وقىرمان ويى: جاقسى ىستەردىڭ جارشىسى

گازەت بەتىندە ءجيى جارىق كورەتىن ۇلتتىق قۇن­دىلىق­تاردى ۇلىق­تاي­تىن ماقا­لالار, حال­قى­مىزدىڭ سالت-داس­تۇ­رى­نە قاتىستى ماتەريالدار ۇرپاقتار ساباق­تاس­تىعىن, جاستار تار­بيەسىن ءاردايىم نا­زاردا ۇستاپ كەلەدى. كوكەيكەستى ماسەلەلەردى وقي وتىرىپ وي تۇيەمىز. كەيىنگى ۇرپاققا سول ويلاردى جەتكىزىپ ءوزارا پىكىرتالاسقا دا تۇسەتىن ساتتەر كوپ.

الداعى ۋاقىتتا دا ەل گازەتى تۇيتكىلدى پروب­لە­ما­لاردىڭ ءتۇيىنىن تارقاتۋعا, حالىقتى الاڭداتقان احۋالدى الدىمىزعا جايىپ سالىپ, ەل مۇددەسىنەن شى­عارىنا سەنىم مول.

مەرەيتوي قۇتتى بولسىن, جاقسىلىقتىڭ جارشىسى, وتكەن عاسىرداعى تاريحي تۇلعالاردىڭ كوزىندەي بولعان بىرەگەي باسىلىم!

مۇرات ءالين,

اباي وبلىسى ارداگەرلەرى كەڭەسىنىڭ توراعاسى, «قۇرمەت» وردەنىنىڭ يەگەرى

تاريح كەرۋەنىنىڭ قارانارى

«Egemen Qazaqstan» – ەل گازەتى. ول مۇنى تەاتر سالاسىندا دا دالەلدەدى. رەسپۋبليكانىڭ باس باسىلىمى بيىل 105 جىلدىعىن تويلاپ جاتسا, شىمكەنت قالاسىنىڭ جۇمات شانين اتىنداعى اكادەميالىق قازاق دراما تەاترى ءوزىنىڭ 95 جىلدىعىن اتاپ ءوتتى. سول مەرەكەلەۋ بارىسىندا باس باسىلىم تەاتر تاريحىنا قاتىستى ماقالا جاريالادى.

بۇل مادەنيەت ور­دا­سىنىڭ قارا­شا­ڭىراعى – تەاترعا جا­سا­عان جاقسىلىعى. تەاتردىڭ وتكەنى مەن بۇگىنگى تىنىس-تىر­شى­لىگى ونەر, مادەنيەت ايدارىمەن باسىلىم بەتتەرىندە ءاردايىم جارىق كورىپ تۇرادى.

ءوز باسىم مەرزىمدى باسى­لىمداردىڭ قوعاممەن بىرگە ماڭگى جاساي بەرە­تىنىنە سەنەمىن. ويتكەنى ەلەكتروندى نۇسقاداعى اقپارات جويىلىپ كەتۋى مۇمكىن, ال سارعايعان گازەت بەتىندەگى جازبالار عاسىرلار بويى ارحيۆتەردە ساقتالا بەرەدى. كەيىنگى ۇرپاق تاريحتى زەرتتەيتىن بولسا, كوپ دەرەكتى وسى گازەتتەردەن تابادى. ماسەلەن, تەاتر تاريحىنا بايلانىستى زەرتتەۋىمدە وتكەن عاسىردىڭ جيىرماسىنشى, قىرقىنشى جىلدارى ارالىعىندا شىققان گازەتتەردەن وتە كوپ ماعلۇمات الدىم. دەمەك گازەت – تاريح كەرۋەنىنىڭ قارانارى.

ءبىزدىڭ ۇجىم جىلدا ««Egemen Qazaqstan» گازەتىنە جازىلادى. ارتىستەر ءۇشىن بۇل – بۇرىننان كەلە جاتقان جاقسى ءداستۇر. ەندەشە, بارشا وتانداستى رەسپۋبليكانىڭ باس باسىلىمى, عاسىردان اسا ۋاقىت ەل جاڭالىقتارىن حالىققا جەتكىزۋدە تالماي ەڭبەك ەتىپ كەلە جاتقان «Egemen Qazaqstan» گازەتىنە جازىلۋعا شاقىرامىن.

سايا قاسىمبەك,

دراماتۋرگ, ج.شانين اتىنداعى اكادەميالىق قازاق دراما تەاترى ادەبيەت ءبولىمىنىڭ مەڭگەرۋشىسى

ەسكەرتكىش ەسكەرۋسىز قالمادى

ءبىزدىڭ اۋىل شالعايدا جاتىر. كۇي الىبى تاتتىمبەتتىڭ مازارى ىرگەمىزدە. سول جەردەگى بابامىزعا قويىل­عان ەسكەرتكىش, وكى­نىشكە قاراي, سىن كوتەرمەيدى. ونى نە ءۇشىن ايتىپ وتىرمىن؟ «Egemen Qazaqstan» گازەتىن ۇيدەگىلەرمەن ۇزبەي وقيمىز. گازەتتى پاراقتاپ وتىرىپ, «توزىعى جەتكەن تاتتىمبەت ەسكەرتكىشى» اتتى ماقالانى كەزىكتىرىپ قالدىم.

ءبىز ەگىندىبۇلاقتىڭ ەن دالاسىندا جاتقان تاتە­كەڭنىڭ اۋىلىنداعى ەلمىز. شارۋامىزدى كۇيت­تەگەن. بالا كەزدەن كورىپ وسكەن دۇنيەمىز, گازەت وقۋ بولعاندىقتان, باسقاسى باسقا باس باسىلىمنان قول ۇزگەن ەمەسپىز. ەلىمىزدىڭ تىنىسى بولا بىلگەن گازەتتەن كوپ دۇنيەگە قانىقپىز. سودان الگى ماقالانى وقىپ شىعىپ, قۋاندىق. بىرنەشە جىل ەلەۋسىز, ەسكەرۋسىز قالعان كۇي الىبىنىڭ ەسكەرتكىشىنە ەندى نازار اۋاتىن شىعار دەپ ءۇمىتىمىز قايتا وياندى. سودان ۋاقىت وتە كەلە اۋىل اكىمىنە الگى ماقالا تۋرالى ايتىپ ەدىم, ول قۋانتىپ قويدى. «وبلىستىق تاريحي-مادەني مۇرانى ساقتاۋ ورتالىعى بۇل شارۋانى بيىل اتقارۋ كەرەك ەدى. ۇلگەرە الماي, كەلەر جىلعا شەگەرىلدى», دەدى. ەرەكشە تولقىدىم. تاريحىن تۇگەندەگەن ەل گازەتىنە اۋىل بولىپ ريزا بولدىق. ەندى ەسكەرتكىشتىڭ جاڭعىرتىلعانىن اسىعا كۇتەمىز.

سۇيىمبيكە قابىلوۆا

قاراعاندى وبلىسى,

قارقارالى اۋدانى,

تاتتىمبەت اۋىل