مەملەكەتتىك كەڭەسشى ەرلان قاريننىڭ توراعالىعىمەن «قازاقستان تاريحى: ەجەلگى داۋىردەن بۇگىنگە دەيىن» اكادەميالىق كوپتومدىعى باسىلىمى بويىنشا عىلىمي-رەداكتسيالىق القانىڭ كوشپەلى وتىرىسى ءوتتى. جيىندا وسىعان دەيىن اتقارىلعان جۇمىس ناتيجەسى قورىتىندىلاندى.
ەكى اپتا بويى عىلىمي-رەداكتسيالىق القا قازاقستان تاريحى اكادەميالىق باسىلىمى اياسىنداعى جەتى تومنىڭ باستاپقى قولجازباسىن وقىپ شىعىپ, عىلىمي ساراپتاما جاسادى.
بۇل ىسكە كوپتومدىق اۆتورلارى مەن جەتەكشىلەرى, سونداي-اق عىلىم جانە جوعارى ءبىلىم مينيسترلىگىنىڭ باسشىلىعى, ەلىمىزدىڭ عىلىمي-زەرتتەۋ ينستيتۋتتارىنىڭ, مەملەكەتتىك ءارحيۆتىڭ وكىلدەرى مەن قىزمەتكەرلەرى, تاريحشى عالىمدار مەن ساراپشىلار اتسالىستى.
كوشپەلى وتىرىستى قورىتىندىلاي كەلە, مەملەكەتتىك كەڭەسشى ەكى اپتاعا سوزىلعان بىرلەسكەن جۇمىستىڭ ناتيجەسىندە قازاقستان عىلىمي قاۋىمداستىعىنىڭ وكىلدەرى باسىلىمنىڭ قۇرىلىمىنا جانە كوپتومدىق قولجازباسىنىڭ مازمۇنىنا قاتىستى ۇسىنىستار بەرگەنىن ايتتى.
ەرلان قارين الداعى ۋاقىتتا عىلىمي-رەداكتسيالىق القا ۇسىنىستاردى قاراپ, ولاردى مۇقيات تالداۋ جانە قولجازبانى رەداكتسيالاۋ بويىنشا اۋقىمدى جۇمىس جۇرگىزەتىنىنە نازار اۋداردى. سونداي-اق رەداكتسيالىق القا جان-جاقتى عىلىمي ۇستانىمعا باسا ءمان بەرۋى كەرەك ەكەنىن اتاپ ءوتتى. مەملەكەتتىك كەڭەسشىنىڭ ايتۋىنشا, اكادەميالىق كوپتومدىقتى مەرزىمىنە قاراماستان ساپالى ەتىپ شىعارۋ وتە ماڭىزدى.
«قازاقستان تاريحى: ەجەلگى داۋىردەن بۇگىنگە دەيىن» اتتى جاڭا اكادەميالىق كوپتومدىق عىلىمي قاۋىمداستىقتىڭ ۇجىمدىق ەڭبەگى سانالادى. كوپتومدىقتى ازىرلەۋ جۇمىسىنا ەلىمىزدىڭ تاريحشىلارى مەن ارحەولوگتەرىنەن بولەك, ەتنولوگتەرى, مۇراعات, مۇراجاي قىزمەتكەرلەرى, گەوگرافتار, لينگۆيستەر, ساراپشىلار جانە باسقا دا ماماندار جۇمىلدىرىلدى.
كوپتومدىقتى ازىرلەۋگە قاتىستى الداعى ۋاقىتتا اتقارىلاتىن جۇمىس اياسىندا عىلىمي فورۋمدار, كونفەرەنتسيالار وتكىزىلىپ, ارنايى سەكتسيالار, دوڭگەلەك ۇستەلدەر مەن ادىستەمەلىك سەمينارلار ۇيىمداستىرىلادى. وندا زەرتتەۋلەردىڭ عىلىمي ناتيجەلەرى, وتاندىق عالىمدار مەن ساراپشىلاردىڭ, باسقا دا مامانداردىڭ ۇسىنىستارى قاراستىرىلادى.