مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا ەلىمىزدىڭ الداعى جىلدارداعى الەۋمەتتىك-ەكونوميكالىق دامۋىنا قاتىستى ستراتەگيالىق مىندەتتەردى بەلگىلەپ بەردى. پرەزيدەنت ءسوزى بيلىكتىڭ بارلىق تارماعى ءۇشىن ناقتى باعدار بولىپ, ەلىمىز جاڭعىرۋ, يننوۆاتسيا جانە ورنىقتى دامۋ جولىنان اينىمايتىنىن كورسەتتى.
دۇنيەجۇزى تۇبەگەيلى وزگەرىسكە ۇشىراپ جاتقان قازىرگى ۋاقىتتا ەكونوميكالىق دامۋعا ايرىقشا نازار اۋدارىلىپ وتىر. بۇل رەتتە, ەڭ الدىمەن, ەكونوميكانى ءارتاراپتاندىرۋ جانە ورتا بۋىنعا جاتاتىن كوشباسشى كومپانيالار شوعىرىن قالىپتاستىرۋ ارقىلى وڭدەۋشى ونەركاسىپتى دامىتۋ – ماڭىزدى مىندەت.
سونىمەن قاتار مەملەكەت باسشىسى جيىن بارىسىندا ەكونوميكانىڭ ماڭىزدى سالالارىنا قوسىمشا جەكە ينۆەستيتسيالار تارتۋ قاجەت ەكەنىن اتاپ ءوتتى. وسىعان بايلانىستى ساپالى ينۆەستيتسيا اكەلەتىن جاۋاپكەرشىلىگى جوعارى ينۆەستورلارعا قوسىمشا جەڭىلدىكتەر بەرۋ ماسەلەسى قاراستىرىلادى. سونداي-اق شاعىن جانە ورتا بيزنەستىڭ دامۋىنا مۇمكىندىك بەرەتىن نەسيەلەۋ جۇمىسىن بەلسەندى جۇرگىزۋ قاجەت ەكەنى ايتىلدى.
ەلىمىزدىڭ كولىك-لوگيستيكالىق ينفراقۇرىلىمىنا قاتىستى سەرپىندى باستامالار دا جاريالاندى. وسى ورايدا مۋلتيمودالدى كولىك توراپتارىن, تەمىرجول ءدالىزىن دامىتۋ جانە حالىقارالىق اۋە حابىن قۇرۋ اۋقىمدى باسەكەدەگى ءبىزدىڭ وراسان زور ارتىقشىلىعىمىز بولاتىنى ءسوزسىز.
ەنەرگەتيكا سالاسىندا الدىمىزدا جاڭارتىلاتىن ەنەرگيا كوزدەرىنىڭ ۇلەسىن ارتتىرۋ مىندەتى تۇر. بۇل رەتتە اتوم ونەركاسىبىن بەلسەندى دامىتۋدى جالعاستىرىپ, بولاشاقتا ەلىمىزدە يادرولىق كلاستەر قۇرۋعا مۇمكىندىك بەرەتىن باتىل قادامدار جاساۋ قاجەتتىلىگى كۇن وتكەن سايىن وزەكتى بولىپ كەلەدى.
پرەزيدەنتىمىز اتاپ وتكەندەي, بۇگىندە تسيفرلاندىرۋ جانە جاساندى ينتەللەكتىنى دامىتۋ ايرىقشا مانگە يە. الداعى ۋاقىتتا جاساندى ينتەللەكت قۇرالدارىن مەملەكەتتىك ورگاندار مەن ۇلتتىق كومپانيالاردىڭ جۇمىسىندا پايدالانۋ باسقارۋ ۇدەرىسىنىڭ اشىقتىعى مەن تيىمدىلىگىن ارتتىرا تۇسەتىنى ءسوزسىز.
سونداي-اق مەملەكەت باسشىسى اگروونەركاسىپ كەشەنىن دامىتۋعا ايرىقشا نازار اۋدارۋ كەرەك ەكەنىن ايتتى. فەرمەرلەردى جەڭىلدىكپەن نەسيە بەرۋ, كوبىرەك تابىس اكەلەتىن ءداندى-داقىلعا كوشۋ جانە شيكىزاتتى ساقتاۋ جانە ونى تەرەڭ وڭدەۋ مۇمكىندىكتەرىن ارتتىرۋ ارقىلى قولداۋ اۋىل شارۋاشىلىعىن جاڭا ونىمدىلىك دەڭگەيىنە كوتەرۋگە جول اشادى.
وتىرىستا پرەزيدەنت مەملەكەتتىك اپپارات جاۋاپكەرشىلىككە جانە ازاماتتاردىڭ وتىنىشتەرىنە جەدەل دەن قويۋعا نەگىزدەلىپ, ءتيىمدى جۇمىس ىستەۋ كەرەك ەكەنىنە دە توقتالدى. بۇل – «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ جولىنداعى ماڭىزدى قادام.
سونىمەن قاتار ساپالى ءبىلىمنىڭ قولجەتىمدىلىگىنە, دەنساۋلىق ساقتاۋ ءىسىن جاڭعىرتۋعا جانە جاڭا, سۇرانىسقا يە جۇمىس ورىندارىن قالىپتاستىرۋعا ءمان بەرىلىپ, الەۋمەتتىك سالاداعى ماڭىزدى باسىمدىقتار بەلگىلەندى.
پارلامەنت سەناتى مەملەكەت باسشىسىنىڭ رەفورمالار باعدارىن زاڭنامالىق تۇرعىدان قامتاماسىز ەتۋ ءۇشىن قاجەتتى جۇمىستى جالعاستىرا بەرەدى. سونىڭ اياسىندا الداعى ۋاقىتتا بيزنەس قوعامداستىق وكىلدەرىمەن جانە بارلىق مۇددەلى تاراپپەن بىرگە جاڭا سالىق جانە بيۋدجەت كودەكستەرىن ازىرلەپ, تالقىلايمىز. مىندەتتى الەۋمەتتىك مەديتسينالىق ساقتاندىرۋ جۇيەسىن جانە ەل ەكونوميكاسىنىڭ ءتۇرلى سالالارىن دامىتۋعا ارنالعان زاڭنامالىق شارالاردى جەتىلدىرۋ بويىنشا دا كەشەندى ءىس قولعا الىنادى.
پرەزيدەنت جۇكتەگەن مىندەتتەردى ساپالى ءارى ۋاقتىلى ىسكە اسىرۋ ەلىمىزدىڭ جاڭا ەكونوميكالىق جانە يندۋستريالىق كەلبەتىن قالىپتاستىرادى. مەملەكەت باسشىسى بەلگىلەپ بەرگەن باسىم باعىتتاردىڭ ارقايسىسى ازاماتتارىمىزدىڭ ءال-اۋقاتىن ارتتىرۋ جانە دامىعان, ينكليۋزيۆتى, اشىق قازاقستان قۇرۋ جولىندا ناقتى ناتيجەلەرگە قول جەتكىزۋدى كوزدەيدى. سوندىقتان وسى باعىتتا بەلسەندى جۇمىس جۇرگىزە بەرەمىز.
ماۋلەن اشىمباەۆ,
سەنات توراعاسى