الەمدى قان قاقساتقان قارجى پيراميدالارى ءبىزدىڭ ەلدىڭ دە تابالدىرىعىن اتتاپ, قانىمىزعا قارا تاڭبا بولىپ سىڭە جازداپ بارىپ بەتى قايتتى. قۇزىرلى ورگانداردىڭ تاباندى ارەكەتى مەن جۇرتتىڭ اياعىن تارتىپ باسىپ, ساۋاتىن ارتتىرعانىنىڭ ارقاسىندا قارجى پيراميدالارى قۇرىققا تۇسە باستادى. ولاردى ۇيىمداستىرۋشىلاردىڭ الدى سوتتالسا, ءبىرازى شەتەل جاعالاپ, ەلدەن باس ساۋعالاي قاشتى.
پيراميدالاردان تونگەن قاۋىپتىڭ اۋقىمدىلىعى سونشالىق, بۇل كەسەلمەن كۇرەس ماسەلەسى پرەزيدەنتكە دەيىن جەتتى. مەملەكەت باسشىسى قاسىم-جومارت توقاەۆتىڭ وسىدان ەكى جىل بۇرىن قازاقستان پوليتسياسىنىڭ 30 جىلدىعىنا ارنالعان سالتاناتتى جيىندا سويلەگەن سوزىندە قۇقىق قورعاۋ ورگاندارىنىڭ الەۋەتىن الاياقتىق, قارجىلىق پيراميدالار قۇرۋ, كاپيتال مەن رەسۋرستاردى شەتەلگە زاڭسىز شىعارۋ فاكتىلەرىنە بارىنشا جۇمىلدىرۋ قاجەتتىگىن ايرىقشا اتاپ ءوتتى. ال «قارجى مونيتورينگى اگەنتتىگى كولەڭكەلى ەكونوميكامەن كۇرەسەتىن نەگىزگى مەملەكەتتىك ورگانعا اينالۋعا ءتيىس», دەگەن ەدى سول جيىندا پرەزيدەنت.
سونداي-اق مەملەكەت باسشىسى بيىلعى 2 قىركۇيەكتەگى «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىنىڭ «قوعامدا زاڭ مەن ءتارتىپ يدەولوگياسىن تەرەڭ ورنىقتىرۋ قاجەت» دەگەن باعىتىندا تسيفرلىق تەحنولوگيالاردىڭ كۇندەلىكتى ومىرىمىزگە جاپپاي ەنۋى ءتۇرلى الاياقتىقتىڭ كوبەيۋىنە اكەپ سوقتىرىپ وتىرعانىنا توقتالدى.
«قازىر قارجى جانە ەكونوميكا نەگىزدەرىن ءبىلۋ, قاراپايىم تسيفرلىق داعدىلاردى مەڭگەرۋ اسا ماڭىزدى بولىپ تۇر. وسى رەتتە «Amanat» پارتياسى ۇسىنعان «قارىزسىز قوعام» جوباسىن اتاپ وتكىم كەلەدى. ازاماتتاردىڭ قارجىلىق ساۋاتىن ارتتىرۋعا ارنالعان وسى جوباعا بىلتىر 65 مىڭ ادام قاتىستى. ال بيىل ودان دا كوپ ادام قاتىسادى», دەدى پرەزيدەنت.
بۇعان قوسا مەملەكەت باسشىسى مەكتەپتەردە, جوعارى وقۋ ورىندارىندا قارجىلىق جانە تسيفرلىق ساۋاتتىلىق نەگىزدەرىن ۇيرەتەتىن ءبىلىم باعدارلاماسىن ەنگىزۋ قاجەتتىگىن دە تاپسىردى.
«بۇل جۇمىستى ۇكىمەت قارجى سالاسىن رەتتەۋ ورگاندارىمەن بىرگە اتقارۋى كەرەك. مۇنىڭ ءبارى ازاماتتارىمىزدىڭ ءارتۇرلى الاياقتىڭ قۇرىعىنا ءتۇسىپ قالماۋىنا مۇمكىندىك بەرەدى. قۇزىرلى ورگانداردىڭ ءبارى زاڭعا باعىناتىن جۇرتقا زاردابىن تيگىزىپ جاتقان الاياقتىققا جانە سول سياقتى باسقا دا زاڭسىز ارەكەتتەرگە قارسى باتىل شارالار قابىلداۋعا ءتيىس», دەپ پرەزيدەنت قاسىم-جومارت توقاەۆ وسى باعىتتاعى تاپسىرماسىن شەگەلەي ءتۇستى.
وسىعان بايلانىستى بۇگىندە جولداۋدان وزىنە جۇكتەمە العان قۇزىرلى ورگاندار ارەكەتسىز وتىرعان جوق دەۋگە بولادى. ماسەلەن, جىل باسىنان بەرى قما 20 ملرد تەڭگەدەن اسا شىعىنى بار قارجى پيراميدالارىن قۇرۋ جانە باسقارۋ فاكتىلەرى بويىنشا 68 قىلمىستىق ءىستى تەرگەپ, اياقتادى. قازىرگى ۋاقىتتا 13 ملرد تەڭگەدەن اسا قاراجات وتەلدى.
بۇل تۋرالى قما مەن جوعارى ءبىلىم جانە عىلىم مينيسترلىگىمەن بىرلەسىپ, ەلىمىزدىڭ 100-دەن اسا جوعارى وقۋ ورىندارى ءۇشىن ۇيىمداستىرىلعان قۇقىقتىق مادەنيەت جانە قارجىلىق ساۋاتتىلىقتى ارتتىرۋ جونىندەگى ۆەبينار بارىسىندا بەلگىلى بولدى. ءىس-شارا ء«تارتىپتى وزىڭنەن باستا!» ەستافەتاسى اياسىندا وتكىزىلدى.
اگەنتتىكتە الاياقتىق جوبالاردىڭ ومىرلىك تسيكلىن جانە ولارعا تارتىلعان سالىمشىلار سانىن قىسقارتۋعا باعىتتالعان «قارجى پيراميدالارىنا قارسى ءىس-قيمىل» ارنايى جوباسى ەنگىزىلدى. جوبا اياسىندا وسى جىلدىڭ باسىنان بەرى ينتەرنەت كەڭىستىگىندە 47 قارجى پيراميداسى انىقتالدى. الەۋمەتتىك جەلىلەردە ولارعا قاتىستى 300-گە جۋىق چات جابىلدى. ولاردىڭ شامامەن 2 ميلليونعا جۋىق قاتىسۋشىسى – الەۋەتتى سالىمشىلارى بولعان.
بيىل الەۋمەتتىك جەلىلەردى تالداۋ ناتيجەسىندە قارجى پيراميداسى بەلگىلەرى بار سايتتارعا قاتىستى 11,7 مىڭنان اسا سىلتەمە بۇعاتتالدى.
وسى ورايدا اگەنتتىكتە قارجى پيراميدالارىنىڭ بەلگىلەرىن تەكسەرۋگە مۇمكىندىك بەرەتىن «Baiqa, piramida!» Telegram-بوتى ىسكە قوسىلعانىن ايتا كەتكەن ءجون. قما ماماندارى ەگەر ءسىز نەمەسە جاقىندارىڭىز قارجى پيراميداسىنىڭ ارەكەتىنە تاپ بولسا, تۇرعىلىقتى جەرىڭىز بويىنشا ەكونوميكالىق تەرگەپ-تەكسەرۋ دەپارتامەنتىنە جۇگىنۋدى سۇرايدى.