ەل دزيۋدوسى ەندى-ەندى ەڭسە تىكتەي باستاعان عاسىرلار توعىسىندا وسى سپورت ءتۇرىن سەرىك ەتكەن سايىپقىراندار جونىندە ءبىراز ماقالا جازدىق. اسىرەسە جالىنداپ ءوسىپ كەلە جاتقان دارىندى جاستارعا كوبىرەك كوڭىل بولۋگە تىرىستىق. سول كەزدە ءبىزدىڭ نازارىمىزعا ىلىككەن جاس ورەندەردىڭ ءبىرى –الماس السەنوۆ.
ول – قاراعاندىنىڭ تۋماسى. تانىسقان بەتتە-اق الماستىڭ زيالى وتباسىندا تۋىپ-وسكەنى بىردەن بايقالدى. ءتىلى باي, سوزگە شەشەن, وي-ورەسى بيىك. جاسى ءالى 20-عا تولماعان سپورتشىمەن جۇزدەسسەڭ, تارتىمدى اڭگىمەنىڭ تيەگىن اعىتىپ, پايىمدى پىكىر ايتىپ, جانىنداعى ادامداردى وزىنە ەرىكسىز باۋراپ الادى. سۇحبات بەرسە دە, شەشىلە سويلەيدى. كەيىن بىلدىك, بالۋاننىڭ اتا-اناسى دا تەگىن ادامدار ەمەس ەكەن. اكەسى جەڭىس قامەن ۇلى – تەحنيكا عىلىمدارىنىڭ كانديداتى, دوتسەنت, ۇزاق جىل قاراعاندى تەحنيكالىق ۋنيۆەرسيتەتىنىڭ تاۋ-كەن ماشيناقۇرىلىسى كافەدراسىندا ەڭبەك ەتكەن. اناسى گۇلشارا مۇقىشەۆا – تەحنيكا عىلىمدارىنىڭ دوكتورى, پروفەسسور, قاراعاندىداعى تەحنيكالىق ليتسەي ديرەكتورى جانە جوعارىدا اتالعان ۋنيۆەرسيتەتتىڭ كاسىپوداق كوميتەتىنىڭ توراعاسى. الماستىڭ ءوزى دە بىلىمگە قۇشتار. ءۇش-ءتورت وقۋ ورنىن تامامداعان, بىرنەشە شەت ءتىلىن ەركىن مەڭگەرگەن. قاشان كورسەڭ دە قولىنان كىتاپ تۇسپەيدى. ۇنەمى وقىپ, زەرتتەپ, زەردەلەپ, ىزدەنىپ جۇرەدى.
الماس السەنوۆتىڭ سپورتتىق كورسەتكىشتەرى دە جاقسى. جاستار اراسىندا بىرقاتار حالىقارالىق تۋرنيردە جەڭىس تۇعىرىنا كوتەرىلىپ, ەرەسەكتەردىڭ ەل چەمپيوناتىندا جۇلدەگەرلەر ساناتىنا قوسىلعاننان كەيىن ۇلتتىق قۇراما ساپىنا قابىلداندى. اۋەلى 90 كگ, ودان كەيىن 100 كگ سالماق دارەجەسىندە كۇرەستى. ۋاقىت وزا ەلىمىزدىڭ بەتكەۇستار دزيۋدوشىلارىنىڭ بىرىنە اينالدى. سول كەزدەرى تۇلعاسى كەلىسكەن, ءبىتىم-بولمىسى بولەك بالۋان جايىندا «ەگەمەن قازاقستانعا» ماقالا جازعان ەدىك.
عاسىرلار توعىسىنان بەرى السەنوۆپەن كەزدەسۋدىڭ ءبىر رەتى كەلمەدى. ارا-تۇرا ءتۇرلى جارىستا جۇلدە الىپ جۇرگەنى تۋرالى ەستىپ جۇردىك. وعان سىرتتاي قۋاندىق. تاتاميدە وزىنە بۇيىرعان نەسىبەسىن العاننان كەيىن دزيۋدومەن قوش ايتىسقانىمەن, ۇلكەن سپورتتان الىستاعان جوق. ءار جىلدارى الماس جەڭىس ۇلى قازاقستان دزيۋدو فەدەراتسياسىنىڭ ۆيتسە-پرەزيدەنتى, ازيا دزيۋدو وداعىنىڭ ماركەتينگ بويىنشا ديرەكتورى, ەۋروپا دزيۋدو وداعى پرەزيدەنتىنىڭ كەڭەسشىسى قىزمەتتەرىن ابىرويلى اتقاردى. قاراعاندىدا «جەڭىس» كاسىپقوي دزيۋدو كلۋبىن قۇردى. ءبىر سوزبەن ايتساق, وسى سپورت ءتۇرىنىڭ دامۋىنا بارىنشا ۇلەس قوستى.
الماسپەن ارادا باقانداي 20 جىل وتكەننەن كەيىن عانا جولىعۋدىڭ ءساتى ءتۇستى. بىلتىر جەلتوقسان ايىندا الماتىداعى بالۋان شولاق اتىنداعى سپورت سارايىندا «جەڭىس كۋبوگى» دەپ اتالاتىن دزيۋدوشىلاردىڭ ءدۇبىرلى دوداسى دۇركىرەپ تۇرىپ ءوتتى. سونىڭ باسى-قاسىندا ا.السەنوۆ تە ءجۇردى. كەزىندە مەن كورگەن بوزبالا ءومىردىڭ ءبىراز وتكەلىنەن ءوتىپ, بيزنەس پەن باسشىلىق قىزمەتتە ابدەن ىسىلعان ناعىز مايتالمانعا اينالىپتى. قازىرگى كەزدە الماس جەڭىس ۇلى جەر-جاھانداعى 198 مەملەكەتتىڭ ۇلتتىق ۇيىمدارىنىڭ باسىن بىرىكتىرىپ وتىرعان حالىقارالىق دزيۋدو فەدەراتسياسى (IJF) پرەزيدەنتىنىڭ كەڭەسشىسى قىزمەتىن اتقارىپ ءجۇر.
مەنى كورگەن بەتتە ول بىردەن: «بۇل – ءبىزدىڭ جۋرناليست اعامىز. كەزىندە ەڭ العاشقى بولىپ مەنى رەسپۋبليكامىزدىڭ باس باسىلىمى «ەگەمەن قازاقستانعا» جازىپ, مەرەيىمدى ءبىر ءوسىرىپ تاستاعان. بۇل ماقالا ماعان ەرەكشە موتيۆاتسيا بەردى. سول گازەتتىڭ قيىندىسى مەندە ءالى دە ساقتاۋلى» دەپ اينالاسىنداعى ادامدارمەن تانىستىردى. سول كەزدە بايقاعانىم, الماستىڭ ءجۇرىس-تۇرىسى مەن سىرتقى ءپىشىمى وزگەرگەنىمەن, جاندۇنيەسى مەن كوڭىلى سول قالپىندا ەكەن. سول باياعى اڭقىلداعان الماس!
شىنى كەرەك, بۇگىنگى تاڭدا IJF پرەزيدەنتى كەڭەسشىسىنەن ءدال وسىنداي ماقتاۋ ءسوز كۇتپەگەن ەدىم. جازعان ماقالام دا گازەتتىڭ ءبىر بۇرىشىن الىپ جاتقان شاعىن عانا دۇنيە ەدى. سوندا دا كەيىپكەرىم ەڭبەگىمدى باعالاپ, ءوزىنىڭ «ەگەمەن قازاقستانعا» شىققانىن زور مارتەبە ساناعان. ەل گازەتىندە شىققان ماقالا سپورتشىلارعا كۇش-قايرات, جىگەر سىيلايدى ەكەن. سوعان كادىمگىدەي مارقايىپ قالدىم. مىنە, ەل گازەتىندە جارىق كورگەن شاعىن عانا ماقالانىڭ, الماس السەنوۆپەن 20 جىلدان كەيىن قايتا كەزدەسۋىمىزدىڭ تاريحى وسىنداي!