بىلتىر 6 قىركۇيەكتە مۇنايلى اۋدانىنداعى №8 مەكتەپتە وقۋشىلار استان جاپپاي ۋلانىپ, 460 بالا اۋرۋحاناعا تۇسكەن ەدى. وبلىس پوليتسياسى وسى ىسكە قاتىستى تەرگەۋ اياقتالىپ, قىلمىستىق ءىس مۇنايلى اۋداندىق سوتىنا جولدانعانىن ءمالىم ەتتى, دەپ جازادى Egemen.kz.
«مەكتەپ اسحاناسىنىڭ مەڭگەرۋشىسى دامەتكەن شاكەنوۆا قر قىلمىستىق كودەكستىڭ 304-بابى «ادامداردىڭ جاپپاي اۋرۋعا نەمەسە ۋلانۋىنا اكەپ سوققان سانيتارلىق ەرەجەلەردى نەمەسە گيگيەنالىق نورماتيۆتەردى بۇزۋ» بويىنشا ايىپتالىپ وتىر. جەكە كاسىپكەر سوت بارىسىندا ەشقايدا كەتپەۋ جونىندە قولحاتپەن ۇيىنە جىبەرىلدى», دەلىنگەن حابارلامادا.
تەكسەرۋ ناتيجەسىندە مەكتەپ اسحاناسىنان ىشەك باكتەريالارى انىقتالىپ, 12 قىزمەتكەردەن ستافيلوكوكك تابىلعان. ال ىدىس جۋشى ديزەنتەريانى تاسىمالداۋشى بولىپ شىققان. ەندى كاسىپكەرگە ايىپپۇل سالىنۋى نەمەسە ەكى جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
ايتا كەتەيىك, ايىپتالۋشى جەكە كاسىپكەر وسى مەكتەپتى 10 جىلدان بەرى ىستىق تاعاممەن قامتاماسىز ەتىپ كەلگەن.