ەلورداداعى ورتالىق ساياباقتا شاڭعى تەبۋ ماۋسىمى اشىلدى. وسىنىڭ قۇرمەتىنە قالا تۇرعىندارى مەن قوناقتارى شاڭعىدان وتكەن جارىسقا قاتىستى.
بۇل كۇنى ورتالىق ستاديونعا 300-گە جۋىق ادام جينالدى. ساياباققا اعىلعانداردىڭ بارلىعى دەرلىك قۇر كەلمەي, شاڭعىسىن الا كەلىپتى. جاس-كارى تۇگەل ءجۇر. ۇلكەن-كىشى وزدەرىنىڭ جاس ەرەكشەلىكتەرىنە سايكەس 500 مەتر, 2,5 كم قاشىقتىقتا باق سىنادى. سوڭىندا بالالار, جاستار, ەرەسەكتەر اراسىنداعى مىقتىلار ىرىكتەلىپ, جۇلدەلەر بولەك-بولەك ۇلەستىرىلدى. كوپشىلىكتىڭ ورتاسىندا جۇرگەن استانا قالاسى اكىمدىگىنىڭ «سپورتتىق-بۇقارالىق ءىس-شارالاردى وتكىزۋ ديرەكتسياسى» سپورتتىق-بۇقارالىق ءىس-شارالاردى جوسپارلاۋ ءبولىمىنىڭ باسشىسى كولباي جانبەكتى اڭگىمەگە تارتىپ, پىكىرلەسكەنىمىزدە, ول قازىرگى اۋا رايى شاڭعى تەبۋگە تاپتىرمايتىنىن ايتتى.
«بيىلعى قىس شاڭعى جارىسىن وتكىزۋگە وتە ىڭعايلى. شاڭعى ماۋسىمىنىڭ اشىلۋىن وسى ۋاقىتقا جوسپارلاعان سەبەبىمىز – اۋا رايىنا بايلانىستى. قاردىڭ قالىڭدىعى شاڭعى جولىن جوعارى دەڭگەيدە جاساۋعا مۇمكىندىك بەرىپ وتىر. شاڭعى – قىسقى سپورت تۇرلەرىنىڭ اراسىندا ەڭ تانىمالدارىنىڭ ءبىرى. استانادا شاڭعىمەن اينالىساتىن تۇرعىنداردىڭ سانى وتە كوپ. بۇگىن دە شاڭعى ماۋسىمىنىڭ اشىلۋىنا شاڭعىعا بالادان ەڭكەيگەن قارياعا دەيىن قاتىسىپ جاتىر. ەڭ قارت قاتىسۋشىمىزدىڭ جاسى – 83-تە. شاڭعى جارىسىنان بولەك, شاڭعى ماۋسىمىنىڭ اشىلۋىندا بەلبەۋ كۇرەسى, قول كۇرەسى, ارقان تارتىس, كىر تاسىن كوتەرۋ باسەكەسىنەن سايىس ۇيىمداستىرىلدى», دەيدى كولباي جانبەك.
شاڭعى ماۋسىمىنا اتا-اناسىمەن كەلگەن ەڭ جاس قاتىسۋشىلارىنىڭ ءبىرى, كەڭشىلىك احمات قازىر 9 جاستا.
«شاڭعى ماۋسىمىنا ادام كوپ جينالىپتى. بالالار دا از ەمەس. نەگىزى ءوزىم جۇزۋمەن اينالىسامىن. ال قىس مەزگىلىندە شاڭعىعا دەن قويامىن. شاڭعىمەن شۇعىلدانعانىما جىلدان اسىپ قالدى. سونىڭ ارقاسىندا توزىمدىلىگىمدى ارتتىردىم. سپورتتا جەتىستىككە جەتسەم, ونىڭ ومىرىمە دە سەپتىگىن تيگىزەتىنىنە سەنىمدىمىن. سوندىقتان جىل سايىن اتا-اناممەن بىرگە شاڭعى تەبۋگە كەلۋگە تىرىسامىن», دەيدى كىشكەنتاي شاڭعىشى.
شاڭعى ماۋسىمىنىڭ اشىلۋىندا جارىسقا قاتىسقان قالا تۇرعىندارى 7 جاس ساناتى بويىنشا سىنعا ءتۇستى. مارە سىزىعىن العاشقىلاردىڭ ءبىرى بولىپ كەسىپ, جۇلدەگە ىلىككەندەر مەدال, باعالى سىيلىقتارمەن ماراپاتتالدى. وسىلايشا, قالا تۇرعىندارى تاعى ءبىر كۇندى شات-شادىمان كوڭىل كۇيدە وتكىزدى.