اقمولا وبلىسىندا تاۋلىك بويى بايلانىسقا شىقپاعان بالىقشىلار قۇتقارىلدى, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنىڭ حابارلاۋىنشا, 8 قاڭتاردا جاقسى اۋدانى تەرىساققان اۋىلىندا ءتورت بالىقشى بالىق اۋلاۋعا كەتىپ, قايتا ورالماعان. ولار 24 ساعات بويى بايلانىسقا شىقپاعان.
«ىزدەستىرۋ جۇمىستارىن توتەنشە جاعدايلار مينيسترلىگى, پوليتسيا جانە جەرگىلىكتى اتقارۋشى ورگاندار جۇرگىزدى. قۇتقارۋ جۇمىستارىنا جاۋعان قار كەدەرگى كەلتىردى. ارنايى تەحنيكا, ك700 تراكتورى ارقىلى بالىقشىلارعا جەتىپ, جولدى قاردان تازارتۋعا تۋرا كەلدى», دەلىنگەن حابارلامادا.
بەلگىلى بولعانداي, بالىقشىلار كولىگى جارتىلاي مۇزعا قۇلاپ كەتكەن.
ەستەرىڭىزگە سالا كەتەيىك, بۇعان دەيىن قازاقستاننىڭ تاس جولدارىندا بيىلعى جىلدىڭ العاشقى كۇندەرىندە 200-گە جۋىق ادام قار قۇرساۋىنان قۇتقارىلعان ەدى.