بيىل قازاق دالاسىنىڭ كورىكتى ورىندارىن ارالاپ, كوركەم مەكەنىنە تابانى تيگەن شەتەلدىك تۋريستەردىڭ سانى بىلتىرعى كورسەتكىشپەن سالىستىرعاندا ەكى ەسەگە ارتتى.
استانادا «قازاقستان ءتۋريزمىنىڭ بولاشاعى: ستراتەگيالار, سىن-قاتەرلەر جانە شەشىمدەر» اتتى سەسسيا ءوتتى. شارادا سالاداعى نەگىزگى سىن-قاتەر تالقىلانىپ, بيىلعى جەتىستىگى سارالاندى, كەلەر جىلدىڭ دامۋ جوسپارى ايقىندالدى. سەسسياعا ۇكىمەت اپپاراتى مەن سىرتقى ىستەر مينيسترلىگىنىڭ وكىلدەرى, «Kazakh Tourism, Kazakh Invest» ۇلتتىق كومپانيالارىنىڭ باسشىلارى, تۋريستىك يندۋستريانىڭ جەتەكشىلەرى, شەتەلدىك ساراپشىلار قاتىستى. «Marriott International, Gratiya Advisory» سىندى الەۋەتتى كومپانيالاردىڭ وكىلدەرى ءسوز سويلەپ, الەمدىك تاجىريبەنىڭ ىلكىمدى جوبالارىمەن ءبولىستى.
كەلەلى كەڭەس بارىسىندا سالانىڭ 2024 جىلعى جۇمىسى قورىتىندىلاندى. بيىل شەتەلدىك تۋريستەر اعىنى 11,5 ميلليون ادامعا جەتىپ, 2023 جىلمەن سالىستىرعاندا ەكى ەسەگە ارتتى. مەيمانداردى قارسى الۋ, ورنالاستىرۋ, قىزمەت كورسەتۋ ورىندارىنىڭ تابىسى 27%-عا ارتىپ, 224 ميلليارد تەڭگەگە جەتتى. الەمدىك تۋريزم نارىعىندا ەلىمىزدىڭ ءيميدجىن نىعايتۋعا ىقپال ەتكەن «قازاقستان بويىنشا گيد» اتتى اۋقىمدى كونكۋرس اياسىندا جارنامالىق جوبالار جۇزەگە اسىرىلدى.
تۋريزم جانە سپورت ۆيتسە-ءمينيسترى ەرجان ەركىنباەۆ سالانىڭ ءورىسىن كەڭەيتۋ باعىتىندا اتقاراتىن شارۋا ءالى دە شاش-ەتەكتەن ەكەنىن ءمالىم ەتتى. «جىل باسىنان باستاپ جەكە ينۆەستورلار مەن كاسىپكەرلىك سۋبەكتىلەرىنە مەملەكەتتىك قولداۋ شارالارىنىڭ تيىمدىلىگىن ارتتىرۋعا نازار اۋدارۋ قاجەت. سونىمەن قاتار تۋريستىك سالاعا تىكەلەي شەتەلدىك ينۆەستورلاردى تارتۋ جونىندەگى جۇمىستاردى جانداندىرۋ كەرەك. بۇدان بولەك, كۋرورتتىق ايماقتاردىڭ ينجەنەرلىك-ينفراقۇرىلىمدىق قامتاماسىز ەتىلۋىن جاقسارتۋ, سونىڭ ىشىندە جولدار, ەلەكترمەن قامتاماسىز ەتۋ, سۋ قۇبىرى جۇيەلەرىنە قاتىستى قاجەتتى نورماتيۆتىك-قۇقىقتىق اكتىلەر مەن زاڭناماعا وزگەرىستەر ەنگىزۋدىڭ ماڭىزى جوعارى», دەدى ە.ەركىنباەۆ.
تۋريزم سالاسىن ەل ەكونوميكاسىنىڭ كۇرە تامىرىنا اينالدىرۋدا مەملەكەتتىك قولداۋ مەحانيزمدەرىن جەتىلدىرىپ, ينۆەستيتسيا تارتۋ قاشاندا وزەكتى. جيىندى قورىتىندىلاي كەلىپ, قاتىسۋشىلار ەلىمىزدىڭ تۋريزم سالاسىن دامىتۋ باعىتىنداعى ناقتى قادامداردى ايقىنداپ, «Kazakh Tourism» فۋنكتسيالارىن جەتىلدىرۋ, جاڭا قارجىلاندىرۋ تەتىكتەرىن ەنگىزۋ, ەلىمىزدىڭ حالىقارالىق تۋريستىك الاڭداعى ورنىن نىعايتۋ ماسەلەلەرىن ناقتىلادى.
ىشكى ءتۋريزمنىڭ دە الەۋەتى ارتىپ كەلەدى. بيىل 6 ميلليننون استام تۋريستەن 224 ملرد تەڭگە كىرىس كىرگەن. تۋريستەردى ورنالاستىرۋ نىساندارىنىڭ سانى 306 بىرلىككە ارتىپ, 4 315-گە دەيىن ۇلعايدى, ولاردىڭ سىيىمدىلىعى 18 مىڭ توسەك-ورىنعا تولىعىپ, 226 مىڭعا جەتتى. بۇل ەلىمىزدىڭ ىشكى جانە سىرتتان كەلەتىن تۋريستەرىن قابىلداۋعا الەۋەتى جەتكىلىكتى ەكەنىن ايقىنداي تۇسەدى.
تۋريستىك سالاعا ينۆەستيتسيا تارتۋ دا قارقىن الىپ كەلەدى. بيىلعى 10 ايدا ونىڭ كولەمى 33,6% -عا ارتىپ, 668,1 ميلليارد تەڭگەگە جەتتى. نەگىزگى جوبالاردىڭ ىشىندە قۇنى 194 ميلليارد تەڭگە «استانانىڭ تۋريستىك اۋدانىنىڭ» ءجونى بولەك. اياقتالۋى 2026 جىلعا جوسپارلانعان جوبا تولىق ىسكە قوسىلعاندا 2 مىڭعا جۋىق جۇمىس ورنىن اشادى, جىلىنا 10 ميلليارد تەڭگە سالىق ءتۇسىمىن اۋدارادى.
ەكىنشى ءىرى جوبا – ماڭعىستاۋ وبلىسىنداعى كاسپي ريۆەراسى. بىرنەشە باستاما اياسىندا «جىلى جاعاجاي» اۋماعىن كەشەندى يگەرۋ قولعا الىنباق. ناتيجەسىندە, جاعاجاي كۋرورتى, گولف-وتەل, ۆيللالار كەشەنى, اكۆاپارك, ويىن-ساۋىق ورتالىعى اشىلادى. جوبانىڭ جالپى قۇنى – 137,4 ملرد تەڭگە. جوسپارلى ىسكە اسىرۋ مەرزىمى – 2026 جىل.
تۋريستىك سالانى ۇكىمەت تاراپىنان دەمەۋ كۇشەيتىلىپ كەلەدى, بيىل مەملەكەتتىك قولداۋمەن ماقۇلدانعان وتىنىمدەر كولەمى 3 ەسەگە ارتتى. 37 تۋريستىك نىسانعا, 6 تۋريستىك اۆتوبۋس ساتىپ الۋعا 2,1 ملرد تەڭگە ءبولىندى.
حالىقارالىق ىنتىماقتاستىق قاشاندا ماڭىزدى. بيىل قىتايدا قازاقستان ءتۋريزمى جىلى جاريالانىپ, وسى ەلدىڭ ءىرى قالالارىندا 30-دان استام ءىس-شارا ۇيىمداستىرىلدى. سونداي-اق استانادا وتكەن V دۇنيەجۇزىلىك كوشپەلىلەر ويىندارى الەمدىك دەڭگەيدەگى وقيعا بولدى. ءدۇبىرلى الامانعا 89 ەلدەن 2 700 قاتىسۋشى كەلدى. «استانا-ارەنا» ستاديونى, «قازانات» يپپودرومى سىندى سپورت نىساندارىن جاڭارتۋ قالانىڭ ينفراقۇرىلىمىن جاقسارتىپ, تۋريستىك الەۋەتىن نىعايتا ءتۇستى. بيىل اۋىلدىق ءتۋريزمدى دامىتۋدا ۇجىمدىق ەڭبەك ەلەنىپ, الماتى وبلىسى, كەگەن اۋدانىنداعى ساتى اۋىلىنا «Best Tourism Village Award» سىيلىعى بەرىلدى. شىعىس قازاقستان وبلىسى, قاتونقاراعاي اۋدانىنىڭ جوباسىنا حالىقارالىق ITB Berlin 2024 كونكۋرسىندا ءۇشىنشى ورىن بۇيىردى.
سالادا جىل سوڭىنا دەيىن جالپى قۇنى 120,4 ملرد تەڭگە بولاتىن 119 ينۆەستيتسيالىق جوبا اياقتالماق. ناتيجەسىندە, 1 319 جۇمىس ورنى اشىلادى.