ۇكىمەتتە ەنەرگەتيكا جانە كوممۋنالدىق سەكتورلاردى جاڭعىرتۋ ۇلتتىق جوباسىن ىسكە اسىرۋ بويىنشا ءباسپاسوز كونفەرەنتسياسى ءوتتى. وعان پرەمەر-ءمينيستردىڭ ورىنباسارى قانات بوزىمباەۆپەن بىرگە بىرقاتار ۆەدومستۆو وكىلدەرى قاتىستى.
ۇلتتىق جوبانىڭ ماقساتى – ەلدەگى كوممۋنالدىق قىزمەتتەردى تۇراقتى ءارى ساپالى ۇسىنۋدى, جاڭا قۋات كوزدەرىن سالۋدى, ينجەنەرلىك جەلىلەردىڭ توزۋىن 40%-عا دەيىن تومەندەتۋدى قامتاماسىز ەتۋ.
بۇگىنگى تاڭدا جىلۋ, ەلەكتر, سۋمەن جابدىقتاۋ, سۋ بۇرۋ سالالارىنداعى 87 مونوپوليست كاسىپورىننىڭ ەنەرگەتيكالىق جانە كوممۋنالدىق ينفراقۇرىلىمى 65-تەن 100%-عا دەيىن توزعان. كوممۋنالدىق جەلىلەردىڭ جىل سايىنعى تابيعي توزۋى 2–3% نەمەسە 4–5 مىڭ كم-نى قۇرايدى.
قولدانىستاعى ينجەنەرلىك جەلىلەردى جاڭعىرتۋدان باسقا, بولاشاقتا ەلەكتر, جىلۋ ەنەرگياسى تاپشىلىعىن بولدىرماس ءۇشىن جيىنتىق كولەمى 7,3 گۆت بولاتىن قوسىمشا گەنەراتسيالاۋ كوزدەرىن ەنگىزۋ جوسپارلانىپ وتىر.
ۇلتتىق جوبانىڭ ماڭىزدى ەلەمەنتتەرى – جەكە ينۆەستيتسيالاردى تارتۋ, ينفراقۇرىلىمدى جاڭعىرتۋعا جەكە كومپانيالاردىڭ قاتىسۋىن ىنتالاندىراتىن تەتىكتەردى ازىرلەۋ, بۇل مەملەكەتتىك بيۋدجەتكە قارجىلىق جۇكتەمەنى ازايتۋعا كومەكتەسەدى.
ۇلتتىق جوبا شەڭبەرىندە 57 قالادا 200-دەن اسا تابيعي مونوپوليا سۋبەكتىسى (70% مەملەكەتتىك, 30% جەكە) قامتىلدى. ءار كاسىپورىنعا قارجىلاندىرۋدىڭ جەكە مودەلى تاڭدالادى. نارىقتىق, بيۋدجەتتىك زاەمدىق قارجىلاندىرۋ, سونداي-اق حالىقارالىق قارجى ۇيىمدارىنىڭ زاەمى بولجانادى. بارلىق زاەم ۇلتتىق ۆاليۋتادا بولماق.
ۇلتتىق جوبادا جەتكىزۋشىلەر اراسىندا وتاندىق ءوندىرىس ونىمدەرىنىڭ ۇلەسىن قامتاماسىز ەتۋ مىندەتتەمەسى بەلگىلەنىپ, قولداۋ ءىس-شارالارى ازىرلەندى.
711 تاۋار پوزيتسياسىن وندىرەتىن 187 كاسىپورىننىڭ ءتىزىمى جاسالدى. بۇگىنگى تاڭدا ەلىمىزدە قاجەتتىلىكتىڭ جالپى سانىنان 337 تاۋار پوزيتسياسى بويىنشا ءوندىرىستى وقشاۋلاۋ ءۇشىن الەۋەت بار. سونىمەن قاتار تابىسى تومەن ازاماتتاردى مەملەكەتتىك قولداۋ قاراستىرىلعان. الەۋمەتتىك قورعاۋ ورگاندارى كەلەسىدەي شارالاردى ۇسىنادى: كوممۋنالدىق قىزمەتتەردى وتەۋگە تۇرعىن ءۇي كومەگىن كورسەتۋ, كوممۋنالدىق قىزمەتتەردى وتەۋگە الەۋمەتتىك كومەك كورسەتۋ, اتاۋلى الەۋمەتتىك كومەك كورسەتۋ.