قايىرىمدىلىق جاساۋ كومپانيا نازارىندا

جاقىندا «KAZ Minerals Aktogay» كومپانياسى جاڭا جىلدىق مەرەكە قارساڭىندا اقتوعاي كەنتىنىڭ, قوپا جانە تارلاۋلى اۋىلدارىنىڭ از قامتىلعان, كوپ بالالى جانە تولىق ەمەس وتباسىلارىنان شىققان 1249 بالاعا جاڭا جىلدىق سىيلىقتار تابىستادى. بۇعان قوسا اقتوعاي كەنتىنىڭ اۋىلدىق كلۋبىندا ورنالاسقان شىرشانى بەزەندىرۋ جۇمىستارانى بەلسەنە قاتىسىپ, شىرشا كوركەيتۋگە ارنالعان زاماناۋي ساندىك بۇيىمداردىڭ جيىنتىعىن ساتىپ الۋعا دەمەۋشىلىك تانىتتى. مەرەكەلىك تاماشا كوڭىل-كۇي سىيلاعان اتالعان كومپانيا ۇجىمىنا اۋىل تۇرعىندارى مەن اتا-انالاردىڭ ايتار العىسى شەكسىز.

KAZ Minerals مەكەمەسى جىل سايىن از قامتىلعان, كوپ بالالى جانە تولىق ەمەس وتباسىلارداعى بالالاردى حالىقارالىق بالالاردى قورعاۋ كۇنىمەن جانە جاڭا جىلمەن قۇتتىقتاۋدى داستۇرگە اينالدىرعان. كومپانيانىڭ «مەكتەپكە جول» اكتسياسىنا قاتىسىپ, ءبىلىم مەن عىلىمدى سەرىك ەتكەن جانداردىڭ سەنىمىنە سەلكەۋ تۇسىرمەي كەلەدى. 2024 جىلى «KAZ Minerals Aktogay» كومپانياسى اقتوعاي كەنتىنىڭ, قوپا جانە تارلاۋلى اۋىلدارىنىڭ از قامتىلعان, كوپ بالالى جانە تولىق ەمەس وتباسىلارىنان شىققان وقۋشىلارعا قولداۋ كورسەتتى. ءبىلىم وشاقتارىمەن تىعىز قارىم-قاتىناس ورناتقان مەكەمە دۇنيەجۇزىلىك قورشاعان ورتانى قورعاۋ كۇنى قارساڭىندا «مەنىڭ ەكولوگيالىق ارمانىم» اتتى بايقاۋ وتكىزىپ, جەڭىمپازداردى اسا باعالى سىيلىقتارمەن ماراپاتتادى.

بۇعان قوسا, وتكەن جىلى كومپانيانىڭ قولداۋىمەن «مەرەكە» بي ۇجىمى تاشكەنتتە وتكەن «ZHULDYZ ART KAZAKHSTAN»حالىقارالىق بايقاۋىنا قاتىسىپ, جۇلدەلى ورىندارعا يە بولدى. كومپانيا دەمەۋشىلىك ەتەتىن «KAZ Minerals Aktogay» فۋتبول كومانداسى وبلىستىق اشىق چەمپيونات پەن فۋتزالدان وتكەن رەسپۋبليكالىق كۋبوكتى قوسا العاندا, تۋرنيرلەردە توپ جارىپ ءجۇر, ايماقتا وتەتىن قازاقشا كۇرەس, ارقان تارتۋ جانە اسىق اتۋ سياقتى ۇلتتىق سپورت تۇرلەرىنەن جارىستار وتكىزۋگە اتالعان كومپانيا مۇرىندىق بولىپ كەلەدى. سونىمەن بىرگە قوپا اۋىلىنداعى جابىق سپورت كەشەنى KAZ Minerals توبىنىڭ قارجىلاي دەمەۋشىلىگىمەن بوي كوتەردى.

«كومپانيانىڭ اقتوعايداعى كەڭسەسى اشىلعان ساتتەن باستاپ ءبىز كۇن سايىن اقتوعاي, قوپا جانە تارلاۋلى تۇرعىندارىنىڭ وتىنىشتەرىن قابىلدايمىز. بۇل ادىستەر حالىقتىڭ قاجەتتىلىكتەرىن ەسكەرۋگە جانە جۇمىس الگوريتمدەرىن قۇرۋعا كومەكتەسەدى. توقسان سايىن ءبىز جەرگىلىكتى تۇرعىنداردى جۇمىسقا ورنالاستىرۋ ءۇشىن ونلاين-سۇحباتتار ۇيىمداستىرامىز. سونداي-اق مەكتەپ تۇلەكتەرىنە ءبىلىم بەرۋ گرانتتارىن ۇسىنىپ جانە قايتا دايارلاۋ بويىنشا پيلوتتىق جوبانى ىسكە اسىرىپ وتىرمىز وسى جوبانىڭ ارقاسىندا تۇرعىندار ءۇش ايلىق كۋرستاردان ءوتىپ, كومپانياعا جۇمىسقا تۇرا الادى», دەدى كومپانيانىڭ جەرگىلىكتى تۇرعىندارمەن ءوزارا ءىس-قيمىل جونىندەگى مەنەدجەرى دينارا شانگەرەەۆا.

حالىققا الەۋمەتتىك قولداۋ تانىتۋ كومپانيانىڭ نازارىنان تىس قالعان ەمەس. ولار ەڭبەك ارداگەرلەرى مەن اۋعان سوعىسىنىڭ ارداگەرلەرىنە, چەرنوبىل اتوم ەلەكتر ستانتسياسىنداعى اپاتتىڭ سالدارىن جويۋعا قاتىسۋشىلارعا جانە مۇمكىندىگى شەكتەۋلى جانداردىڭ دا قاجەتىنە جاراپ كەلەدى. ءوڭىردىڭ ءورىسىن اشىپ, حالىقتىڭ ءال-اۋقاتىن جاقسارتۋعا كۇش سالىپ كەلە جاتقان  ايماقتاعى الپاۋىت كاسىپورىنداردىڭ ءبىرى الداعى ۋاقىتتا دا ءىرى جوبالاردىڭ, ىلكىمدى ىستەردىڭ باسى-قاسىانان تابىلۋدى كوزدەيدى.