استاناداعى ورتالىق كوممۋنيكاتسيالار قىزمەتىنىڭ الاڭىندا الماتى وبلىسىنىڭ اكىمى مارات سۇلتانعازيەۆ ءوڭىردىڭ الەۋمەتتىك سالاسىنىڭ دامۋى مەن جوبالارىن ايتىپ بەردى, دەپ جازادى Egemen.kz.
وبلىس اكىمىنىڭ اقپاراتىنشا, ايماقتاعى ەكونوميكالىق ءوسۋ مەن الەۋمەتتىك قولداۋ شارالارىنىڭ ارقاسىندا حالىقتىڭ تابىسى بۇرىنعى دەڭگەيدە ساقتالىپ, جۇمىسسىزدىقتىڭ وسۋىنە توسقاۋىل قويىلعان.
«جىل باسىنان بەرى 57 مىڭعا جۋىق جۇمىس ورنى اشىلدى. 34 مىڭ ادام تۇراقتى جۇمىس تاپتى. سونداي-اق بيزنەس-يدەيالارىن جۇزەگە اسىرىپ, 400 اەك گرانت العان 259 ادام ءوز ءىسىن اشتى. مەملەكەت باسشىسىنىڭ تاپسىرماسى بويىنشا 480 مىڭنان استام وتباسى تىركەلگەن تسيفرلىق وتباسى كارتاسى جۇمىس ىستەي باستادى. بۇل جۇيە الەۋمەتتىك كومەكتى قولجەتىمدى ەتتى. جىل باسىنان بەرى 80 مىڭعا جۋىق ادام جالپى سوماسى بەس ميلليارد تەڭگەدەن استام قولداۋ الدى», دەدى مارات سۇلتانعازيەۆ.