سولتۇستىك قازاقستان وبلىسىنا جۇمىس ساپارى اياسىندا پرەمەر-ءمينيستردىڭ ورىنباسارى تامارا دۇيسەنوۆا وڭىردەگى الەۋمەتتىك جوبالاردىڭ ىسكە اسۋ بارىسىمەن تانىستى.
ۆيتسە-پرەمەر م.قوزىباەۆ اتىنداعى ۋنيۆەرسيتەتكە بارىپ, «سەرپىن» باعدارلاماسىنا قاتىساتىن جۇمىس بەرۋشىلەردىڭ قاتىسۋىمەن كەڭەس وتكىزدى. «سەرپىن» رەسپۋبليكالىق جوبالاۋ كەڭسەسىنىڭ جەتەكشىسى مۇرات ابەنوۆ «سەرپىن تۇلەكتەرى» قاۋىمداستىعىن قۇرۋ تۋرالى باستامانى قولدادى. بۇل ۇيىم ابيتۋريەنتتەر مەن ستۋدەنتتەرگە قولداۋ كورسەتەدى. سولتۇستىك وڭىردە اتالعان باعدارلاما بويىنشا 1 350 ادام ءبىلىم الىپ, وقۋىن جالعاستىرىپ جاتىر. كوپتەگەن تۇلەك وسى وڭىردە جۇمىس ىستەۋدى تاڭداعان. وتباسىن قۇرىپ, وبلىستىڭ دامۋىنا ۇلەس قوسىپ جاتىر. سولاردىڭ ءبىرى – نۇرسەيت ابدىرازاقوۆ. ول 2016 جىلى تۇركىستان وبلىسى قازىعۇرت اۋدانىنان كەلىپ, ۋنيۆەرسيتەتكە تۇسكەن, قازىر ءوزى وقۋ ورنىندا قىزمەت ەتىپ ءجۇر. «باعدارلاما شىنىمەن دە ءتيىمدى. مەن بولاشاعىمدى وسى وڭىرمەن جانە ءوز ۋنيۆەرسيتەتىممەن بايلانىستىرامىن», دەدى ن.ابدىرازاقوۆ.
پرەمەر-ءمينيستردىڭ ورىنباسارى جوعارى وقۋ ورىندارى مەن كوللەدجدەردىڭ كاسىپورىندارمەن ىنتىماقتاستىعىن نىعايتۋدىڭ ماڭىزىن اتاپ ءوتتى. ول جۇمىس بەرۋشىلەردىڭ قاجەتتىلىكتەرىنە سايكەس ماماندار دايارلاۋ باعدارلامانىڭ تابىستى جۇزەگە اسىرىلۋىنىڭ كەپىلى ەكەنىنە ءمان بەردى.
وڭىردە 300-دەن استام جۇمىس بەرۋشىمەن مەموراندۋم جاسالعان. بيىل وقۋىن بىتىرەتىن 68 تۇلەككە ارنالعان جەكە ءىس-شارالار ۇيىمداستىرىلدى. وڭىردەگى ءىرى كومپانيا وكىلدەرى جاس ماماندارعا سۇرانىستىڭ جوعارى ەكەنىن ايتىپ, «سەرپىن» باعدارلاماسىنا بەلسەنە قاتىسۋعا دايىن ەكەنىن ءبىلدىردى.
قازىرگى ۋاقىتتا كادر تاپشىلىعى سەزىلىپ وتىرعان 8 ءوڭىر بار. باعدارلاما تۇلەكتەرىن وسى وڭىرلەردە جۇمىسقا ورنالاستىرۋ مۇمكىندىگى قاراستىرىلىپ جاتىر.
«باعدارلامانىڭ الەۋمەتتىك ماڭىزى جوعارى. ول بولاشاق تۇلەكتەردى تۇراقتى جۇمىسپەن قامتاماسىز ەتەدى جانە ناقتى كاسىپورىنداردىڭ سۇرانىسىنا ساي كادرلار دايارلايدى. كەلەسى جىلى باعدارلاماعا كوللەدجدەردىڭ قاتىسۋى جوسپارلانىپ وتىر. باعدارلامانى ءتيىمدى ىسكە اسىرۋ ءۇشىن بارلىق مۇددەلى مينيسترلىكتەر, وبلىس اكىمدىكتەرى مەن جۇمىس بەرۋشىلەر تىعىز بايلانىستا جۇمىس ىستەۋى كەرەك. بۇل ۇدەرىستە ايماقتىق جوبالىق كەڭسەلەردىڭ ءرولى ماڭىزدى», دەدى ت.دۇيسەنوۆا.
ۆيتسە-پرەمەر م.كوزىباەۆ اتىنداعى ۋنيۆەرسيتەتتىڭ زەرتحانالارىمەن تانىسىپ, ونىڭ ىشىندە «سەرپىن» باعدارلاماسى ارقىلى وقۋعا تۇسكەن ستۋدەنتتەردىڭ عىلىمي زەرتتەۋلەرىن كوردى. مۇنداي زاماناۋي زەرتحانالار حالىقارالىق ساراپشىلارمەن بىرلەسىپ جۇمىس ىستەۋگە مۇمكىندىك بەرەدى.
مىسالى, قىتايدىڭ سولتۇستىك-باتىس اۋىلشارۋاشىلىق ۋنيۆەرسيتەتىنىڭ عالىمدارى كوزىباەۆ ۋنيۆەرسيتەتىنىڭ ستۋدەنتتەرىمەن بىرلەسە اۋىل شارۋاشىلىعى جانە سۋ رەسۋرستارى سالاسىنداعى جوبالار بويىنشا جۇمىس ىستەپ جاتىر.
ماناش كوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى اقش-تىڭ اريزونا ۋنيۆەرسيتەتىمەن سەرىكتەس. ىنتىماقتاستىق باعدارلاماسى قوس ديپلوم الۋ, عالىمدار اراسىندا عىلىمي الماسۋ, وقىتۋشىلار ءۇشىن بىرلەسكەن تاعىلىمدامالار, سونداي-اق اكادەميالىق ستراتەگيا مەن كورپوراتيۆتىك باسقارۋدى جەتىلدىرۋگە ارنالعان ۇسىنىستاردى قامتيدى.
سونىمەن قاتار وڭىرگە ساپارى اياسىندا ت.دۇيسەنوۆا «Qyzylzhar» كرەاتيۆتى يندۋستريا ورتالىعىنا باردى. ءبىر اي بۇرىن اشىلعان ورتالىق يننوۆاتسيالىق جانە شىعارماشىلىق جوبالاردى جۇزەگە اسىرۋ الاڭىنا اينالدى. وندا تسيفرلىق تەحنولوگيالار سالاسىنداعى باعىتتى دامىتۋ, مەديا كونتەنت, ءسان جانە باسقا دا شىعارماشىلىق يندۋستريالاردى قۇرۋ ءۇشىن بارلىق قاجەتتى جاعدايلار جاسالعان.
كەيبىر كرەاتيۆتى مامانداردىڭ ەسىمدەرى ءالى كەڭ اۋديتورياعا تانىس ەمەس. ال كەيبىرىنىڭ داڭقى ەۋروپاعا دەيىن جەتكەن. مىسالى, سانگەر ايجان كولچينا پاريجدەگى جوعارى ءسان اپتالىعىندا ءوز كوللەكتسياسىن ۇسىندى, وندا ونىڭ جۇمىسى جوعارى باعالاندى.
ايجان كولچينانىڭ جەتەكشىلىگىمەن جاس ديزاينەرلەر كويلەكتەردىڭ بىرەگەي ۇلگىلەرىن ازىرلەۋدە. ەڭ كرەاتيۆتى ەسكيزدەر, يدەيالار ناعىز ونەر تۋىندىلارىنا اينالاتىن ارنايى شەبەرحانادا جۇزەگە اسىرىلادى.
مۇندا قۇلاعى ناشار ەستيتىن بالالاردان قۇرالعان بىرەگەي بي ءانسامبلى بار. ونىڭ نەگىزىن قالاۋشى ولگا روستوۆششيكوۆا بىرقاتار رەسپۋبليكالىق, حالىقارالىق بايقاۋلاردان جۇلدەمەن ورالعان. ۆيتسە-پرەمەر باستامانى جوعارى باعالاپ, ەرەكشە قاجەتتىلىگى بار بالالاردى شىعارماشىلىق جانە مادەني جوبالارعا قاتىسۋ ارقىلى دامىتۋدىڭ ماڭىزىن اتاپ ءوتتى.
ورتالىق بازاسىندا ءوڭىردىڭ كرەاتيۆتى يندۋستريا وكىلدەرىمەن كەزدەسۋ ۇيىمداستىرىلدى. مادەنيەت جانە اقپارات ۆيتسە-ءمينيسترى ەۆگەني كوچەتوۆ سالاعا قاتىستى اتقارىلىپ جاتقان شارالار جونىندە باياندادى. بۇگىندە ءتيىستى زاڭدارعا وزگەرىستەر ەنگىزىلىپ, پارلامەنت قاراۋىنا جولدانعان. وندا سالالىق قور قۇرۋ, مەملەكەتتىك ورگاندارعا قوسىمشا قۇزىرەت بەرۋ, سونداي-اق ەكونوميكانىڭ كرەاتيۆتى سالالارىن قارجىلاندىرۋ كوزدەرى قاراستىرىلدى. وسى باستامالار ەلىمىزدەگى كرەاتيۆتى يندۋستريانى ىنتالاندىرىپ قانا قويماي, سالانىڭ دامۋىنا سەرپىن بەرەدى.
«سولتۇستىك قازاقستان وبلىسى كرەاتيۆتى يندۋستريانىڭ دامۋىنا قاجەتتى بارلىق مۇمكىندىككە يە. اتالعان سالا ايماقتىڭ ەكونوميكالىق جانە مادەني الەۋەتىن نىعايتۋدا ماڭىزدى ءرول اتقاراتىنىنا سەنىمدىمىن. جالپى, وبلىستاعى كرەاتيۆتى يندۋستريا حابىن قۇرۋ ماڭىزدى قادام, بۇل تاجىريبەنى باسقا ايماقتارعا دا تاراتۋ كەرەك», دەدى ت.دۇيسەنوۆا.
سونداي-اق ۆيتسە-پرەمەر وڭىردەگى بىرقاتار مەديتسينالىق ۇيىمداردا بولىپ, پرەزيدەنتتىڭ تاپسىرماسىنا سايكەس «اۋىلدا دەنساۋلىق ساقتاۋدى جاڭعىرتۋ» جوباسىنىڭ جۇزەگە اسىرىلۋىن تەكسەردى.