رەسمي ستاتيستيكالىق مالىمەتتەرگە سايكەس, بيىلعى قاڭتار-قىركۇيەك ارالىعىندا 5 ملن 973 مىڭ ازامات ەل ىشىندە ساياحاتتاعان, دەپ حابارلايدى Egemen.kz تۋريزم جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
ىشكى تۋريستەر سانى وتكەن جىلدىڭ سايكەس كەزەڭىمەن سالىستىرعاندا 562 مىڭ ادامعا ارتقان. 2023 جىلى وسى كورسەتكىش 5,4 ميلليون ادامدى قۇراعان.ۆەدومستۆو مالىمەتىنشە, الماتى, استانا قالالارى مەن اقمولا وبلىسى ىشكى تۋريزم باعىتتارى اراسىندا كوش باستاپ تۇر. بۇل ايماقتار تۋريستەردى ەرەكشە تابيعاتىمەن, دامىعان ينفراقۇرىلىمىمەن جانە الۋان ءتۇرلى تۋريستىك مۇمكىندىكتەرىمەن تارتىپ كەلەدى.
«ىشكى تۋريستەر سانىنىڭ ارتۋى ازاماتتاردىڭ ەل بويىنشا ءجيى ساياحاتتايتىنىن كورسەتەدى. ياعني, ءوز ەلىن تانىپ-بىلۋگە دەگەن قىزىعۋشىلىعىنىڭ ارتقانىن بايقاۋعا بولادى. ىشكى ءتۋريزمدى ءار ازامات ءۇشىن قولجەتىمدى, تارتىمدى جانە جايلى ەتۋگە جۇمىستار جاسالۋدا. وسى ماقساتتا ينفراقۇرىلىمدى دامىتىپ, جاڭا باستامالاردى قولداپ كەلەمىز», دەدى تۋريزم يندۋسترياسى كوميتەتىنىڭ توراعاسى نۇرتاس كارىپباەۆ.