قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆتىڭ قاتىسۋىمەن قازاقستان جەڭىل اتلەتيكا فەدەراتسياسىنىڭ 2024 جىلعا ارنالعان قورىتىندى وتىرىسى ءوتتى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
ءىس-شاراعا جەڭىل اتلەتيكا فەدەراتسياسىنىڭ پرەزيدەنتى دانيال احمەتوۆ, وڭىرلىك فەدەراتسيالاردىڭ باسشىلارى, سپورتشىلار مەن فەدەراتسيا وكىلدەرى قاتىستى.
جيىندا دانيال احمەتوۆ فەدەراتسيانىڭ اتقارعان جۇمىستارى تۋرالى ەسەپ بەرىپ, بىرقاتار ماڭىزدى جەتىستىكتەرگە توقتالدى. ولاردىڭ قاتارىندا قازاق سپورتشىلارىنىڭ حالىقارالىق جارىستارداعى جوعارى ناتيجەلەرى مەن جەڭىستەرى, جەڭىل اتلەتيكانى دامىتۋعا باعىتتالعان تىڭ باستامالارى بار.
وتىرىس بارىسىندا دانيال احمەتوۆ وكىلەتتىگىن مەرزىمىنەن بۇرىن توقتاتقانىن مالىمدەپ, بەلگىلى سپورتشى, ريو-دە-جانەيروداعى وليمپيادا چەمپيونى ولگا رىپاكوۆانى فەدەراتسيا پرەزيدەنتى لاۋازىمىنا ۇسىندى. جيىنعا قاتىسۋشىلار, ونىڭ ىشىندە وبلىستىق فەدەراتسيا باسشىلارى مەن سپورت قاۋىمداستىعى ونىڭ كانديداتۋراسىن ءبىراۋىزدان قولدادى.
مينيستر ەربول مىرزابوسىنوۆ دانيال احمەتوۆكە فەدەراتسيا پرەزيدەنتى رەتىندەگى جەمىستى قىزمەتى ءۇشىن العىس ايتىپ, ولگا رىپاكوۆاعا جاڭا قىزمەتىندە تابىس تىلەدى.
كەزدەسۋ سوڭىندا مينيستر ولگا رىپاكوۆاعا جەڭىل اتلەتيكاداعى حالىقارالىق ىنتىماقتاستىقتى دامىتۋعا, سپورتشىلار مەن رەزەرۆتەردى دايىنداۋعا باسا نازار اۋدارۋدى تاپسىردى.