ءا.قاستەەۆ اتىنداعى مەملەكەتتىك ونەر مۋزەيىنىڭ ورتالىق كورمە زالىندا سۋرەتشىلەر وداعىنىڭ مۇشەسى, الماتى وبلىسىنىڭ ۇزدىك سۋرەتشىسى اتانعان مارات توتەەۆتىڭ ء«بىر ءساتتىڭ ماڭگىلىك بەينەسى» اتتى جەكە شىعارماشىلىق كورمەسى اشىلدى. ەكسپوزيتسيادا سۋرەتشىنىڭ پورترەت جانە تابيعات جانرىنداعى 150-گە جۋىق تۋىندىسى ۇسىنىلدى.
تۋعان ەلىنىڭ ءار ولكەسىن شىنايى بەينەلەيتىن سۋرەتشى ءوز تۋىندىلارىندا ۋاقىت پەن بولمىستىڭ اسەرلى قۇبىلىستارىن ەرەكشە ديناميكالىق ىرعاقپەن جەتكىزەدى. قىلقالام شەبەرىنىڭ پاليتراسى كۇردەلi بولعانمەن, كورەرمەن ءۇشىن سيۋجەتتىك كومپوزيتسيانى جەڭىل قابىلداۋىنا مۇمكىندىك بەرەدى. ايتالىق, «اقجار», «تۋعان جەر – بەرىكتاس», «جاركەنت. ىلە وزەنى», «سۋىقساي», «تەكەلى تاۋى», «كەلەس وزەنى», «كامەنكا پلاتو» اتتى تۋىندىلارى قورشاعان الەمنىڭ ەرەكشە سۇلۋلىعىن قانىق جانە كەرەعار تۇستەردى ۇندەستىرە, ءوزارا ۇيلەستىرە, تابيعاتتىڭ قاس-قاعىم ءساتىن ماڭگىلىككە اينالدىرادى.
«پەيزاج جانرىندا ول كورگەنىن جازىپ قانا قويماي, تۋعان ولكەنىڭ تابيعاتىن زەرتتەپ, نازىك ءيىرىمىن انىق ءارى اسەم بەينەلەي وتىرىپ, تاماشالاعان ادامنىڭ اسەرلى سەزىمدە سول اتموسفەرانى قابىلداۋىن جانە ەستە ساقتاۋىن كوزدەيدى. سۋرەتشى-پەيزاجيست كۇندەلىكتى قوزعالىستاعى قۇبىلىستىڭ ءبىر ساتكە ۋاقىتتى توقتاتىپ, سول ساتتەگى شەكسىز كەڭىستىكتىڭ ماڭگىلىك قۇندىلىعىن سەزىنۋگە مۇمكىندىك بەرەدى. سوندىقتان دا تابيعاتتىڭ تىلسىم قۇبىلىسىن كورۋ, سەزىنۋ جانە اسەرلى جەتكىزۋ – سۋرەتشى ءۇشىن ماڭىزدى ءسات» دەيدى سۋرەتشى كورمەسىنىڭ ەرەكشەلىگىمەن تانىستىرعان ونەرتانۋشى, مۋزەي پەداگوگيكاسى جانە ەكسكۋرسيا قىزمەتى ءبولىمىنىڭ جەتەكشىسى گۇلنار جۇبانيازوۆا.
مارات توتەەۆ پورترەتتىك جانردا دا ءوزىنىڭ ەرەكشەلىگىن تانىتادى. ول رەڭكتەر, تەكستۋرا, جارىق ارقىلى ادام كەلبەتىنىڭ ناقتىلىعىنا عانا ەمەس, بەينەنىڭ ىشكى الەمىن, سەزىمىن كورسەتۋگە ەرەكشە ءمان بەرەدى. شىعارماشىلىعىندا پورترەتتىك جۇمىستارى ارقىلى تاريح بەتىن قايتا پاراقتاۋعا ۇندەيتىن تۋىندىلارىنىڭ ءوزى ءبىر شوعىر. كورمەدە ءوز زامانىندا وزىق تۋعان, بىراق تاريحتا ەسىمى اتالماي قالعان بەلگىلى تۇلعالاردىڭ ءبىرى, اسكەري قىزمەت اتقارعان ەتنوگراف, تاريحشى عازى بولات ۇلى ءۋاليحاننىڭ, شوقان ءۋاليحانوۆتىڭ جۇبايى ايسارا كوشەنقىزىنىڭ پورترەتى قويىلعان. سۋرەتشى تاريحي تۇلعالاردىڭ بەينەسىن كەنەپ ۇستىندە كەسكىندەي وتىرىپ, سول ۋاقىت بەلەسىنىڭ اقيقاتىن كورسەتكىسى كەلەدى.
سۋرەتشى مارات مۇحامەدقالي ۇلىنىڭ تۋىندىلارى قىرعىزستان, تۇركيا, گەرمانيا, امەريكا, ءۇندىستان كوللەكتسيونەرلەرىنىڭ قورىنان ورىن الادى.
الماتى