ىرىكتەۋ ءتۋرنيرىنىڭ جەرەبەسى تارتىلدى

العاشقى التى توپتا («A»-دان «F»-قا دەيىن) ءتورت, ال قالعان التاۋىندا («G»-دان «L»-عا دەيىن) بەس كوماندا باق سىنايدى. ءار توپتا كوش باستاعان ۇلتتىق قۇرامالار دۇنيەجۇزىلىك دوپ دوداسىنا قاتىسۋ مۇمكىندىگىنە بىردەن يە بولسا, ەكىنشى ورىن العان 12, ۋەفا ۇلتتار ليگاسىندا وزىپ شىققان 4 كوماندا قالعان ءتورت جولداماعا تالاسادى. ەۋروپاعا بولىنگەن جولدامالاردىڭ جالپى سانى – 16.

ەلىمىزدىڭ قۇراماسى J توبىنا ءتۇستى. قارسىلاستارىمىز – بەلگيا, ۋەلس, سولتۇستىك ماكەدونيا, ليحتەنشتەين. بۇل توپتىڭ باستى ءفاۆوريتى بەلگيالىقتار ەكەنى ءسوزسىز. «قىزىل سويقاندار» حح عاسىردىڭ باسىندا پاريج وليمپياداسىندا قولا, انتۆەرپەندەگى ويىنداردا التىن مەدالدى ولجالاپ, وزدەرىنىڭ مىقتىلىعىن مويىنداتتى. ودان كەيىنگى تابىستارىنا كەلەر بولساق, 1986 جىلى مەكسيكادا وتكەن الەم چەمپيوناتىندا ءتورتىنشى ورىنعا تابان تىرەسە, 2018 جىلى رەسەيدە جالاۋى جەلبىرەگەن ءدۇبىرلى دوپ دودادا قولاعا قول سوزدى. سونداي-اق 1972 جىلعى ەۋروپا بىرىنشىلىگىندە قولا السا, 1980 جىلعى قۇرلىقتىڭ باس­تى باسەكەسىندە كۇمىسپەن كۇپتەلدى. بۇگىنگى تاڭدا بەلگيانىڭ نامىسىن قورعاپ جۇرگەن اكسەل ۆيتسەل, كەۆين دە بريۋينە, رومەلۋ لۋكاكۋ, يوحان باكايوكو, لەاندرو تروسسارد, ساميۋەل مبانگيۋلا, يۋري تەلمانس سىندى فۋتبولشىلار قارت قۇرلىقتىڭ ەڭ بەلدى كلۋبتارىندا ونەر كورسەتەدى. سول سەبەپتى دە كوپشىلىك دومەنيكو تەدەسكو باپتاعان كوماندانى وسى توپتىڭ باستى ءفاۆوريتى دەپ ەسەپتەيدى.

سوڭعى جىلدارى ۋەلس قۇرا­ماسى حالىقارالىق ارەنادا جاقسى ويىن ورنەگىن كورسەتىپ جۇرگەنى بەلگىلى. العاش رەت ولار 1958 جىلى شۆەتسيادا ۇيىمداستىرىلعان الەم چەمپيوناتى مەن 1976 جىلى يۋگوسلاۆيادا شىمىلدىعى تۇ­رىلگەن قۇرلىق بىرىنشىلىگىندە شيرەك فينالعا دەيىن جەتىپ, ءوز جانكۇيەرلەرىنىڭ قۇرمەتى مەن قوشەمەتىنە بولەندى. سودان كەيىن ۋەلس فۋتبولىندا توقىراۋ كەزەڭى باستالدى. ول بىرازعا دەيىن سوزىلدى. ساۋاتتى جاسالىپ, جوس­پارلى تۇردە جۇزەگە اسىرىلعان رەفورمانىڭ ارقاسىندا ولار تىعىرىقتان شىعۋدىڭ جولىن تاپتى. ناتيجەسىندە, 2016 جىلى فرانتسيادا وتكەن ەۋروپا چەمپيوناتىندا گارەت بەيل باستاعان سايىپ­قىراندار قولا مەدالدى يەلەندى. نەبارى 3 ميلليوننان ءسال عانا اساتىن حالقى بار شاعىن عانا مەملەكەتكە وسىنىڭ ءوزى وراسان زور تابىس.

سولتۇستىك ماكەدونيانى مىق­تىلاردىڭ قاتارىنا جاتقىزا الماساق تا, ولاردىڭ تاريحى ءبىزدىڭ ەلگە قاراعاندا الدەقايدا ءتاۋىر. بۇل ەل دە تاۋەلسىزدىگىن 1991 جىلى الدى. 1994 جىلدان بەرى فيفا مەن ۋەفا-نىڭ مۇشەسى. بالقان تۇبەگىنىڭ تۇلەكتەرى «ەۋرو-2020» دوپ دوداسىنا قاتىستى. ىرىكتەۋ تۋرنيرىندە «قىزىل سىلەۋسىندەر» ءۇشىنشى ورىن الدى. پولشا مەن اۋستريادان قالىپ قويعان ولار سلوۆەنيا, يزرايل, لاتۆيانى ارتتا قالدىردى. پلەي-وفف سايىس­تارىندا كوسوۆو مەن گرۋزياعا سان سوقتىردى. 2022 جىلى سولتۇستىك ماكەدونيا فۋتبولشىلارىنىڭ قاتارعا بارۋعا تاماشا مۇمكىندىگى بولدى. ىرىكتەۋ باسەكەلەرىندە گەر­مانيانى العا جىبەرگەنىمەن, رۋمىنيا, يسلانديا, ارمەنيا, ليحتەنشتەينگە سان سوقتىردى. پلەي-وففتىڭ جارتىلاي فينالىندا اتاعى الىسقا جايىلعان يتاليانىڭ اياقدوپ شەبەرلەرىنەن ايلاسىن اسىردى. بىراق شەشۋشى تۇستا پورتۋگاليانىڭ وسال تۇسىن تابا المادى. ءسويتىپ, «مۋنديالدان» شەت قالدى. ليحتەينشتەين جايىندا كوپ اڭگىمەلەۋدىڭ قاجەتى جوق. نەبارى 160 شارشى شاقىرىم جەرى, 40 مىڭداي حالقى بار شاعىن عانا ەلدىڭ وكىلدەرى قانداي جارىسقا قاتىسسا دا, جەڭىلىستەن باس كوتەرە الماي ءجۇر.

ەلىمىزدىڭ ۇلتتىق قۇراماسى بۇعان دەيىن الەم چەمپيوناتىنىڭ ىرىكتەۋ تۋرنيرلەرىنىڭ بەسەۋىنە قاتىستى (2006, 2010, 2014, 2018, 2022). وكىنىشكە قاراي, سونىڭ بىردە-بىرەۋىندە جولىمىز بولمادى. شىنى كەرەك, وتاندىق اياقدوپ شەبەرلەرىنىڭ ءوز جانكۇيەرلەرىن قۋانتقان كەزدەرى تىم سيرەك.

تاعى ءبىر ايتا كەتەرلىك جايت, ىرىكتەۋ تۋرنيرىندەگى قارسىلاس­تا­رىمىزدىڭ دەنى الەمدىك رەي­تين­گىندە جەرلەستەرىمىزدەن ەداۋىر جو­عارى تۇر. فيفا-نىڭ تىزىمىندە بەلگيا – 8, ۋەلس – 29, سولتۇستىك ما­كە­دونيا – 67-ورىندا. ەلىمىز 110-ورىندى قاناعات تۇتسا, ليح­تەين­ش­تەين 204-ساتىعا تابان تىرەپ تۇر.

وزگە توپتاردا مىنا كوماندالار ءوزارا شەبەرلىك بايقاسادى: ا توبى – گەرمانيا/يتاليا, سلو­ۆاكيا, سولتۇستىك يرلانديا, ليۋك­سەمبۋرگ. ۆ توبى – شۆەيتساريا, شۆەتسيا, سلوۆەنيا, كوسوۆو. س تو­بى – پورتۋگاليا/دانيا, گرەكيا, شوتلانديا, بەلارۋس. D توبى – فرانتسيا/حورۆاتيا, ۋكراينا, يسلانديا, ازەربايجان. ە توبى – يسپانيا/نيدەرلاند, تۇركيا, گرۋزيا, بولگاريا. F توبى – پور­تۋگاليا/دانيا, ماجارستان, ير­لانديا, ارمەنيا. G توبى – يس­پانيا/نيدەرلاند, پولشا, فين­ليانديا, ليتۆا, مالتا. H توبى – اۋستريا, رۋمىنيا, بوسنيا مەن گەرتسەگوۆينا, كيپر, سان-مارينو. I توبى – گەرمانيا/يتاليا, نورۆەگيا, يزرايل, ەستونيا, مولدوۆا. ك توبى – انگليا, سەربيا, البانيا, لاتۆيا, اندوررا. L توبى – فرانتسيا/حورۆاتيا, چەحيا, چەرنوگوريا, فارەر ارالدارى جانە گيبرالتار.

جوعارىداعى تىزىمدە كەيبىر توپتاعى كوماندالار قوسارلانىپ جازىلىپ تۇر. سەبەبى ولاردىڭ ناقتى قاي توپتا ونەر كورسەتەتىنى ءالى بەلگىسىز. ونىڭ جاۋابى كەلەسى جىلدىڭ كوكتەمىندە ۋەفا ۇلتتار ليگاسى باسەكەسى اياقتالعاننان كەيىن بەلگىلى بولادى.

الەم چەمپيوناتىنىڭ ىرىكتەۋ ءتۋرنيرى 2025 جىلدىڭ كوكتەمىندە باستالىپ, قوڭىر كۇزدە اياقتالادى. پلەي-وفف باسەكەلەرى 2026 جىلدىڭ ناۋرىزىندا وتەدى. سول جىلدىڭ 11 ماۋسىمى مەن 19 شىلدەسى ارالىعىندا دۇنيەجۇزىلىك دوپ دوداسىنىڭ جالاۋى جەلبىرەيدى. بۇل باسەكەلەردى اقش-تىڭ 11, مەكسيكانىڭ 3, كا­نادانىڭ 2 قالاسى قابىلدايدى. ولار – مەحيكو, گۆادالاحارا, مون­تەررەي (مەكسيكا), تورونتو, ۆان­كۋۆەر (كانادا), نيۋ-يورك, فيلا­دەلفيا, بوستون, اتالانتا, مايامي, حيۋستون, داللاس, لوس-اند­­جەلەس, سان-فرانتسيسكو, كانزاس-سيتي, سيەتل (اقش).