جاڭگىر حان ۋنيۆەرسيتەتىنىڭ وقىتۋشىلارى ۇزدىك شىقتى

اتاپ ايتقاندا, ۋنيۆەرسيتەتتىڭ عالىم-ۇستازدارى قايسار كوشاليەۆ, ءبىرجان نۇرعاليەۆ جانە لاۋرا دۋشاەۆا قازاقستان بويىنشا جوعارى وقۋ ورىندارى ۇزدىك وقىتۋشىلارىنىڭ تىزىمىنە ەنگەن.

بۇل عالىمدار ۋنيۆەرسيتەتتىڭ «ۆەتەريناريا جانە اگروتەحنولوگيا» ينستيتۋتىندا قىزمەت ەتەدى. ۆەتەريناريا عىلىمدارىنىڭ دوكتورى, پروفەسسور قايسار جاليت ۇلى – 270-تەن استام عىلىمي جانە وقۋ-ادىستەمەلىك ەڭبەكتىڭ اۆتورى, سونىڭ ىشىندە عىلىمي-زەرتتەۋ جۇمىستارىنىڭ قورىتىندىسى بويىنشا 5 ونەرتابىس كۋالىگىن العان. ول سوڭعى جىلدارى اقبوكەن تاقىرىبىن زەرتتەپ ءجۇر. ول «قازاقستان رەسپۋبليكاسىنىڭ عىلىمىن دامىتۋداعى قىزمەتى ءۇشىن» جانە ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىنىڭ يەگەرى. ايتا كەتەرلىگى, عالىم-ۇستاز 2011 جىلى «جوو ۇزدىك وقىتۋشىسى» مەملەكەتتىك گرانتىنىڭ يەگەرى اتانعان. دەمەك, مۇنداي اتاققا قايسار ءجاليت ۇلى ەكىنشى مارتە لايىقتى دەپ تانىلدى.

ۇزدىكتەر قاتارىنا ىلىككەن ۆەتەريناريا عىلىمدارىنىڭ كانديداتى, قاۋىمداستىرىلعان پروفەسسور ءبىرجان ەلۋباي ۇلى – جاڭگىر حان ۋنيۆەرسيتەتىنىڭ جانىنداعى «ۆەتەريناريا جانە اگروتەحنولوگيا» ينستيتۋتىنىڭ ديرەكتورى. 100-گە جۋىق عىلىمي ەڭبەكتىڭ, بەس وقۋ قۇرالىنىڭ جانە التى وقۋ-ادىستەمەلىك نۇسقاۋلىقتىڭ اۆتورى. جوعارى ءبىلىم جانە عىلىم سالاسىنداعى قاجىرلى ەڭبەگى ءۇشىن قر ءبىلىم جانە عىلىم مينيسترلىگىنىڭ قۇرمەت گراموتاسىمەن, «عىلىمدى دامىتۋعا سىڭىرگەن ەڭبەگى ءۇشىن» توسبەلگىمەن ماراپاتتالعان عالىم-ۇستاز مال شارۋاشىلىعى ونىمدەرىن ۆەتەرينارلىق-سانيتارلىق ساراپتاۋ باعىتىنداعى عىلىمي زەرتتەۋلەرمەن اينالىسادى.

ۇزدىك وقىتۋشى اتانعان كەلەسى جاس عالىم – «ۆەتەريناريالىق جانە بيولوگيالىق قاۋىپسىزدىك» زەرتحاناسىنىڭ مەڭگەرۋشىسى, ۆەتەريناريا عىلىمدارىنىڭ فيلوسوفيا دوكتورى (PhD), قاۋىمداستىرىلعان پروفەسسور لاۋرا جانەدىلقىزى بيىل حالىقارالىق «500 عالىم» باعدارلاماسى اياسىندا اقش-تىڭ مەريلەند ۋنيۆەرسيتەتىندە مولەكۋليارلىق ەپيدەميولوگيا باعىتى بويىنشا عىلىمي تاعىلىمدامادان ءوتىپ كەلدى. قر ءبىلىم جانە عىلىم مينيسترلىگىنىڭ قۇرمەت گراموتاسىنىڭ, «عىلىمدى دامىتۋعا سىڭىرگەن ەڭبەگى ءۇشىن» توسبەلگىسىنىڭ يەگەرى.

باتىس قازاقستان وبلىسى