاسوز قىزمەتىنىڭ ءمالىم ەتۋىنشە اقپاراتتىق جۇيەگە 17 736 وزەن مەن 2 949 شاعىن كول, كاسپي جانە ارال تەڭىزدەرىنىڭ شەكاراسى, 8 سۋ شارۋاشىلىعى باسسەينى, 77 سۋ شارۋاشىلىعى ۋچاسكەسى, 377 ماگيسترالدى كانال, 56 توعان, 297 سۋ قويماسى جانە 548 بوگەت تسيفرلاندىرىلىپ, ەنگىزىلەتىن بولادى. اتالعان جۇمىسقا مينيسترلىككە قاراستى سۋ رەسۋرستارىنىڭ اقپاراتتىق-تالداۋ ورتالىعى دا تارتىلىپ وتىر. مەكەمە سۋ شارۋاشىلىعى سالاسىنداعى بارلىق دەرەكتەردى جيناۋ جانە وڭدەۋ, قىسقا جانە ۇزاق مەرزىمدى بولجام, مودەلدەۋ جانە باسقا دا جۇمىستارمەن اينالىساتىن بولادى.

«جۇيەنى ەنگىزۋ سۋ رەسۋرستارىن ەسەپكە الۋ جانە باسقارۋ ءۇشىن بىرىڭعاي تسيفرلىق پلاتفورما قۇرۋعا, ولاردى پايدالانۋدىڭ اشىقتىعى مەن تيىمدىلىگىن ارتتىرۋعا, سونداي-اق توتەنشە جاعدايدىڭ الدىن الۋ ءۇشىن نەعۇرلىم ساپالى تالداۋ مەن بولجام جاساۋعا مۇمكىندىك بەرەدى. بۇگىنگى تاڭدا سۋدى ەسەپكە الۋ جانە سۋ رەسۋرستارىنىڭ اعىمداعى جاي-كۇيىن جەدەل مونيتورينگ جاساۋ ءۇشىن مودۋلدەردى ازىرلەۋ اياقتالىپ قالدى. بۇل جۇمىس اياقتالعاننان كەيىن جۇيەنى سىناقتان وتكىزۋ جانە پايدالانۋشىلاردى وقىتۋ جوسپارلانىپ جاتىر», دەدى سۋ رەسۋرستارى جانە يرريگاتسيا ۆيتسە-ءمينيسترى اسلان ابدرايموۆ.