قازىر وتاندىق ءىت ماماندار ازىرلەگەن جوبالار الەمدىك نارىققا شىعىپ جاتىر. سولاردىڭ ءبىرى – وقۋشىلارعا تسيفرلىق ساۋاتتىلىقتى ۇيرەتەتىن «CodiPlay» پلاتفورماسى.
بۇل – وقۋشىلارعا كومپيۋتەر ءتىلى مەن روبوتتەحنيكانى ويىن تۇرىندە ۇيرەتەتىن پلاتفورما. ول مەكتەپتەگى ساباق ۇدەرىسىنە كەدەرگى كەلتىرمەي, مۇعالىم مەن وقۋشىنىڭ بىرلەسە جۇمىس ىستەۋىنە مۇمكىندىك بەرەدى. جاقىندا عانا «CodiPlay» edtech-ستارتابى «Series A» قارجىلاندىرۋ راۋندى شەڭبەرىندە 9 ملن دوللار ينۆەستيتسيا تارتتى. وتاندىق ءونىم وسىلايشا, ءباا, ساۋد ارابياسى مەن قاتار نارىعىنا شىعا الادى. كومپانيا وسى وڭىرلەردە ەكى جىل كولەمىندە 3000 مەكتەپتى قوسۋدى جوسپارلاپ وتىر.
«ينۆەستورلار تاراپىنان كورسەتىلگەن قولداۋعا ءدان ريزامىز. وسىنداي قولداۋ ارقىلى ءبىز قارقىندى دامىپ, MENA وڭىرىندە شەشىمدەرىمىزدى ءساتتى ەنگىزۋگە مۇمكىندىك الدىق. مەكتەپتەگى زاماناۋي وقىتۋ قولجەتىمدى ءارى ءتيىمدى بولا تۇسپەك. ءبىز بالالاردىڭ IT سالاعا ىنتاسىن انىق كورىپ وتىرمىز. ولار ءبىزدىڭ ادىستەمەمىزدىڭ ارقاسىندا باعدارشامدى جوبالاي الادى, شلاگباۋم جۇيەسى قالاي قۇرىلعانىن بىلەدى, سونىمەن قاتار اقىلدى ءۇيدىڭ جۇيەسى قالاي جۇمىس ىستەيتىنىن تۇسىنەدى. وسىنداي شەشىمدەر ارقىلى وقۋشىلاردىڭ ديدجيتال داعدىلارى ارتىپ جاتىر», دەدى جوبانىڭ نەگىزىن قالاۋشى ءجانادىل تالدىباەۆ.
استانا, الماتى قالالارىنىڭ مەكتەپتەرىمەن قوسا, تۇركىستان وبلىسى كەلەس اۋدانى, اقتوبە وبلىسى حرومتاۋ اۋدانى جانە قاسكەلەڭدەگى مەكتەپتەر دە زاماناۋي ادىستەمەمەن تسيفرلىق ساۋاتىن ارتتىرىپ جاتىر. بالالار «CodiPlay» كومەگىمەن IoT-گادجەتتەر نەگىزىندە قۇرىلعىلاردى ءوز بەتىنشە قۇراستىرا الادى.
ايتا كەتەيىك, «CodiPlay» – 2021 جىلى قۇرىلعان ستارتاپ. سودان بەرى اتالعان جوبا وڭتۇستىك كورەيا, ۇلىبريتانيا, يندونەزيا سەكىلدى ۇزىن-ىرعاسى 13 مەملەكەتتەگى 600-دەن اسا مەكتەپتى قامتىدى. كومپانيا بىرىككەن ۇلتتار ۇيىمىنىڭ تسيفرلىق قوعامدىق يگىلىك رەتىندە باعاسىن الىپ, فينليانديانىڭ ءبىلىم بەرۋ اليانسىنىڭ فين ساپا سەرتيفيكاتىمەن بەلگىلەندى. قازىرگى كەزدە «CodiPlay» جوباسىنىڭ قۇنى 100 ملن دوللارعا باعالانىپ وتىر. بۇل – ەلىمىزدە قۇرىلعان ءبىلىم سالاسىنداعى (EdTech) كومپانيالار اراسىنداعى رەكوردتىق كورسەتكىش.