تورعاي ءوڭىرى ۇلتتىق سپورتتىڭ بارلىق تۇرىنەن الدىڭعى قاتاردا. جاقىندا موڭعوليا استاناسى ۇلان-باتىردا وتكەن توعىزقۇمالاق جارىسىنان جەرلەسىمىز جاينا الپىسقىزى جەڭىسپەن ورالدى. ول اتالعان سپورتتىڭ «راپيد» تۇرىنەن 2-ورىن, كلاسسيكالىق باعىتتاعى تۇرىنەن 1-ورىن الدى.
ءسويتىپ, 7-سىنىپ وقۋشىسى ەلىمىزدىڭ نامىسىن قورعاپ, جەڭىس تۇعىرىنان كورىندى. ۇلان-باتىرداعى حالىقارالىق تۋرنيردە التى قارسىلاسىن بەت قاراتپاي, التىن العان جاينانىڭ توعىزقۇمالاقپەن اينالىسىپ جۇرگەنىنە بەس جىلدان اسقان.
«جارىس جوعارى دەڭگەيدە ءوتتى. ماعان قاتتى ۇنادى. جۇلدەلى بولىپ, جەڭىس تۇعىرىنان كورىنگەندە, ەرەكشە اسەر الدىم. ءبىز اۋەلى ەلىمىزدەگى رەسپۋبليكالىق چەمپيوناتقا قاتىسىپ, سودان ىرىكتەلىپ موڭعوليا جەرىنە باردىق. ۇلتتىق سپورتقا كىشكەنە بولسا دا ۇلەسىمدى قوسقانىم – مەن ءۇشىن ۇلكەن ماقتانىش», دەيدى ج.الپىسقىزى.
قۋىرشاقتاي قىزدىڭ قارىشتى قادامى توبىل-تورعاي وڭىرىنە وڭ اسەر بەردى. تۇرمانوۆتار وتباسىمەن وبلىس اكىمى قۇمار اقساقالوۆ ارنايى جولىقتى. جاس سپورتشىنى جەكە قۇتتىقتاپ, اتا-اناسىنا العىسىن ءبىلدىردى. سونىمەن قاتار, جايناعا ءبىر ميلليون تەڭگە تارتۋ ەتتى.
«جاينا قىزىمىزدىڭ جەڭىسى تۋرالى ەستىگەندە قاتتى قۋاندىق. ۇلكەن ەڭبەك پەن تالاپتىڭ ناتيجەسى ەكەنىن بىردەن بايقاۋعا بولادى. وسىلاي كۇن سايىن جۇيەلى تۇردە ۇزدىكسىز دايىندالۋ جاقسى قورىتىندى شىعاراتىنىن جاينا دالەلدەدى. وسى رەتتە جەڭىمپاز قىزدى تاربيەلەگەن اتا-اناسىنا دا زور العىسىمدى ايتقىم كەلەدى» دەيدى وبلىس اكىمى ق.اقساقالوۆ.
تورعاي وڭىرىنەن ۇلتتىق سپورت بويىنشا بىرنەشە شەبەر شىققان. ولاردىڭ ەسىمى ەل اۋزىندا. ۇلتتىق ويىندى ۇلىقتاعان اعا بۋىن اۋداندا توعىزقۇمالاقتىڭ دامۋىنا ەرەكشە جاعداي جاساعان.
«تورعاي توپىراعى – تالاي سپورت ساڭلاقتارىن تۇلەتكەن قاسيەتتى مەكەن. اسىرەسە توعىزقۇمالاق سپورتى بويىنشا ابدىبەك ايتماعانبەتوۆ, سۇلتانبەك ماعاۋوۆ, ەدىرەس قىستاۋباەۆ, ەركىن الماعانبەتوۆ سىندى مايتالمان شەبەرلەردى ەرەكشە ايتۋعا بولادى. ولار ۇلتتىق ويىندى جاس ۇرپاققا ناسيحاتتاپ, ونىڭ دامۋىنا ەرەكشە ۇلەس قوستى. بۇگىندە ولاردىڭ ءىزباسارى رەتىندە جاينا الپىسقىزىن ايتۋعا بولادى», دەدى جانكەلدين اۋداندىق ءبىلىم ءبولىمىنىڭ ادىسكەرى قازبەك ايماقوۆ.
بەيبىت نۇرمۇحانوۆ,
جۋرناليست
قوستاناي وبلىسى,
جانكەلدين اۋدانى