سەمەي قالاسىندا بەلگىلى بالۋان, حالىقارالىق دارەجەدەگى سپورت شەبەرى قۋانىش جۇمابەك ۇلى سالىقباەۆتى ەسكە الۋعا ارنالعان جاسوسپىرىمدەر اراسىنداعى رەسپۋبليكالىق تۋرنير ءوتتى. كۇرەس ونەرىنىڭ كورنەكتى تۇلعاسى اتىنداعى سايىس بيىل ەكىنشى مارتە جالاۋىن جەلبىرەتتى.
كۇرەستىڭ ءۇش تۇرىنەن ۇلكەن دارەجەگە جەتىپ, ابىرويى اسقاقتاعان قۋانىش سالىقباەۆ 1971 جىلعى 8 شىلدەدە بۇرىنعى سەمەي وبلىسى, ماقانشى اۋدانى, قىزىلبۇلاق اۋىلىندا دۇنيەگە كەلگەن. سپورتقا دەگەن قۇشتارلىعى ەرتە ويانعان جاس 1983 جىلى «قايرات» قوعامىنىڭ سپورتزالىنا بارىپ, تولەۋبەك شاكەنوۆ, اسقار تەمىرجانوۆ سىندى باپكەرلەردەن سامبو, قازاق كۇرەسىنىڭ ءادىس-تاسىلدەرىنە قانىعا باستايدى. 1987 جىلى سەمەي وبلىسىنىڭ بىرىنشىلىگىندە سامبودان 2-ورىن, 1989 جىلى وبلىستىق كەڭەستىڭ بىرىنشىلىگىندە 1-ورىندى يەلەندى. ءسويتىپ, سەمەي وڭىرىنە تانىمال باپكەرلەر, ەلىمىزدىڭ ەڭبەك سىڭىرگەن جاتتىقتىرۋشىلارى سەرىك توقتارعازين, سەرىك قورجىكەنوۆتەردىڭ نازارىنا ىلىگىپ, سپورت جولىندا كوپتەگەن بيىكتى باعىندىردى.
ق.سالىقباەۆ – سامبودان ەلىمىزدىڭ بەس دۇركىن چەمپيونى, ءتورت دۇركىن ەل كۋبوگىنىڭ يەگەرى, ازيا چەمپيوناتىنىڭ كۇمىس (2000), التىن (2001) جۇلدەگەرى, الەم چەمپيونى (2006). قازاق كۇرەسىنەن ەلىمىزدىڭ ءۇش دۇركىن چەمپيونى, وتىزعا تارتا رەسپۋبليكالىق, حالىقارالىق تۋرنيرلەردىڭ جەڭىمپازى, ەل كۋبوگىنىڭ ءتورت مارتە يەگەرى, ازيا چەمپيونى (2007). دزيۋدودان بىرنەشە مارتە رەسپۋبليكالىق, حالىقارالىق تۋرنيرلەردىڭ جۇلدەگەرى, ەل بىرىنشىلىگىنىڭ كۇمىس جۇلدەگەرى. ول قاجىرلى ەڭبەگىنىڭ ناتيجەسىندە كۇرەستىڭ ءۇش ءتۇرىن ەركىن مەڭگەرىپ, سامبو مەن قازاق كۇرەسىنەن حالىقارالىق دارەجەدەگى سپورت شەبەرى اتانىپ, ءوڭىر سپورتىنىڭ ورىستەۋىنە عانا ەمەس, قازاق كۇرەسىنىڭ دامۋىنا ەسەپسىز ەڭبەك ءسىڭىردى.
ادام بالاسىنىڭ قاي سالادا بولسىن ارتىنان شاكىرت ەرتۋى – پارىز. بۇل تۇرعىدا قۋانىش جۇمابەك ۇلى باپكەرلىك جولدى باستاعان 2016 جىلدان سوڭعى دەمى ۇزىلگەن 2019 جىلعا دەيىنگى ارالىقتا ايماق-اتىراپتاعى بويىندا وتى بار جاستاردىڭ جارقىراپ كورىنۋىنە, سپورتقا بەيىمدى بالالار مەن جاسوسپىرىمدەردى سپورتقا, سالاماتتى ءومىر سالتىنا باۋلۋعا كوپ ۇلەس قوستى. باپكەردىڭ ءتالىم-تاربيەسىن كورگەن سپورتشىلار ىشىنەن نۇرجان مەلسوۆ, ەراسىل نۇراحمەتوۆ سىندى شاكىرتتەرىن ەرەكشە اتاۋعا بولادى.
جارىسقا ەلىمىزدىڭ بارلىق دەرلىك وڭىرىنەن 2007–2008 جىلدارى تۋعان جاسوسپىرىمدەر قاتىستى. جالپى جيىنى 18 كوماندا, 164 سپورتشى باق سىناپ, سىنعا ءتۇستى. تۋرنير اباي وبلىستىق مامانداندىرىلعان بالالار-جاسوسپىرىمدەر وليمپيادالىق رەزەرۆتىك سپورت مەكتەبىنىڭ باستاماسىنا وراي, وبلىستىق دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن ءوتتى. اشىلۋ سالتاناتىندا ءسوز العان داڭقتى بالۋاننىڭ اسىل جارى گاۋھار سالىقباەۆا ەر ەسىمىن ەل ەسىندە ساقتاپ, جوعارى دارەجەدە جارىس ۇيىمداستىرعان بارشا ازاماتقا العىس ءبىلدىردى.
«قۋانىشتىڭ سپورتتاعى جولىن تالماي ناسيحاتتاپ, ۇلىقتاپ كەلە جاتقان باپكەرلەرىنە, دوستارى مەن شاكىرتتەرىنە, ءىزىن باسقان باۋىرلارىنا, قاي كەزدە دە بىزگە قولداۋ ءبىلدىرىپ وتىراتىن جاندارعا ريزاشىلىعىمىز زور. وسى جارىستىڭ وتۋىنە دەمەۋشىلىك كورسەتكەن سەرىك توقتارعازين, سەرىك قورجىكەنوۆ, قايرات چارمۇحامەدوۆ, شالقار جولامانوۆ, ايبەك نۇعىماروۆ, دۋمان قىزداربەكوۆ, قايرات كۇنسافين, اسحات وسپانوۆ, امان ءشارىپوۆ سياقتى ازاماتتارعا, دوستارى قۋات پەن بەكجانعا العىستان باسقا ايتارىمىز جوق. تۋرنير كەلەشەكتە ەلىمىزدىڭ اتىن الەمگە تانىتاتىن سپورتشىلاردىڭ ءوسىپ-شىعۋىنا جول اشادى دەپ سەنەمىز», دەدى گاۋھار سلامبەكقىزى.
ەكى كۇنگە سوزىلعان تۋرنير قورىتىندىسىنا سايكەس 70 كگ سالماق دارەجەسىندە 1-ورىندى داستان قازىحانوۆ, 2-ورىندى بەكارىس سايلاۋ, 3-ورىندى تەمىرلان ماقساتوۆ, ەرنۇر قابدراحمان يەلەنسە, 76 كگ سالماقتا 1-ورىن الماس رىسبەكوۆكە, 2-ورىن دوسجان راحىمباەۆقا, 3-ورىن نۇردوس قايراتوۆ پەن يسلام مەدەتقاليعا بۇيىردى. 82 كگ سالماق دارەجەسىندە سۇلتان-بەيبارىس قايرات ۇلى 1-ورىن, ايۆار بەيسەنبەك 2-ورىن يەلەنسە, قۋاتبەك قاجىبەك پەن ارنۇر امانوۆ 3-ورىندى ءوزارا ءبولىستى. 82 كگ-نان جوعارى سالماقتا سايىسقا تۇسكەندەر اراسىندا نۇربولات جامبىل 1-ورىن, ساعيات سەرىكقالي 2-ورىن, احمەت قاپەن مەن نۇرلانبەك تالعات ۇلى 3-ورىن الدى.
«كەيىنگى جىلدارى وبلىستا ءتۇرلى بەدەلدى تۋرنيرلەردى وتكىزۋ داستۇرگە اينالىپ كەلەدى. مۇنداي بايراقتى باسەكەلەر جەرگىلىكتى جاستاردىڭ ىشىنەن شىن مىقتىنى انىقتاۋعا جاقسى مۇمكىندىك تۋعىزادى. سول تۇرعىدا الداعى ۋاقىتتا قۋانىش سالىقباەۆ اتىنداعى ءتۋرنيردىڭ اياسىن كەڭەيتۋ ويىمىزدا بار», دەيدى ۇيىمداستىرۋشىلار.
اباي وبلىسى