قاراعاندى وبلىسىندا جەڭىل كولىكتىڭ سالونىنا جىلقى تيەگەن جۇرگىزۋشى انىقتالدى, دەپ حابارلايدى Egemen.kz.
قاراعاندى وبلىسى نۇرا اۋدانىندا پاترۋلدىك پوليتسيا قىزمەتكەرلەرى 11 جەلتوقساندا نۇرا - تەمىرتاۋ رەسپۋبليكالىق اۆتوجولىندا Audi كولىگىن توقتاتقان. تەكسەرۋ بارىسىندا كولىكتە جىلقى بولعان. كولىك جۇرگىزۋشىسى, بۇقار جىراۋ اۋدانىنىڭ تۇرعىنى, جىلقىنىڭ وزىنىكى ەكەنىن دالەلدەي الماعان. جىلقىنى تاسىمالداۋعا قاتىستى دا ەشقانداي قۇجات كورسەتپەگەن.
جۇك پەن باگاجدى تاسىمالداۋ ەرەجەلەرىن بۇزعانى ءۇشىن جۇرگىزۋشىگە اكىمشىلىك حاتتاما تولتىرىلىپ, ءىس ماتەريالدارى ۆەتەريناريالىق ينسپەكتسياعا جولداندى.
قازىرگى ۋاقىتتا پوليتسيا قىزمەتكەرلەرى جىلقىنىڭ ناقتى يەسىن انىقتاپ, جانۋاردىڭ ۇرلانعان-ۇرلانباعانىن تەكسەرىپ جاتىر.
ايتا كەتەيىك, 7 قازاننان بەرى ءوتىپ جاتقان «مال ۇرلىعى» جەدەل-پروفيلاكتيكالىق ءىس-شاراسى اياسىندا نۇرا اۋدانىندا مال مەن ەت ونىمدەرىن زاڭسىز تاسىمالداۋدىڭ 37 فاكتىسى انىقتالدى. ونىڭ 20 جاعدايىندا جۇرگىزۋشىلەر اكىمشىلىك جاۋاپكەرشىلىككە تارتىلدى.