قىزىلورداداعى مەكتەپتەردىڭ بىرىندە جالاقىدان بولەك ءوزىنىڭ ەسەپشوتىنا نەگىزسىز ارتىق قارجى اۋدارعان باس ەسەپشى 7 جىل ارقالادى, دەپ حابارلايدى Egemen.kz.
ارال اۋدانىنداعى №260 مەكتەپتىڭ باس ەسەپشىسى د.جاناليەۆ ءوزىنىڭ قىزمەتىن پايدالانىپ, 2023 جىلدىڭ قاڭتار ايى مەن 2024 جىلدىڭ تامىز ايى ارالىعىندا شتاتتىق كەستەگە سايكەس جالاقىدان بولەك ءوزىنىڭ ەسەپشوتىنا نەگىزسىز ارتىق قارجى اۋدارىپ, باس پايداسىنا جاراتىپ كەلىپتى.
قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ماماندارى سوتتالۋشىنىڭ بۇل ارەكەتى ءار اي سايىن قايتالانىپ وتىرعانىن انىقتاعان. ەڭبەك دەمالىسى كەزىندە دە ءوزىنىڭ ەسەپشوتىنا اقشا اۋدارىپ وتىرعان ەسەپشىنى تەرگەپ-تەكسەرۋ بارىسىندا ونىڭ قىلمىستىق ارەكەتى سالدارىنان مەملەكەتكە جالپى سوماسى 20 417 530 تەڭگە شىعىن كەلگەنى بەلگىلى بولدى.
سوت شەشىمىمەن باس ەسەپشى قازاقستان رەسپۋبليكاسىنىڭ قىلمىستىق كودەكسىنىڭ 189-بابى 4-بولىگى 2-تارماعىمەن كىنالى دەپ تانىلىپ, قارجىلىق ماتەريالدى جاۋاپتى قىزمەتپەن اينالىسۋ قۇقىعىنان 10 جىلعا ايىرىلىپ, 7 جىل مەرزىمگە باس بوستاندىعىنان ايىرىلدى. ول جازاسىن قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىندە وتەيتىن بولادى. سونداي-اق, مەملەكەتكە كەلتىرىلگەن 20 417 530 تەڭگە قاراجاتتى ۇكىم زاڭدى كۇشىنە ەنگەن سوڭ 2 اي مەرزىمدە ءوز ەركىمەن مەملەكەت پايداسىنا ءوندىرۋ جۇكتەلدى.