14 قاڭتار كۇنى جەتىسۋ وبلىسى سارىوزەك گارنيزونىندا وقۋ-جاتتىعۋ كەزىندە سارباز داستان قۇرمانبەك مەرت بولعان ەدى. وسى وقيعاعا بايلانىستى قورعانىس مينيسترلىگى رەسمي تۇسىنىكتەمە بەردى, دەپ جازادى Egemen.kz.
ورتالىق كوممۋنيكاتسيالار قىزمەتى الاڭىندا وتكەن ءباسپاسوز ماسليحاتىندا قر قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-مايور مەرەكە كوشەكباەۆ اتالعان فاكتى بويىنشا قىلمىستىق ءىس قوزعالىپ, تەرگەۋ باستالعانىن ايتتى.
«قىزمەتتىك تەرگەۋ قورىتىندىسى بويىنشا قازانىڭ ىقتيمال سەبەبى قولباسشىلىقتىڭ قاراماعىنداعى جەكە قۇراممەن جۇمىس ىستەۋدە جەكەلەگەن ولقىلىقتاردىڭ بولۋى مۇمكىن دەگەن تۇجىرىم جاسادىق. قولباسشىلىق داستاننىڭ ىشكى الاڭداۋشىلىعىن ۋاقىتىندا بايقاي المادى, ياعني وعان مورالدىق جانە پسيحولوگيالىق قولداۋ كورسەتىپ, اسكەري قىزمەت جاعدايىنا بەيىمدەلۋىن انىقتاي المادى», دەدى قر قارۋلى كۇشتەرى قۇرلىق اسكەرلەرىنىڭ باس قولباسشىسى.
مەرەكە كوشەكباەۆتىڭ ايتۋىنشا, 8 قاڭتار كۇنى قاتارداعى جاۋىنگەر داستان قۇرمانبەك تۋرالى اقپارات العان. سودان سوڭ ءبولىم كومانديرى ونىمەن جەكە اڭگىمەلەسكەن.
«12 قاڭتاردا اتا-اناسى بولىمگە كەلدى جانە تەلەفونمەن سويلەستى. قولباسشىلىق داستاندى بوساتتى, ياعني كۇنى بويى داستان اتا-اناسىمەن بىرگە بولدى. اسكەري ۇجىم ىشىندەگى, ونىڭ ىشىندە وفيتسەرلەر, سەرجانتتار اراسىنداعى قارىم-قاتىناسقا بايلانىستى ەشقانداي پروبلەمالار بولعان جوق. تەرگەۋ مۇددەسىنە سايكەس وقيعانىڭ ەگجەي-تەگجەيىن ايتا المايمىن», دەدى مەرەكە كوشەكباەۆ.