شەكارا شەبىندەگى شالعاي اۋدانداردىڭ حالقىن تۇراقتاندىرامىز دەسەك, ەڭ اۋەلى مەديتسينا سالاسى ساپالى بولۋعا ءتيىس. نەگە دەسەڭىز, كوپشىلىك ەم ىزدەپ قالا جاعالايدى. ءۇي-جايى ىڭعايلانسا, كوشىپ كەتىسەدى. ال ەم-دوم الۋ قولجەتىمدى بولسا, كوپشىلىك جىلى ورنىنان قوزعالا قويمايدى. وسى ورايدا وتكەن جىلى اۋدان مارتەبەسىن قايتا العان كاتونقاراعاي اۋدانىنىڭ مەديتسينا سالاسى ۇلگى ەتۋگە تۇرارلىق.
اۋدان ورتالىعىنداعى ءۇش قاباتتى اۋرۋحانادا تەراپيا, جۇقپالى اۋرۋلار, بالالار, حيرۋرگيا بولىمدەرى تاۋلىك بويى جۇمىس ىستەپ تۇر. ستاتسيونارىندا جىلىنا 2000-عا تاياۋ ناۋقاس ەمدەلەدى. بىرقاتار وپەراتسيانى جەدەل جاساۋعا دا مۇمكىندىك بار. ماسەلەن, سوقىرىشەك, اسقازاننىڭ تەسىلگەن ويىق جاراسى, جاتىردان تىس جۇكتىلىك سىندى وپەراتسيانى اۋرۋحانادا جاساي بەرەدى. جەدەل جاردەم ءبولىمى قىزمەتكەرلەرى 4-ساناتتاعى شاقىرتۋلارعا, وزدەرى حابارلاسقان ناۋقاستارعا تاۋلىك بويى, دەمالىس, مەرەكە كۇندەرى مەديتسينالىق قىزمەت كورسەتەدى.
اۋداندىق اۋرۋحانانىڭ باس دارىگەرى گۇلميرا ساكەنوۆا ءمالىم ەتكەندەي, اۋىل حالقىنا كورسەتىلەتىن مەديتسينالىق قىزمەتتەرىنىڭ ساپاسىن ارتتىرۋ ماقساتىندا قابىرعا, جاڭاۇلگى, قايىڭدى, ورنەك, اقمارال, قىزىل جۇلدىز اۋىلدارىنىڭ مەديتسينالىق پۋنكتتەرىنە كۇردەلى جوندەۋ جۇرگىزىلدى. سونىمەن قاتار «اۋىلداعى دەنساۋلىق ساقتاۋدى جاڭعىرتۋ» قاناتقاقتى ۇلتتىق جوباسى اياسىندا بارلىق اۋىلىندا زاماناۋي ستاندارتتارعا ساي جاڭا مەديتسينالىق پۋنكتتىڭ قۇرىلىسى ءجۇرىپ جاتىر. ەڭبەك, ارشاتى, جازابا اۋىلدارىنداعى مەدپۋنكتتەرگە دە كۇردەلى جوندەۋ قاجەت. رەتى كەلسە, قايتا سالعان دۇرىس دەپ ەسەپتەيدى باس دارىگەر.
– مۇمكىندىگىمىزگە قاراي الىس اۋىلدارداعى تۇرعىندارعا دا كومەك كورسەتىپ كەلەمىز. كاتونقاراعاي ايماعىندا تىركەلگەن حالىق سانى 9 104 ادامدى قۇرايدى, مەكەمەنىڭ قىزمەت كورسەتۋ راديۋسى – 120 شاقىرىم. تۇرعىندار تاراپىنان ەشقانداي ارىز-شاعىم جوق, – دەيدى گ.ساكەنوۆا.
اۋدانداعى مەديتسينالىق كومەك كورسەتۋگە ارنالعان ەمدەۋ, الدىن الۋ مەكەمەلەرىنە ورتاق, تاۋلىك بويى جۇمىس ىستەيتىن 40 توسەككە, كۇندىزگى ستاتسيونارلىق 30 توسەككە ارنالعان اۋرۋحانا بار. سونىمەن قاتار اقسۋ, ورەل, اققاينار اۋىلدارىندا دارىگەرلىك امبۋلاتوريا جۇمىس ىستەپ تۇر. باسقا دا اۋىلداردا 17 مەديتسينالىق پۋنكت بار. 3 دارىگەرلىك امبۋلاتوريا سانيتارلىق اۆتوكولىكتەرمەن قامتاماسىز ەتىلگەن. الايدا اۆتوكولىكتىڭ بىرقاتارى ۇزاق جىل بويى قولدانىستا بولعاندىقتان, تەحنيكالىق جاعدايىن قالىپتى ۇستاپ وتىرۋدا ۇلكەن قارجىلىق شىعىندار بار ەكەنىن العا تارتادى باس دارىگەر.
مەكەمەدەگى 23 دارىگەردىڭ تورتەۋى جوعارى ساناتتى. قوسىمشا حيرۋرگ, رەنتگەنولوگ, وكۋليست, اكۋشەر-گينەكولوگ, ينفەكتسيونيست سىندى ماماندار قاجەت. باس دارىگەردىڭ ايتۋىنشا, رەنتگەنولوگ قاشىقتان جۇمىس ىستەۋگە ءماجبۇر بولىپ وتىرسا, اكۋشەر-گينەكولوگ دارىگەرى زەينەت دەمالىسىندا.
– مامان تاپشىلىعى بار. ماسەلەنى شەشۋ, اۋىلدىق ەلدى مەكەندەرگە جاس مامانداردى جۇمىسقا تارتۋ ءۇشىن اۋرۋحانا جانىنان ەكى پاتەرلى تۇرعىن ءۇي, ءبىر رەتتىك قارجىلاي كومەك بەرىلەدى. «ديپلوممەن اۋىلعا» كەلەمىز دەگەن ماماندارعا ەسىگىمىز اشىق, – دەيدى باس دارىگەر.
اۋرۋحانا قاجەتتى مەديتسينالىق جابدىقتارمەن قامتاماسىز ەتىلگەن. وتكەن جىلى وبلىس بيۋدجەتى ەسەبىنەن بولىنگەن 29 ملن 422 983 تەڭگەگە جاڭادان 6 دانا مەديتسينالىق اپپارات, اتاپ ايتقاندا, 12 ارنالى ەلەكتروكارديوگراف, قان قىسىمىن باقىلاۋ جۇيەسى, حولتەر, اۋديو-سمارت, سپيرومەتر, فەتالدى مونيتور ساتىپ الىندى. سونىمەن قاتار ءسۇت بەزى وبىرىنىڭ قاتەرلى ىسىگىن ەرتە انىقتاۋعا باعىتتالعان شارالاردى جۇزەگە اسىراتىن اۆتوماتتى رەنتگەنمامموگرافيالىق اپپاراتى مەن وعان قاجەتتى تسيفرلىق جۇيە ورناتىلعان. بيىلعى جىلى دا قاجەتتى مەديتسينالىق قۇرال-جابدىقتارمەن, قوندىرعىلارمەن قامتاماسىز ەتۋدى جالعاستىرۋ كوزدەلىپ وتىر.
اۋرۋحانادا كونسۋلتاتيۆتىك دياگنوستيكالىق قىزمەتتەر دە جولعا قويىلعان. مۇندا نەۆروپاتولوگ, ەندوكرينولوگ, ستوماتولوگ, پروفپاتولوگ, حيرۋرگ, ونكولوگ, پسيحياتر-ناركولوگ, ينفەكتسيونيست, دەرماتوۆەنەرولوگ ماماندار قىزمەت كورسەتەدى. ماماندار ايىنا 3 مىڭنان استام قابىلداۋ جۇرگىزەدى.
اۋرۋحانا بازاسىنداعى زەرتحانادا گەماتولوگيالىق, بيوحيميالىق, ميكروبيولوگيالىق, يممۋنولوگيالىق, جالپى كلينيكالىق زەرتتەۋلەر جۇرگىزىلەدى. قان, ونىڭ كومپونەنتتەرىن قۇيۋ كابينەتى دە جۇمىس ىستەپ تۇر. مۇندا جىلىنا 15-تەن ارتىق ادامعا قان, 250 دەن استام ادامعا قان الماستىرعىشتار قۇيىلادى. اۋرۋحانادا وڭالتۋ قىزمەتتەرى دە بار. ارنايى ءبىلىمدى مەديتسينا قىزمەتكەرلەرى ماسساج عانا ەمەس, ەمدىك-فيزيكالىق جاتتىعۋ تەراپياسىن دا وتكىزەدى. بىراق ارنايى ترەناجەرلار, سپورتتىق قۇرال-جابدىقتار, پسيحو-فيزيكالىق كۇيدى جاقسارتاتىن كابينەتتەر قاراستىرىلماعان.
ەڭ نەگىزگى ماسەلەنىڭ ءبىرى – تۇكپىردەگى اۋىلداردا ينتەرنەتتىڭ جوقتىعى نەمەسە السىزدىگى. سونىڭ سالدارىنان حالىققا كورسەتىلگەن مەديتسينالىق دەرەكتەردى تولتىرۋ ءۇشىن قىزمەتكەرلەر اپتاسىنا ءۇش رەت كاتونقاراعاي اۋىلىنا كەلىپ-كەتۋگە ءماجبۇر. قورىتا ايتقاندا, اۋداندا حالىقتىڭ دەنساۋلىعىن ساقتاۋ باعىتىنداعى جۇيەلى جۇمىستار تىنىمسىز اتقارىلىپ جاتىر.
شىعىس قازاقستان وبلىسى,
كاتونقاراعاي اۋدانى