ءادىلحان – «Apple» باسشىلىعىندا

ءسۇيىنشى جاڭالىقتى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ءوزىنىڭ Facebook پاراقشاسىندا مالىمدەدى.

«وتانداسىمىز, digital nomad ءادىلحان قوپاباەۆ «Apple» كومپانياسىنا جەتەكشى قىزمەتكە تاعايىندالعانىن قۋانا حابارلايمىن. ەندى ءادىلحان ورتالىق ازيا جانە ارمەنيا ايماعىن قاداعالايتىن بولادى. بۇل جاڭا كەزەڭ وعان كوپتەگەن جەتىستىك پەن كاسىبي ءوسۋ اكەلسىن», دەلىنگەن مينيستر جازباسىندا.

وسىلايشا, ءادىلحان «Apple» كومپا­نيا­سىندا جەتەكشى قىزمەتكە تاعايىن­دالعان تۇڭعىش قازاق اتاندى. ول ەندى قىزمەتىن دۋبايداعى كەڭسەدە اتقارادى.

ايتا كەتەيىك, ءا.قوپاباەۆ 2017 جىلى وڭتۇستىك كورەياداعى ۋلسان ۇلت­تىق عىلىم جانە تەحنولوگيا­لار ينستيتۋتىن (UNIST) «قالا ينجەنە­رى جانە تەحنولوگيالىق مەنەدجمەنت» ما­ماندىعى بويىنشا ۇزدىك تامام­داعان. بەدەلدى UNIST Global Uni-Star ستيپەن­دياسىنىڭ يەگەرى. 2021 جىلى اقش-تىڭ پروۆيدەنس قالاسىنداعى براۋن ۋنيۆەرسيتەتىندە مەملەكەتتىك باسقارۋ ماگيسترى اتانىپ, روكفەللەر قورىنىڭ ستيپەندياسىن جەڭىپ الدى.

ال ەڭبەك جولىنا توقتالساق, «Apple» كومپانياسىنا دەيىن ول حالىقارالىق كونسالتينگتىك جانە IT-كومپانيالاردا قىزمەت اتقارعان. 2023 جىلدان باستاپ ەنەرگەتيكا مينيسترلىگىنە قاراستى «مۇناي جانە گاز اقپاراتتىق-تالداۋ ورتالىعىن» باسقاردى. سونىمەن قاتار مۇناي-گاز سالاسىنىڭ «جاعدايلىق-تالداۋ ورتالىعى» باسقارماسىنىڭ تور­اعاسى بولدى. ال 2024 جىلى پرەزيدەنت جانىنداعى جاستار ساياساتى كەڭەسىنىڭ قۇرامىنا ەندى. ءادىلحاننىڭ جاڭا بەلەسى – ەلىمىزدەگى مامانداردىڭ حالىقارالىق دەڭگەيدە جوعارى باعالانۋىنىڭ ايقىن كورىنىسى. ونىڭ بۇل قىزمەتىنە تەك تابىس تىلەيمىز.