كولىك مينيسترلىگىنىڭ حابارلاۋىنشا الماتى-قاسكەلەڭ تاس جولى كەڭەيتىلىپ, جول بويىندا بەس كولىك ەستاكاداسى مەن ون ەكى جاياۋ جۇرگىنشىلەرگە ارنالعان اسپالى كوپىر سالىنادى.
بۇل جوبا الماتى اگلومەراتسياسىنداعى كولىك اعىنىن جەڭىلدەتۋ جانە جول قوزعالىسى قاۋىپسىزدىگىن ارتتىرۋ ماقساتىندا جۇزەگە اسىرىلىپ وتىر. اسىرەسە, بۇل باعىتتاعى تۇرعىندار سانىنىڭ كوبەيۋىنە بايلانىستى كولىك قوزعالىسىنىڭ جۇكتەمەسى ايتارلىقتاي ارتقان.
ەسكە سالا كەتەيىك, بۇعان دەيىن الماتى اكىمدىگى 2025 جىلى قالادا شامامەن 300 كم جولعا جانە 30 كم جاياۋ جۇرگىنشىلەر جولىنا جوندەۋ جۇمىستارىمەن 35 كم جاڭا جول سالۋ جوسپارلانعانى تۋرالى ايتقان بولاتىن.
الماتى قالالىق موبيلدىلىك باسقارماسىنىڭ مالىمەتىنشە, 2025 جىلى قالادا شامامەن 300 كم جولعا جانە 30 كم جاياۋ جۇرگىنشىلەر جولىنا جوندەۋ جۇمىستارىمەن 35 كم جاڭا جول سالۋ جوسپارلانعان.
جاڭا جولدار جاس قانات, شۇعىلا, المەرەك, اقجار, راحات, مادەنيەت جانە بورالداي شاعىن اۋداندارىندا سالىنادى. بۇل الماتىعا قوسىلعان اۋماقتاردا تۇراتىن 70 مىڭنان استام تۇرعىننىڭ كولىك قاتىناسىن جاقسارتادى.
الماتى اكىمدىگىنىڭ مالىمەتىنشە, 2025 جىلى الماتىدا بىرنەشە ماڭىزدى جوبانىڭ قۇرىلىسى اياقتالادى:
سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جولايىرىق;
ساين كوشەسىن رىسقۇلوۆ داڭعىلىنان اقىن سارا كوشەسىنە دەيىن ۇزارتۋ;
اباي داڭعىلىن قالانىڭ شەكاراسىنا دەيىن ۇزارتۋ;
اباي داڭعىلىن ب.مومىش ۇلى كوشەسىنەن قالانىڭ شەكاراسىنا دەيىن ۇزارتۋ جۇمىستارى مامىر ايىندا اياقتالادى. ۇزىندىعى 5,3 كم بولاتىن بۇل التى جولاقتى جولدا جاياۋ جۇرگىنشىلەر مەن ۆەلوسيپەد جولدارى قاراستىرىلعان.
جاز مەزگىلىندە ساين كوشەسىنىڭ رىسقۇلوۆ داڭعىلىنان اقىن سارا كوشەسىنە دەيىنگى بولىگىن ۇزارتۋ جۇمىستارى اياقتالادى. ۇزىندىعى 3,2 كم بولاتىن بۇل مومىش ۇلى كوشەسىندەگى كولىك جۇكتەمەسىن 40%-عا ازايتۋعا مۇمكىندىك بەرەدى.
ماۋسىم ايىندا جانسۇگىروۆ كوشەسى مەن سەيفۋللين داڭعىلىنىڭ قيىلىسىنداعى جولايىرىقتىڭ قۇرىلىسى تولىعىمەن اياقتالادى. سونىمەن قاتار, جولايىرىق ماڭىنداعى اۋماقتى اباتتاندىرۋ جۇمىستارى دا جۇرگىزىلەدى.