بۇل سايىس بۇرىنعى جارىستان وزگەرەك. ويتكەنى ەلىمىزدە العاش رەت وقۋشىلار اراسىندا رەسپۋبليكالىق «AI Olymp» اتتى جاساندى ينتەللەكت وليمپياداسى ۇيىمداستىرىلماق.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, وقۋ-اعارتۋ ءمينيسترى عاني بەيسەمباەۆ جانە سپورتتىق باعدارلامالاۋ فەدەراتسياسىنىڭ پرەزيدەنتى باعدات مۋسين ىنتىماقتاستىق تۋرالى مەموراندۋمعا قول قويدى. قۇجاتتاعى باستى جاڭالىق – «AI Olymp» ءبىلىمپازدار باسەكەسى.
اتالعان وليمپيادا جاساندى ينتەللەكت جانە باعدارلامالاۋ, ماتەماتيكا, دەرەكتەردى تالداۋ سىندى تاقىرىپتارعا قىزىعۋشىلىق تانىتاتىن تالانتتى وقۋشىلاردى انىقتاپ, ولاردى قولداۋعا, سونداي-اق دارا دارىنداردى حالىقارالىق جاساندى ينتەللەكت وليمپياداسىنا دايىنداۋعا باعىتتالعان.
«بۇل سايىستى ءبىز «Generative Nation» باستاماسى اياسىندا ۇيىمداستىرىپ وتىرمىز. جاس ونەرتاپقىشتاردى قولداۋ ءارى ولاردىڭ يدەيالارىن ىسكە اسىرۋ – ءبىزدىڭ مىندەتىمىز», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
جيىن بارىسىندا وقۋ-اعارتۋ ءمينيسترى عاني بەيسەمباەۆ «AI Olymp» سايىسىن وتكىزۋ – دارىندى وقۋشىلارىمىزدىڭ الەۋەتىن اشۋعا جانە جوعارى بىلىكتى مامانداردى دايىنداۋعا ستراتەگيالىق قادام ەكەنىن اتاپ ءوتتى.
ايتا كەتەيىك, وليمپيادا كوكتەم ايىندا وتەدى. ەلدىڭ تۇكپىر-تۇكپىرىنەن جينالعان وقۋشىلار ەڭ اۋەلى باعدارلامالاۋ, ماتەماتيكا جانە ماشينالىق وقىتۋ تاپسىرمالارىن شەشەتىن ونلاين ىرىكتەۋ كەزەڭىنە قاتىسادى. سودان سوڭ ەڭ ۇزدىك 40 قاتىسۋشى ماشينالىق وقىتۋ الگوريتمدەرى, دەرەكتەردى تالداۋ جانە جاساندى ينتەللەكتىگە قاتىستى پراكتيكالىق تاپسىرمالاردى شەشەتىن فينالدىق كەزەڭگە شاقىرىلادى. كىل مىقتىلاردان ىرىكتەلگەن ەڭ ۇزدىك وقۋشىلار ۇلتتىق قۇرامانىڭ اتىنان قىتاي حالىق رەسپۋبليكاسىنىڭ بەيجىڭ قالاسىندا وتەتىن حالىقارالىق جاساندى ينتەللەكت وليمپياداسىنا (IOAI) جولداما الادى.
سپورتتىق باعدارلامالاۋ فەدەراتسياسىنىڭ پرەزيدەنتى باعدات ءمۋسيننىڭ ايتۋىنشا, IOAI حالىقارالىق وليمپياداسى بيىل 2-9 تامىز ارالىعىندا وتەدى.