ەلدوس سمەتوۆ جىلدىڭ ۇزدىك سپورتشىسى اتاندى

سالتاناتتى جيىنعا قر پارلامەنتىنىڭ دەپۋتاتتارى, وليمپيادا جەڭىمپازدارى مەن جۇلدەگەرلەرى, الەم بىرىنشىلىكتەرى مەن حالىقارالىق جارىستاردىڭ جەڭىمپازدارى مەن جۇلدەگەرلەرى, سپورت جۋرناليستەرى قاتىستى.

تۋريزم جانە سپورت ءمينيسترى ەربول مىرزابوسىنوۆ 2024 جىل وتاندىق سپورت ءۇشىن ەرەكشە جىل بولعانىن اتاپ ءوتتى. ەل سپورتشىلارى بيىل حالىقارالىق ءىرى جارىستاردا تابىستى ناتيجە كورسەتسە, قازاقستاندا ءىرى جارىستار ۇيىمداستىرىلدى.

«وسى جىلدىڭ باستى دوداسى پاريج وليمپياداسى مەن پاراليمپيادا ەكەنى انىق. ءبىزدىڭ قۇراما تاريحي جەتىستىكتەرگە قول جەتكىزدى. دزيۋدوشى ەلدوس سمەتوۆ وليمپيادا چەمپيونى اتاندى. بۇل – تاۋەلسىز قازاقستان تاريحىندا دزيۋدودان بۇيىرعان العاشقى التىن مەدال. گيمناستيكادان العاش رەت وليمپيادا مەدالىن جەڭىپ الدىق. ول جۇلدە ناريمان قۇربانوۆقا بۇيىردى. داۆيد دەگتيارەۆ پارا-پاۋەرليفتينگتەن ەكى دۇركىن پاراليمپيادا چەمپيونى اتاندى. پارا-دزيۋدوشى اقمارال ناۋاتبەك وليمپيادا شىڭىن باعىندىردى», دەدى مينيستر.

سونىمەن قاتار بيىل استانادا 5-ءشى دۇنيەجۇزىلىك كوشپەلىلەر ويىنى ۇيىمداستىرىلدى. كوشپەلىلەر دوداسىندا 89 ەلدىڭ سپورتشىلارى باق سىنادى. ءدۇبىرلى دودادا قازاقستان قۇراماسى جالپىكوماندالىق ەسەپتە توپ جاردى.

«مەملەكەت باسشىسى قاسىم-جومارت كەمەل ۇلى توقاەۆتىڭ قولداۋىمەن سپورت سالاسىندا وڭ وزگەرىستەر باستالدى. كەلەسى جىلى وتاندىق سپورتشىلاردى بىرنەشە بايراقتى باسەكە كۇتىپ تۇر. 2025 جىلدىڭ اقپان ايىندا سپورتشىلارىمىز قىتايدىڭ حاربين قالاسىندا وتەتىن قىسقى ازيا ويىندارىنا قاتىسىپ, قىسقى وليمپيادا ليتسەنزياسى ءۇشىن سىنعا تۇسەدى. تاريح قويناۋىنا ەنىپ بارا جاتقان 2024 جىلى سپورتشىلارىمىز جامان ناتيجە كورسەتكەن جوق, جاڭا جىلدان ودان دا ۇلكەن جەڭىستەر كۇتەمىز», دەدى ەربول مىرزابوسىنوۆ.

سالتاناتتى ءىس-شارادا جىلدىڭ ماڭىزدى سپورتتىق باسەكەلەرىندە ەل نامىسىن ابىرويمەن قورعاپ, قورجىنعا جۇلدە سالعان سپورتشىلار مەن ولاردىڭ تۇعىردان كورىنۋىنە سەپ بولعان باپكەرلەر, سونداي-اق جەڭىستى جاڭالىقتاردىڭ جارشىسى بولعان باق وكىلدەرى ماراپاتتالدى.

جىل قورىتىندىسى بويىنشا «ۇزدىك» دەپ تانىلعاندار:

ەلدوس سمەتوۆ, داۆيد دەگتيارەۆ – «جىلدىڭ ۇزدىك سپورتشىسى»;

عالىمجان جىلگەلديەۆ, يۋري كولەسنيكوۆ – «جىلدىڭ ۇزدىك جاتتىقتىرۋشىسى»;

گرەك-ريم, ەركىن جانە ايەلدەر كۇرەسى فەدەراتسياسى – «جىلدىڭ ۇزدىك اككرەديتتەلگەن سپورت فەدەراتسياسى»;

كۋانىشبەك ەسەكەەۆ, قازاقستان دزيۋدو فەدەراتسياسىنىڭ پرەزيدەنتى – «جىلدىڭ ۇزدىك اككرەديتتەلگەن سپورت فەدەراتسياسىنىڭ پرەزيدەنتى»;

ەركەبۇلان ءىلياسوۆ, «جامبى اتۋ فەدەراتسياسى» رقب پرەزيدەنتى – «ۇزدىك سپورت مەتسەناتى»;

عيزات تۇسىپاەۆ – «جىلدىڭ ۇزدىك اۋىل جاتتىقتىرۋشىسى»;

ەرلان تاسبولاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت ادىسكەرى»;

دارحان شاريعاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت نۇسقاۋشىسى»;

ماقات اۋداندىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمى – «اۋداندىق ۇزدىك دەنە شىنىقتىرۋ جانە سپورت ءبولىمى»;

الماتى قالاسىنداعى «جوعارى سپورت شەبەرلىگى مەكتەبى» – «جىلدىڭ ۇزدىك سپورت ۇيىمى»;

جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى – «ۇزدىك سپورتتىق ءوڭىر»;

يليا ميزەرنىح – «جاس جانە جاسوسپىرىمدەر قۇرامىنداعى سپورتشى»;

سەرگەي سەرگەەۆ – «جىلدىڭ ۇزدىك بالالار جاتتىقتىرۋشىسى»;

نادەجدا كيم – «دەنە شىنىقتىرۋ جانە سپورت سالاسىنداعى ۇزدىك مامان»;

اقمارال ناۋاتبەك – «سپورتتا ۇزدىك سەرپىن».

سپورت جۋرناليستيكاسىندا ءباسى بيىك سەيداحمەت بەردىقۇلوۆ اتىنداعى   ماراپاتتى «حابار» تەلەارناسىنىڭ ءجۋرناليسى جاندوس ايتباي ۇلى, «Egemen Qazaqstan» گازەتىنىڭ ءتىلشىسى, ارىپتەسىمىز قۋانىش نۇردانبەك ۇلى, «Sport+» سايتىنىڭ ءتىلشىسى نازەركە سۇلتانبەك يەلەندى.

«سەيداحمەت بەردىقۇلوۆ اتىنداعى   سىيلىق - جىل سايىن سپورت جۋرناليستەرىنە تابىستالاتىن مارتەبەلى ماراپات. بيىل ۇزدىكتەر قاتارىنان كورىنگەنىمىزگە قۋانىشتىمىن. بايقاۋعا «Egemen Qazaqstan» گازەتىندە جاريالانعان ماقالامىزدى ۇسىنىپ, جۇلدەلى بولدىق. بيىكتەن كورىنۋىمىزگە ۇجىمنىڭ سەبى مول. قولداعان بارلىق ارىپتەستەرىمە العىس ايتامىن», دەدى قۋانىش نۇردانبەك ۇلى.