پارلامەنت سەناتىندا پالاتانىڭ قوعامدىق جوبالىق كەڭسەسىنىڭ كەڭەيتىلگەن وتىرىسى ءوتتى. وندا قازاقستاندا ءتۋريزمدى دامىتۋ, تابيعاتتى قورعاۋ جانە تۋريستىك ورىنداردا قاجەتتى ينفراقۇرىلىم قالىپتاستىرۋ ماسەلەلەرى تالقىلاندى. جيىنعا سەنات توراعاسى ماۋلەن اشىمباەۆ, مەملەكەتتىك ورگانداردىڭ, ساراپتاما جانە بيزنەس قاۋىمداستىق وكىلدەرى قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
پالاتا سپيكەرى وتىرىسقا قاتىسۋشىلارعا ءىلتيپات ءبىلدىرىپ, مەملەكەت باسشىسى ەلىمىزدە ءتۋريزمدى دامىتۋعا باسا ءمان بەرىپ وتىرعانىن اتاپ ءوتتى. سونداي-اق اتالعان باعىت الەمدىك ەكونوميكانىڭ قارقىندى دامۋىنىڭ كاتاليزاتورى جانە ينۆەستورلار ءۇشىن ەڭ تارتىمدى سالالاردىڭ ءبىرى ەكەنى ايتىلدى.
ماۋلەن اشىمباەۆ قازاقستاندا تۋريزمگە سالىنىپ جاتقان ينۆەستيتسيانىڭ ارتۋىنا قاراماستان, ونىڭ دامۋىن تەجەيتىن بىرقاتار جۇيەلى پروبلەمالار بار ەكەنىنە دە نازار اۋداردى. بۇل رەتتە كولىك جانە ينجەنەرلىك ينفراقۇرىلىمى ناشار, جەتۋ قيىن تۋريستىك ايماقتارعا قاتىستى تۇيتكىلدەر ءسوز بولدى.
سونىمەن قاتار سەنات توراعاسى پالاتانىڭ جوبالىق كەڭسەسىنىڭ زاڭنامالىق قىزمەتىنە جانە بارلىق مۇددەلى تاراپتىڭ كۇش-جىگەرىن جۇمىلدىرۋدى, حالىقارالىق تاجىريبەلەردى زەردەلەۋدى, سونداي-اق, وزىق تەحنولوگيالاردى ەنگىزۋدى تالاپ ەتەتىن ماڭىزدى مىندەتتەرگە توقتالدى. ناقتى ايتقاندا, تۋريستىك ايماقتاردا بالامالى ەنەرگيا كوزدەرىن, سۋمەن جابدىقتاۋدى جانە «جاسىل» ينفراقۇرىلىمنىڭ باسقا دا تۇرلەرىن پايدالاناتىن جوبالاردى قولداۋ ءۇشىن زاڭنامالىق نورمالار ازىرلەۋ بارىسى ءسوز بولدى.
«بەلگىلى تۋريستىك ەل بولۋ ءۇشىن ناقتى ستراتەگيا مەن مەملەكەت, بيزنەس جانە قوعام اراسىنداعى بەلسەندى ءوزارا ءىس-قيمىل قاجەت. سول سەبەپتى, «جاسىل» تەحنولوگيالاردى قولدانا وتىرىپ, تۋريستىك ايماقتاردىڭ ينجەنەرلىك ينفراقۇرىلىمىن جاڭعىرتۋ كەرەك. بالامالى ەنەرگيا كوزدەرىن قولدانۋ, سۋدى ءتيىمدى پايدالانۋ, سۋ تازارتۋ جۇيەلەرىن ەنگىزۋ, «جاسىل» كولىك ينفراقۇرىلىمىن دامىتۋ جانە ەكولوگيالىق تۋريزم تۇرلەرىن جەتىلدىرۋدىڭ دە ماڭىزى زور. وسى ىستە شەت ەلدەردىڭ تاجىريبەلەرىن جان-جاقتى زەردەلەگەن ءجون. بۇل باعىتتا سەنات قاجەتتى زاڭنامالىق وزگەرىستەر ەنگىزۋگە قاتىستى سىندارلى ۇسىنىستاردى بىرلەسىپ تالقىلاۋعا ءاردايىم دايىن», دەدى ماۋلەن اشىمباەۆ.
وتىرىس بارىسىندا ەلىمىزدە ءتۋريزمدى دامىتۋ جانە ستاندارتتى ەمەس تەتىكتەردى پايدالانۋ باعىتىنداعى جۇيەلى شارالار دا تالقىلاندى. سونىڭ اياسىندا اقمولا وبلىسىنىڭ اقكول اۋدانىنداعى بالامالى ينفراقۇرىلىمنىڭ ءتۇرلى تاسىلدەرى قولدانىلعان جاڭا كۋرورتتىق ايماقتاردىڭ جوبالارى تانىستىرىلدى. ونىڭ ىشىندە كۇن ەنەرگياسىن پايدالانۋ, اۋا جىلۋ بەلدەۋىنىڭ قۇرالدارى, بيوتازارتۋ نىساندارىن قولدانۋ, اۆتونومدى سۋ كوزدەرى جانە باسقا دا بالامالى تۇرلەر بار.
ساراپتاما جانە بيزنەس قاۋىمداستىق وكىلدەرى مەملەكەت تاراپىنان قولداۋ پاراديگماسىن وزگەرتۋ ماسەلەسىنە نازار اۋداردى. ولاردىڭ ايتۋىنشا, مەملەكەتتىك گرانتتان مەملەكەتتىك ينۆەستيتسيالارعا ءوتۋ جانە ينۆەستوردىڭ جاۋاپكەرشىلىگىن ارتتىرۋ اسا ماڭىزدى. بۇل ءتاسىل وسى سالادا جۇرگىزىلىپ جاتقان جاڭعىرتۋدىڭ تيىمدىلىگىن 10 ەسەگە دەيىن ۇلعايتۋعا قاۋقارلى.
ءىس-شاراعا سەنات توراعاسىمەن بىرگە پالاتا سپيكەرىنىڭ ورىنباسارى جاقىپ اسانوۆ, سەناتورلار, تۋريزم جانە سپورت ءمينيسترى ەربول مىرزابوسىنوۆ, اقمولا وبلىسى اكىمىنىڭ ورىنباسارى ەرنار جاركەشوۆ, ۇلتتىق ەكونوميكا ۆيتسە-ءمينيسترى باۋىرجان قۇدايبەرگەنوۆ, ەنەرگەتيكا ۆيتسە-ءمينيسترى قۇدايبەرگەن ارىمبەك جانە تاعى باسقالار قاتىستى.
ايتا كەتەيىك, 13 قىركۇيەك كۇنى سەناتورلار ءتۋريزمدى دامىتۋ جانە ينۆەستور تارتۋ, اقمولا وبلىسى اقكول قالاسىنىڭ تاجىريبەسى نەگىزىندە تۋريستىك نىساندارعا ينفراقۇرىلىمنىڭ بالامالى كوزدەرىن پايدالانۋدى مەملەكەت تاراپىنان قولداۋعا ارنالعان دەپۋتاتتىق ساۋال جولدادى. سونىڭ ناتيجەسىندە مۇددەلى مەملەكەتتىك ورگانداردىڭ قاتىسۋىمەن جۇمىس توبى قۇرىلدى. وندا وتاندىق كۋرورتتاردى بالامالى ينفراقۇرىلىممەن قامتاماسىز ەتۋ جونىندەگى جوبالار قارالىپ, زەردەلەندى.