بالالارعا قوسىمشا سپورتتىق, شىعارماشىلىق ءبىلىم بەرىپ, ولاردىڭ قارىم-قابىلەتىن ۇشتاۋ ماقساتىندا قولعا الىنعان «ارتسپورت» باعدارلاماسىنىڭ اينالاسىنداعى اڭگىمە تاۋسىلار ەمەس. بىلتىر قىزىلوردا وبلىسىندا ءتۇرلى ايلامەن مەملەكەت قارجىسىن قالتاعا باسقانداردىڭ قۋلىعى اشكەرەلەنىپ, ءبىراز كاسىپكەر العانىن قايتارىپ, جۇمىسىن توقتاتقاندارى دا بولىپ ەدى. بۇگىندە وبلىس پروكۋرورىنىڭ وكىمىمەن قۇقىق قورعاۋ, جەرگىلىكتى اتقارۋشى, ۋاكىلەتتى ورگانداردىڭ وكىلدەرىنەن قۇرىلعان جۇمىس توبى بۇل ماسەلەنى ءجىتى قاداعالاپ وتىر.
سوڭعى 3 جىلدا وبلىستىق بيۋدجەتتەن مەملەكەتتىك تاپسىرىس اياسىندا شىعارماشىلىق ۇيىرمەلەر مەن سپورتتىق سەكتسيالارعا 11,6 ملرد تەڭگە ءبولىنىپ, يگەرىلىپتى. وسى قارجىنى جۇمساعاندار اراسىندا شىعارماشىلىق ۇيىرمەلەردىڭ ۇلەسى باسىم. باعدارلاما اياسىندا جۇمىس ىستەيتىن كاسىپكەرلەردى تەكسەرۋدى قاراجات كوپ بولىنگەن قىزىلوردا قالاسى, شيەلى, جاڭاقورعان, سىرداريا اۋداندارىنان باستاعان توپ ءبىراز بىلىقتىڭ بەتىن اشتى.
تەكسەرۋ كەزىندە باسىنداعى ءۇيىن – ۇيىرمە, اۋلاسىنداعى سارايىن – سەكتسيا رەتىندە تىركەپ, اقشا الىپ كەلگەندەر انىقتالىپتى. ءتىپتى, قاعازدا بار ۇيىرمەگە 200 شاقىرىم قاشىقتاعى وزگە اۋدان وقۋشىلارىن, باسقا وبلىستاعى بالالاردى «قاتىستىرىپ» قويعاندار دا بار. ءبىر بالانىڭ بىرنەشە كاسىپكەردىڭ ەسەبىندە جۇرگەنى ءوز الدىنا بولەك اڭگىمە.
توپ وكىلدەرى جاڭاقورعان اۋدانىنداعى 19 كاسىپكەردىڭ جۇمىسىن سارالاپ, ولاردىڭ 127,2 ملن تەڭگە مەملەكەت قاراجاتىن زاڭسىز يەمدەنگەنىن انىقتادى. ونىڭ 106,1 ملن تەڭگەسى مادەنيەتكە, ال 21,1 ملن تەڭگەسى سپورت سالاسىنا تيەسىلى بولىپ وتىر. وسى باسقارمالار باسشىلارى 125 كاسىپكەرمەن كەلىسىم-شارتتى بىرجاقتى بۇزىپ, ونىڭ ىشىندە 55 كاسىپكەر جۇمىسىن توقتاتتى. قازىر ولاردىڭ قۋلىقپەن قالتاعا باسقان قاراجاتى قايتارىلىپ جاتىر.
«پروكۋراتۋرا كاسىپكەرلەر قۇقىعىن قورعايتىن باستى ورگاننىڭ ءبىرى. ءبىز ولاردىڭ جولىنداعى ءتۇرلى كەدەرگىلەردى جويۋعا كۇش سالىپ كەلەمىز. بىراق مەملەكەت قارجىسىن ءتۇرلى ايلا-شارعىمەن يەمدەنبەك بولعاندارعا توسقاۋىل قويۋعا ءتيىسپىز. مىسالى, تەكسەرۋ كەزىندە شيەلى اۋدانىندا بۇرىنعى مەكتەپ ديرەكتورىنىڭ بالالارىنىڭ اتىنا تىركەلگەن مەكەمەلەر ارقىلى مەملەكەتتىك سپورتتىق, شىعارماشىلىق تاپسىرىسقا جالعان قۇجاتتار ۇسىنىپ, بيۋدجەتكە 13,3 ملن تەڭگە شىعىن كەلتىرگەنى بەلگىلى بولدى. جالپى, ۇيىرمەلەرگە قاتىسپاعان 2 مىڭنان استام بالا انىقتالدى. سونىڭ كەسىرىنەن بيۋدجەت قارجىسىن مايشەلپەك قىلعىسى كەلگەندەر مەملەكەتكە 450 ملن تەڭگەگە جۋىق زالال كەلتىرگەن. بۇگىنگى كۇنگە كاسىپكەرلەر 48 ملن تەڭگەنى قايتاردى», دەيدى وبلىس پروكۋرورى ريزابەك وجاروۆ.
«دامۋ بالا» پلاتفورماسىنا تىركەلگەندەر اراسىنان 5 740 بالانىڭ اتا-اناسى تىزىمدەگىلەردىڭ شىن مانىندە شىعارماشىلىق ۇيىرمەلەر مەن سپورتتىق سەكتسيالارعا قاتىسپايتىنىن راستاپ وتىر. جالپى, ءونىم بەرۋشىلەر تاراپىنان 13 731 بالا تىزىمنەن الىنىپ تاستالدى. وسىنداي فاكتىلەرگە بايلانىستى قىزىلوردا وبلىسى بويىنشا سىبايلاس جەمقورلىققا قارسى قىزمەتى قىلمىستىق كودەكستىڭ 190-بابى بويىنشا سوتقا دەيىنگى تەرگەپ-تەكسەرۋدى باستادى.
قىزىلوردا