وبلىستاعى جاڭا اۋدانداردىڭ ءبىرى جاڭاسەمەي اۋدانىندا تۇرعىن ۇيلەردىڭ قۇرىلىسى قارقىن الىپ كەلەدى. اۋدان باسشىسى الماس تاستەنبەكوۆ ءمالىم ەتكەندەي, جەرگىلىكتى تۇرعىنداردىڭ الەۋمەتتىك جاعدايىن جاقسارتۋعا باعىتتالعان بىرقاتار ماڭىزدى جۇمىس جوسپارعا سايكەس جۇزەگە اسىرىلىپ جاتىر.
بۇگىندە شاعان كەنتىندە جالپى اۋدانى 336 شارشى مەتر بولاتىن تۇرعىن ۇيلەردىڭ قۇرىلىسى اياقتالۋعا جاقىن. «تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023–2029 جىلدارعا ارنالعان مەملەكەتتىك باعدارلاماسى» شەڭبەرىندە كەنتتە حالىقتىڭ الەۋمەتتىك وسال توپتارىنان شىققان ازاماتتارعا 4 پاتەر ساتىپ الۋ جوسپارلانعان. جاڭا اۋداندا تۇرعىن ءۇي الۋ كەزەگىندە 83 ادام تۇرسا, 4 وتباسى وسى كەنت تۇرعىندارى.
كەنتتەگى №24 نەگىزگى جالپى ءبىلىم بەرەتىن مەكتەپتىڭ وقۋ ۇدەرىسىندە وزىق ادىستەمەلىك قۇرالدار پايدالانىلادى. سونداي-اق اقپاراتتىق تەحنولوگيالارعا قولجەتىمدىلىكتى قامتاماسىز ەتەتىن IT كابينەت اشىلعان. تۇرعىندار الداعى ۋاقىتتا جاڭا, زاماناۋي مەكتەپ بوي كوتەرسە دەيدى. كەنت اكىمى يرينا پوپوۆانىڭ ايتۋىنشا, مەكتەپ سالىنىپ جاتسا, قالاعا قاتىناپ وقيتىن بالالار ءوز اۋىلىندا ءبىلىم الۋعا بەيىل.
شاقامان اۋىلىندا دا تۇرعىن ءۇي قۇرىلىسى ماسەلەسى ويداعىداي شەشىمىن تاۋىپ كەلەدى. 2024 جىلى جالپى اۋدانى 504 شارشى مەتر بولاتىن 6 پاتەر ساتىپ الىندى. قازىرگى ۋاقىتتا ۇيلەردى ەلەكتر جەلىلەرىنە قوسۋ جۇمىسى ءجۇرىپ جاتىر. بۇل پاتەرلەر الەۋمەتتىك وسال توپتاعى ازاماتتارعا بەرىلەدى. شاقامان اۋىلىندا 8 وتباسى تۇرعىن ءۇي كەزەگىندە تۇر.
اباي وبلىسى