عىلىم جانە جوعارى ءبىلىم مينيسترلىگى ۇلتتىق بىرىڭعاي تەستىلەۋگە (ۇبت) قاتىستى ماسەلەلەردى ءتۇسىندىردى, دەپ حابارلايدى Egemen.kz.
2023-2024 جىلدارى دۇنيەجۇزىلىك بانكتىڭ «جالپى ءبىلىم بەرۋدى جاڭعىرتۋ» جوباسى اياسىندا ەلىمىزدىڭ تۇكپىر-تۇكپىرىنەن ىرىكتەلگەن 350 ساراپشى ۇبت تاپسىرمالارىن ازىرلەۋ جانە ساراپتاۋ بويىنشا وقۋ كۋرسىن اياقتادى.
وقىعان ماماندار ۇلتتىق تەستىلەۋ ورتالىعى ۇيىمداستىراتىن ءىس-شارالارعا بەلسەنە قاتىسىپ, بىلىكتىلىكتەرىن ارتتىرۋدى جالعاستىرىپ جاتىر. سونداي-اق ورتالىق مۋلتيمەديالىق ەلەمەنتتەر مەن جوعارى دەڭگەيدەگى كوگنيتيۆتىك داعدىلاردى باعالايتىن ينتەراكتيۆتى ارەكەتتەردى قۇرۋعا ارنالعان يننوۆاتسيالىق جاڭا ونلاين پلاتفورماسىن ازىرلەپ جاتىر.
«بۇل پلاتفورما ءارتۇرلى تيپتەگى تاپسىرمالاردى ازىرلەۋگە مۇمكىندىك بەرىپ, ۇبت تاپسىرمالارىنىڭ ساپاسىن ايتارلىقتاي جاقسارتادى», دەپ حابارلادى عىلىم جانە جوعارى ءبىلىم مينيسترلىگى.
بۇعان دەيىن, 2021 جىلعى 3 جەلتوقساندا دۇنيەجۇزىلىك بانكتىڭ «جالپى ءبىلىم بەرۋدى جاڭعىرتۋ» جوباسى بويىنشا بايانداماسى نەگىزىندە حالىقارالىق كونسۋلتانتتاردىڭ ۇسىنىستارى ەسكەرىلگەن ەدى.
«2024 جىلى ۇبت-عا سايكەستىكتى باعالاۋ ءۇشىن مۋلتيمەديالىق ەلەمەنتتەرى بار تاپسىرمالار ەنگىزىلەدى», دەلىنگەن ۆەدومستۆو اقپاراتىندا.