ازيا چەمپيوناتىنىڭ بەسىنشى جارىس كۇنى ەلىمىزدىڭ بەس بوكسشىسى ونەر كورسەتىپ, تورتەۋى جەڭىسكە جەتتى. دۋلات بەكباۋوۆ, ابىلايحان ءجۇسىپوۆ, دياس مولجىگىتوۆ, ايگەرىم ساتتىباەۆا جارتىلاي فينالدا كۇش سىناسۋ قۇقىعىنا يە بولدى.
چيانگمايدا 67 كگ سالماقتاعى دۋلات بەكباۋوۆ ەكىنشى رەت شارشى الاڭعا كوتەرىلدى. تۇساۋكەسەر كەزدەسۋىندە تايپەيلىك ۆانگ چيۋاندى ەش قينالماي ۇتقان تارازدىڭ تارلانى شيرەك فينالدا مالايزيالىق ايمان مۇحامماد ءاريفتىڭ تاس-تالقانىن شىعاردى. ءۇشىنشى راۋندتا دۋلاتتىڭ قارسىلاسى باسەكەنى ودان ءارى جالعاستىرا المادى. 71 كگ سالماق دارەجەسىندەگى ابىلايحان ءجۇسىپوۆ ءبىراز ۋاقىت كاسىپقويلار اراسىندا ونەر كورسەتىپ, جاقىندا عانا اۋەسقوي رينگكە قايتا ورالعانى بەلگىلى. قاراعاندىلىق قىران كەزىندە الەم چەمپيوناتىندا ءۇش رەت قولا مەدالدى موينىنا ءىلىپ, ازيانىڭ ۆيتسە-چەمپيونى اتانعانىن دا جانكۇيەرلەر جاقسى بىلەدى. وسى جولى ابىلايحان جاقسى بابىندا ەكەنىن بايقاتىپ, تۇرىكمەنستاندىق بايرامدۋردى نۇرمۇحاممەدوۆتى ەداۋىر باسىمدىقپەن جەڭدى. باسەكە بارىسىندا ول باسەكەلەسىن ءبىر مارتە ەسەڭگىرەتىپ تە تاستادى. 75 كگ سالماقتاعى دياس مولجىگىتوۆپەن جۇدىرىقتاسۋعا ءتيىس جاپونيالىق دايگو سۋناگو رينگكە شىقپادى.
بۇرىمدىلار باسەكەسىندە 48 كگ سالماقتاعى ايگەرىم ساتتىباەۆا كورەرمەندەرىن قۋانتتى. وتە شيەلەنىستى وتكەن ايقاستا فيليپپيندىك وفەليا ماگنونى ۇتتى. 54 كگ سالماقتاعى سىمبات الياسقار قىتايلىق ۆەنتسيان سيۋگە ەسە جىبەردى.
التىنشى جارىس كۇنى دە شيرەك فينالدىق سايىستار ءوتتى. رينگكە كوتەرىلگەن ەلىمىزدىڭ التى بوكسشىسىنىڭ بەسەۋى جەڭىسكە جەتتى. ءسويتىپ, ورازبەك اسىلقۇلوۆ, ەراسىل جاقپەكوۆ, جازيرا وراقباەۆا, ۇلجان سارسەنبەك, ۆيكتوريا گرافەەۆا جارتىلاي فينالعا جولداما الدى.
57 كگ سالماق دارەجەسىندەگى ورازبەك اسىلقۇلوۆ تايلاندتىق فانۋۆات چۋدجاناتپەن كۇش سىناستى. جەرگىلىكتى جانكۇيەرلەر ءوز ورەندەرىنە بارىنشا قولداۋ كورسەتتى. ولار ايعايلاپ-شۋلاپ, كەرنەيلەتىپ-سىرنايلاتىپ, سپورت كەشەنىن باسىنا كوتەرگەنىمەن, بۇل جاعداي قازاقتىڭ ءور مىنەزدى ۇلىنا ەش اسەر ەتكەن جوق. ورازبەك وزىنە ءتان مانەردە جۇدىرىقتاسىپ, قارسىلاسىن ۇنەمى قىسپاقتا ۇستادى. اسىلقۇلوۆتىڭ سوققىلارى دالىرەك ءتيىپ, قازىلاردىڭ جەڭىستى ءبىزدىڭ بوكسشىعا بەرۋگە باسقا امالى قالمادى.
60 كگ سالماقتاعى بەيبارىس جەكسەن تۇساۋكەسەر كەزدەسۋىندە وزبەكستاندىق ءدىلشود ابدۋمۋرۋدوۆتان ايلاسىن اسىرعاندا, «باستى باسەكەلەسىنەن باسىم ءتۇسىپ, ونى ەلىنە قايتاردىق. ەندى بەيبارىستىڭ ەكپىنىنە ەشكىم شىداماس», دەپ قاتتى قۋانعان ەدىك. بىراق كەلەسى كەزەڭدە قۋانىشىمىز سۋ سەپكەندەي باسىلدى. تاجىكستاندىق اقمال ۋبايدوۆپەن ايقاسقان جەكسەن بىلگەنىنەن جاڭىلىپ, جەڭىلىس تاپتى.
80 كگ سالماقتاعى ەراسىل جاقپەكوۆ ساعىن ساتىبالدى ۇلىمەن سايىسقا ءتۇستى. ءبىرىنشى راۋندتا قىرعىز سپورتشىسى باسىم ءتۇستى. ءۇزىلىس كەزىندە بۇرىشتاعى باپكەرلەرى شاكىرتتەرىنە دۇرىس باعىت-باعدار بەردى. تاكتيكاسىن دەرەۋ وزگەرتكەن قانداسىمىز كەلەسى ءۇش مينۋت ارالىعىندا تارازى باسىن تەڭەستىرىپ ۇلگەردى. ءۇشىنشى راۋندتا دا ەراسىلدىڭ مىسى باسىم بولدى. ناتيجەسىندە, تورەشى جاقپەكوۆتىڭ قولىن كوتەردى.
ەرلەردەن كەيىن شارشى الاڭعا شىققان قىزدارىمىز جەكپە-جەكتەرىن وتە قارقىندى وتكىزدى. الدىمەنەن جازيرا وراقباەۆا قۋانتتى. 52 كگ سالماقتا سىنعا تۇسكەن ول يۋتين لۋونىڭ «ماسەلەسىن» ءبىرىنشى راۋندتا-اق شەشىپ تاستادى. جازيرا ونى ەكى رەت نوكداۋنعا جىبەردى. تورەشى باسەكەنى سول مەزەتتە دەرەۋ توقتاتتى. 57 كگ سالماقتاعى ۇلجان سارسەنبەك ۆەتنامدىق تران نگۋەندى ۇپاي سانىمەن ۇتتى. ەكىنشى راۋندتا ۇلجان قارسىلاسىن ءبىر مارتە ەسەڭگىرەتتى. سوڭعى بولىپ 60 كگ سالماقتاعى ۆيكتوريا گرافەەۆا ونەر كورسەتتى. ول تايپەيدىڭ وكىلى چەن سيۋان ەنى العاشقى ەكى راۋندتا ءۇش رەت نوكداۋنعا ءتۇسىرىپ, مەرزىمىنەن بۇرىن جەڭىسكە جەتتى.
كەشە سانجار تاشكەنباي (48 كگ) تاجىكستاندىق مەحرون شافيەۆپەن, ساكەن بيبوسىنوۆ (51 كگ) وزبەكستاندىق اسىلبەك جاليلوۆپەن, ماحمۇد سابىرحان (54 كگ) شريلانكالىق جايانات قۇمارمەن, مۇحامەدسابىر بازارباي ۇلى (63,5 كگ) تايلاندتىق سومچاي ۆونگسۋۆامەن, ساعىندىق توعامباي (92 كگ) وزبەكستاننىڭ قازاعى ماديار سايدراقىموۆپەن جۇدىرىقتاستى. بۇلار – سوڭعى شيرەك فينالدىق سايىستار. سودان سوڭ بىلعارى قولعاپ شەبەرلەرى ەكى كۇن دەمالادى. 9 جەلتوقساندا جارتىلاي فينالدىق باسەكەلەر وتەدى. ازيا چەمپيوناتىنىڭ جەڭىمپازدارى 11 جەلتوقساندا انىقتالادى.